Ayyukan 16 - Lala NT

Timatawus yǝ ɓǝɗ Bulus ma Silas

¹ Bulus ma Silas ɓǝ kang Darbe ma Listira a han aufǝɗke ǝn yarsǝ me Timatawus ya. Maasi kǝn ǝn Bayahude an ɓǝɗ Kaa ya, papsi ǝn Bahelene.

² Ɓan ɓǝɗ Kaa Listira ma Ikoniya ɓa ɓǝ nkee mara yaɓ a ɗuura Timatawus ra.

³ Bulus yǝn taa me kiya too ɓǝ ko ke a siko usu, pa yaa piri me ɓaa Yahudawa ɓǝsǝ kǝnso ɓa, ɓǝ maan nsaad me papisi yǝn Bahelene.

⁴ A fer ɓǝsa siko ura ura wa, ɓǝn nkee ɓan ɓǝɗ Kaa ɓa mbu ɓahona ma wiina Urshalima ɓa ɓǝ nkeesǝ me a ɓǝɗ wa.

⁵ Maso ɓan ɓǝɗ Kaa ɓǝsa ura ɓa ɓǝ tom kwakwa a na ɓongto ɓoso ɓǝ toma soko nfee.

Bulus yǝ tom rotǝma a ɗuura yaake Makidoniya

⁶ Bulus ma sik ɓǝsa ɓǝ ko a ura ɓolɓol u Firigiya ma Galitiya, me Wis Kaa wa yǝ saa ɓǝ nkee mara ira wa put Asiya wa.

⁷ Pa ɓǝ kansǝ a han put Masiya tǝngsǝ ɓa wa, ɓǝ kweetǝ me kama ɓǝ kang Bitiniya, pa Wis Yeso wa yau ɓǝra.

⁸ Pa ɓǝ tallǝ ma lau ur Masiya wa, ɓǝ ham ɓǝ faɗ a put Toruwas wa.

⁹ A pǝrtǝra sǝra Bulus yǝ tom rotǝma me yaake Makidoniya yǝ kǝɗ yǝn kǝnasǝ me, “Ngau Makidoniya ngǝtǝ kwasi!”

¹⁰ Ndiira Bulus yǝ wǝrsǝ mbusa a rotǝma maaso wa, tǝ nii tǝ kǝr ɗǝɗa kǝ ta ko Makidoniya ra, me tǝ yawan me Kaa yǝ yartǝ me kotǝ ɓǝ nkee mara Kwalari ra.

Lidiya yǝ na ɓongto

¹¹ Pa tǝ nii Toruwas tǝ ɓǝɗ aulaara tǝ ko Samutarkiya, pa handa weesǝ wa tǝ kan Niyafolis.

¹² Tǝ niisǝ kǝnso wa tǝ ko Filibi, u yǝsaa kuɓsutu Roma wa ɗǝm ǝn sase ur kwang a put Makidoniya wa. Pa tǝ tǝr kǝnso siingǝ.

¹³ A kaa wiiya Yahudawa ɓa, tǝ nii tǝ ko a inntii uru ya ma kal seno wa, han tǝn sensǝ me kǝtǝ wǝr han kǝnara ɓa. Pa tǝ kaɗ tǝ ntii kano ma toona ɓǝ kwausǝ kǝnso ɓa.

¹⁴ A ɓaa ɓǝ kwausǝ ɓa toone ke kǝn ǝn yarsǝ me Lidiya, yǝn pang lukta u ma koɓa dem wa, yǝ fiɗ a put Tayatira wa, yǝn an nyoo Kaa ya. Ankundi yǝ wilsǝ kuɗa me yǝ kura ɗǝm yǝ kon mbu Bulus yǝn kansǝ ɓa.

¹⁵ Pa sase ma ɓaa ɓǝsǝ ke a taanda ɓa ɓaa ɓǝ tom baptisma, pa yǝ tǝ yar ɗuur usu yǝ nkee me, “Me sǝ yau nǝn me nǝ an ɓǝɗ Ankundi yan, sau sǝ tǝr ɗuur nwaano.” Yǝtǝ ree dem.

Bulus ma Silas a hit neu ɓeta wa.

¹⁶ Kakake tǝn koko a han kǝna Kaa ɓa, pa tǝ pam ma hoora autoone ke ra u yǝsǝ ma wis u yǝn tisǝsǝ yǝ maa mbuka tom a wiiyo ɓa. Ɓantaanda ɓisa ɓǝn taa koɓa dem a mbu yǝn tomsǝ sǝsa.

¹⁷ Autoone kaya yǝ ɓǝɗ Bulus ma taase nsaad, yǝn yauli me, “Ɓet ɓa ɓǝn hoota Kaa ɓoti a Liura ɓa, ɓǝn nkeesǝ ɗǝɗa kǝsa taa kon nkweera wa.”

¹⁸ Yǝ tom a nkee mbusǝsa wa tǝro dem. A feɗefeɗe mbusa a rǝka Bulus, pa yǝ kǝrtǝ yǝ nkee wis ka wa, “A ɗǝnda Yeso Krisiti ra nǝn nkwaakǝ ngǝ a fiɗ a maabiri autoone sisi ra!” Nok kǝnso wis ka wa yǝ fiɗ yǝ lee autoone ka ya.

