Ayyukan 18 - Lala NT

Bulus yǝ Korinti

¹ Ndiira maaso wa, Bulus yǝ lee Atina yǝ ko Korinti.

² Kǝnso yǝ pam ma yaake ǝn yarsǝ me Akila, ǝn Bayahude yǝ fiɗ a ur Fontus wa. Akila ma toonesi Biriskila ɓǝ wo Italiya ɓǝ tǝr kwang ra me Kalaudiyus yǝ nawanto me Yahudawa ɓǝ lee Rom. Pa Bulus yǝ ko a ɓoni me koyǝ ɓǝ wǝrǝ,

³ pa me sase kǝn kayǝn tom tinama wǝrkǝ pillang wa, pa ya kaɗ ke ma ɓosa.

⁴ A kaa wiiya Yahudawa ɓa nsaad, Bulus yǝn kwetǝ a hit kwau Yahudawa ɓa me yǝ sut Yahudawa ma ɓaa ɓǝn Yahudawa ra ɓa me ɓǝ na ɓongto a mbu yǝn nkeesǝ ɓa.

⁵ Pa ndiira Silas ma Timatawus ɓǝ fiɗsǝ Makidoniya ɓǝ wo wa, Bulus yǝ na ɗuura ira nsaad yǝn nkee mara Kaa ra yǝn weɗa Yahudawa me Yeso ǝn Almaseho.

⁶ Pa ɓaa Yahudawa ɓa ɓǝ kǝrtǝsǝ a ɗuura Bulus ra ɓaa nhoorǝ dem wa, pa yǝ kuk tula luktu usu ra, yǝɓǝ nkee me, “Monma sa kǝ tom a nkweera sa! Niina nkweerane helek. Nii nga wa nǝ ko a ɓaa ɓǝn Yahudawa ra ɓa.”

⁷ Pa Bulus yǝ lee hit kwau Yahudawa ɓa yǝ ko a ɗuur yaake ǝn yarsǝ me Titus Yustus wa, an nyoo Kaa ya u ɗuur usu kǝk ma hit kwau Yahudawa.

⁸ Kiribus, kuɓ kwang hit kwau Yahudawa ɓa, ma taanda ira nsaad ɓǝ na ɓongto a Ankundi ni, ma ɓaata ɓa Korintiyawa ɓa dem, ɓǝ kurasǝ mara Bulus ra wa ɓǝ na ɓongto ɓaa ɓǝ tom baptisma.

⁹ A pǝrtǝra kǝra Ankundi yǝ weɗa Bulus a rotǝma me, “A kura kokto ra; a toma nkee mara na wa, ngǝ ro seura.

¹⁰ Me nǝ ke ma ngiinga, yake sem kǝn kiyǝn ngǝn nkwel yǝgǝ tom mbuka wara, me nǝma ɓeta dem a ur wa.”

¹¹ Pa Bulus yǝ tǝr kǝnso meera ma pekǝra, yǝn fǝɗkǝ ɓǝ mara Kaa ra.

¹² A fer Galiyo yǝsa Ngwamna Akaya wa, ɓaa Yahudawa ɓa ɓǝ kwau ɓǝ ma Bulus ɓaa sa ko a han kaɗ kiita ɓa.

¹³ Ɓǝ nkee me, “Eɗ ɗa, yǝn ti ɓeta ɓǝ nyoo Kaa a ɗǝɗa u sem keke ma masaka yau ra ɓa.”

¹⁴ Pa Bulus ka yǝn taa me kiya kakka, Galiyo yǝ nkee ɓaa Yahudawa ɓa me, “Me sase ɓaa Yahudawa ɓa kasǝ nkee me yǝn tom mbu sem yaɓ ra ɓa hana mbu kwalakwala ɓa, kama tomon keke kǝnǝsǝ kura.