¹⁹ Pa ɓantaanda autoone sisi ɓa ɓǝ maasǝ me ɗǝɗa taa koɓa ɓosa ra feɗen wa, pa ɓǝ ma Bulus ma Silas ɓǝ ɓǝn ko a wii ɓan kankiita ɓa.

²⁰ Ɓǝ ɓǝn wo a han kan kiita ɓa ɓǝ nkee me, “Ɓǝɗ ɓaa ɓǝn ɓaa Yahudawa ɓa, ɓǝn tǝblǝ ndǝ ur waado.

²¹ Ɓǝn fǝɗkǝ ɓet ɓǝta Roma mbu tom keke ra ɓa me tǝ tomo, hana tǝ ɓǝɗ ɗa.”

²² Pa ɓeta ɓǝ kwau dem a ɗuura Bulus ma Silas ra, pa ɓan kankiita ya yǝ nkee me ǝɓǝ nsaatǝ lukta ɓǝ hob ma lǝɓra.

²³ Ndiira ɓaa hob ɓǝsǝ dem wa, ɓaa ɓǝ neu a han neu ɓeta ɓa, a nkee an ware me yǝɓǝ war kwakwa tom ɓǝ fiɗ ɗa.

²⁴ An ware yǝ kurasǝ mbusa maaso wa, pa yǝɓǝ tung ɗaan ɗaan yǝɓǝ kaa natsa ma sakla a tǝmɓa ma ɓota.

²⁵ A pam pǝrte Bulus ma Silas ɓa kǝnara ma kǝɗ pina a nyoo Kaa sa wa, ɓaata ɓaa neu ɓǝsǝ kǝnso ɓa ɓǝn kura ɓǝn kura.

²⁶ Nok kǝnso ɓǝ kura kunda hit neu ɓeta ka wa ǝn nyaˈnya. Nok kǝnso inntii hit neu ɓeta wa ya a wili, pa sakla u kaasǝ a natsa ɓaa neu ɓǝsǝ ɓa wa a nkaa nsaad.

²⁷ An ware yǝ niisǝ a moonda wa, pa yǝ wǝrsǝ inntii han neu ɓeta ɓa wilsǝ, pa yǝ hik pee isi me kiya sep ee usu me yǝn nkee me ɓa ɓaa neu ɓǝsǝ ɓa nsaad ɓǝ monon.

²⁸ Pa Bulus yǝ yauli yǝ nkee me, “Ngǝ tod ee nwango ra! Tǝ nsaad a ham ɓa!”

²⁹ An ware yǝ nkee me, yaake yǝnǝ na ara, yǝ mon yǝ ko yǝ nwii a wiiyo a Bulus ma Silas ni yǝn madkinmadki.

³⁰ Pa yǝɓǝ hik ntaandi yǝɓǝ taa, “Wiina, Kǝnǝ tom mbiu kǝna taa kon nkweera wau?”

³¹ Pa ɓaa kak me, “A na ɓongto a Ankundi Yeso ni, pa kǝngǝ taa kon ngweerange wa ma hana yamni yaa nasǝ ɓongto a taanda nga ya.”

³² Pa ɓaa nkee mara Ankundi ra sase ma taanda ira nsaad.

³³ A pǝrtǝra sǝra an ware yǝ too Bulus ma Sila yǝɓǝ sob hunde ɓose; nok kǝnso sase ma ɓet ɓǝsa ɓaa ɓǝ tom baptisma.

³⁴ An ware siya yǝɓǝn wo a ɗuur usu yǝɓǝ na mbuseya; ɓǝ kungsǝ ma hur kuɗa wa me yǝ na ɓongtǝra a Kaa nin, sase ma ɓet ɓǝsa nsaad.

³⁵ Handa weesǝ wa, ɓan kankiita ɓa ɓǝ tung ankaa'nɗeera ya a an ware ni me, “A lee Bulus ma Sila ɓǝ faɗa”

³⁶ Pa an ware yǝ nkee Bulus, “An kan kiita ya ya yǝ nkee me ngase ma Sila sǝ lee. Nwa sǝkǝ nkaa sǝ faɗ mbasa. So hurhur.”

³⁷ Pa Bulus yǝ nkee ya ɓa timisǝsǝ si ya, “Ɓaa hoptǝ a ɓeta sǝ kantǝ kiita ra, hana ka tǝsǝn ɓet Romawa ɓa wa, pa ɓǝtǝ neu a han neu ɓeta ɓa. Pa wa kaɓǝn taa me ɓǝtǝ hik a nhukǝrau? A tomra! A lee ɓǝ wo ma ngweera ɓora wo ɓǝtǝ hiki ɓǝtǝ tung tǝ faɗa.”

³⁸ Pa ankaa'nɗeera siya yǝ kan yǝ nkee an kan kiita ya ya me Bulus ma Sila ǝn ɓet Romawa ɓa wa ɓan kankiita sǝɓa kokto ɓǝ ma.

³⁹ Pa ɓǝ wo a Bulus ma Sila ni ɓǝ kon nfaata ɓǝɓǝ hik a han neu ɓǝsǝ ɓa ɓǝɓǝ kǝna me ɓǝ lee ur siso.

⁴⁰ Ndiira Bulus ma Silas ɓǝ fiɗsǝ a han neu ɓeta ɓa wa, ɓǝ ko a ɗuur Lidiya wa, a han ɓǝ famsǝ ma ɓaata ɓan ɓǝɗ Kaa ɓa. Ɓǝɓǝ naˈnkwiiti, pa ɓǝ faɗa.