¹⁵ Pa tomsǝ me ǝn rǝnǝta a ɗaaso a taa mbuka wa ma ɗǝnta ma ɗǝm masaka waaso wa, so ko sǝ feɗ mbasa. Nǝ sǝ kan kiita a mbusǝsǝ ra.”

¹⁶ Pa yǝɓǝ pǝǝ a hit kiita wa.

¹⁷ Pa ɓǝ nsaad kwang a ɗuura Sostanus ra kuɓ kwang hit kwau Yahudawa ɓa wa, ɓaa hob a wii han kaɗ kiita ɓa. Pa Galiyo yǝ weɗa me mbuka nteesǝn ra.

Bulus yǝ kang Antakiya a Suriya

¹⁸ Ndiira usu Bulus yǝ tǝr ngeek Korinti wa. Pa yǝ ti pamra ɓan ɓǝɗ Kaa ɓa yǝ talǝ yǝ faɗ Suriya, ke ma Biriskila ma Akila. Fer yǝ nkeesǝ me kiya lee hansǝsǝ wa, yǝ nhii ɗuura Kankiriya me yǝ wee too waa wan.

¹⁹ Ɓǝ kan Afisa, a han Bulus yǝ leesǝ Biriskila ma Akila wa. Pa sase yǝ kana hit Kwau Yahudawa ɓa yǝ kweetǝ yǝn kan mara ma ɓa Yahudawa ɓa.

²⁰ Pa ɓaa kǝna me yǝ sookǝ tǝro ngeek ma ɓosa, pa yǝ yau ra.

²¹ Pa yǝ niisǝ me kiya faɗ wa yǝ ɓǝ nkee me, “Kǝnǝ ɓaarǝ nǝ kang ɗǝm me Kaa yawan.” Pa kǝnso yǝ nii yǝ kana kurnyaamo Afisa yǝ faɗa.

²² Pa yǝ kansǝ Kaisariya wa, yǝ taa ɓoti koyǝ too ɓan ɓǝɗ Kaa ɓa. Pa yǝ ham yǝ faɗ Antakiya.

²³ Ndiira yǝ tǝrsǝ Antakiya ngeek wa, Bulus yǝ nii yǝ siki yǝ ko a handa ɓolɓol a put Galatiyawa ma put Firigiya wa. Yǝn nkee ɓan ɓǝɗ Kaa ɓa mbu kǝɓǝn na'nkwiiti ɓa.

²⁴ Ndiira maaso wa, yaa Bayahude ke kǝn ǝn yarsǝ me Afolos yǝ wo Afisa. Sase ɗǝm ǝn yaa ur Alekzandiriya, yǝn pǝr mara dem, yǝ maa a Likarkar Kaa wa.

²⁵ Ɓaa fǝɗkǝsǝ a ɗǝɗa Ankundi ra, yǝn kan ma kokrok to yǝn nkee mara Yeso ra keke, pa yǝ maa baptisma Yohanna wa maɗ.

²⁶ Pa yǝ ntii yǝ kan mara kokrokto a hit kwau Yahudawa wa. Pa Biriskila ma Akila ɓǝ kura sǝ mara ira maaso wa, pa ɓaa wiin ɓaa ko ɗuur ɓoso ɓaa weɗa Ɗǝɗa mara Kaa ra ɓongɓong.

²⁷ Pa Afolos yǝn taasǝ me kiya ko a talle Akaya wa, pa ɓan ɓǝɗ Kaa ɓa ɓaa kwasi ɓaa nyor likarkar me ɓan ɓǝɗ Kaa ɓa ɓaa kono. Yǝ kansǝ wa, yǝ tom mbu kwasira ɓa ɓong a ɓaa ɓǝ nasǝ ɓongto ma lau Kwasira Kaa ra wa.

²⁸ Bulus kana renǝta kwang ma ɓaa Yahudawa ɓa yǝ ɓǝ fang a wii ɓeta wa. Yǝn weɗa ɓǝ a Likarkar Kaa wa me Yeso ǝn Almaseho.