Ayyukan 15 - Lala NT

Ɓan kan mara Urshalima ɓa

¹ Ɓaataka ɓǝ fiɗ Yahudiya me ɓǝ ko Antakiya ɓǝn fǝɗkǝ ɓan ɓǝɗ Kaa ɓa me, “Ndub me ɓaa fir sǝn nga Musa yǝ nkeesǝ wa me sem maaso ra, sǝ taa kon nkweera wa ra.”

² Mbusa wosǝ Bulus ma Barnabas kongsa ɓǝn nasǝ renǝta a ɗaaso ɓosa. Pa Bulus ma Barnaba ɓaa ɓǝ tauwa, ke ma ɓaata ɓan ɓǝɗ Kaa ɓa, me ɓǝ ko Urshalima me ko ɓǝ wǝr ɓahona ma wiina a ɗuura taa mbuka wa.

³ Ɓan ɓǝɗ Kaa ɓa ɓǝ tung ɓǝ a ɗǝɗa ɓǝ ɓǝɗ ma lau Finikiya ma Samariya wa ɓǝ nkee ɓeta ɗǝɗa ɓaa ɓǝn Yahudawa ra ɓa ɓǝ konsǝ nfaata wa. Mara sǝra kwa nsaad ɓaa ɓǝn ɓǝɗsǝ Kaa ɓa ɓǝ kura nepto.

⁴ Ɓǝ kansǝ Urshalima wa, ɓan ɓǝɗ Kaa ɓa ma ɓahona ma wiina ma ɓaa ɓǝ wee ɓǝsǝ nkee nsaad mbu Kaa yǝ tom ɓǝsǝ ɓa wa, ɓǝ ɓǝ kono.

⁵ Pa ɓaata ɓan na ɓongto a Kaa ni ɓa u ɓǝsǝ a ɓet Farisiyawa ɓa ɓǝ nii kǝɗ ɓǝ nkee me, “Ɓaa sem Yahudawa ra ɓa tomon ɗat me ɓǝ firi, ɗǝm ɓǝ na mbarta masaka Musa wa.”

⁶ Pa ɓahona ma wiina ɓǝ pam me ɓǝ sengge taa mbuka siso.

⁷ Ndiira ɓǝ kansǝ mbusa dem wa, Bitrus yǝ nii kǝɗ yǝɓǝ nkee mara me, “Ɓaata ɓǝna ɓaa Yahudawa ɓa, sǝ maan me a ferko Kaa yǝ tau wa a ɗaaso waaso me ɓaa ɓǝn Yahudawa ra ɓa ɓǝ kura mara a ee yaane mara kwalari u na ɓongto wa.

⁸ Kaa, yaa yǝn maa sǝ kuɗa ya, yǝ weɗa me yǝ yau ɓǝn ma lau yǝ nasǝ Wis Kaa wa a ɓoni wa, nga yǝ tom nɗǝsǝ wa.

⁹ Kaa yǝ weɗa ɓol ɓol to a ɗaaso waato ma ɓosa ra, me yǝ sob kuti ɓose ma lau na ɓongtǝra wa.

¹⁰ Pa wa tomtomni sǝn taa sǝ me kǝ sǝ pǝta Kaa ma lau ti emfǝɗkaa ɓǝsa kongsa ɓǝ tom mbu ndaase hana pap ɓǝnda ndǝ nkaa ndǝ tom ra ɓau?

¹¹ Semra! Tǝ na ɓongto me ma lau kwasira Ankundi Yeso wa ndǝ taasǝ kon nkweera wa, nga ɓosa wa.”

¹² Pa nsaad ɓaa ɓǝ kwausǝ ɓa ɓǝ ro seu ɓǝn kura mbu Bulus ma Barnaba ɓǝn nkeesǝ a ɗuura mbu nhiinyanhiinya ma weɗara Kaa yǝ tomsǝ a ɗaaso ɓaa ɓǝn Yahudawa ra ɓa, ma lau ɓoso wa.

¹³ Pa ɓǝ feɗsǝ wa, Yakubu yaa kak yaa nkee me, “Ɓaata ɓǝna ɓaa Yahudawa ɓa, sǝnǝ kura.

¹⁴ Siman yǝ ntii yǝtǝ weɗa a ntiiri ɗǝɗa Kaa yǝ wosǝ yǝ tii ɓaa ɓǝn Yahudawa ra ɓa, ɓǝ kaɗ ɓet ɓǝɗ ɓǝsa.

¹⁵ Pa mara ɓan nawanto ɓa, ɓǝ yau ɓaatǝn a si, nga nyorsǝ me,

¹⁶ “ ‘Ndiira maaso wa kǝnǝ kanga nǝ ɓaarǝ nǝ mar hit Dauda u okǝsǝ wa. Hana ka ǝn kwaata siso, kǝnǝ ɓaarǝ nǝ mara, kǝnǝ nik ɗǝm,

¹⁷ mee maaso ɓaa pesǝ ɓa ɓǝkǝ kǝr Ankundi, ma nsaad ɓaa ɓǝn Yahudawa ra ɓa u nǝ tausǝ me ɓǝ kaɗ nwaano wa, maaso Ankundi yǝ nkeesǝ wa ya yǝ tomsǝ mbusǝsa ya’

¹⁸ u ɓaa maasǝ meeta tangtang talǝsǝ wa.

¹⁹ “Maso, ǝn kan kiita nwaano, me ndǝ tom mbu lǝklǝk ɓa, ɓaa ɓǝn Yahudawa ra ɓa ɓaa ɓǝn kangsǝn kang a Kaa ni ɓa.

²⁰ Pamman ndǝ ɓǝ nyoro, ndǝ ɓǝ nkee me ɓǝ ɓaa ma mbuseya ɓaa werkǝsǝ kwandamse ɓa, ɗǝm ma tǝr toona wa, ɗǝm ɓǝ se auname u ɓaa berwensǝsǝ ngweera, ma u monma fiɗa wa.

²¹ Me Musa yǝ wee nkeen tangtang a ura ɓol ɓol, ɗǝm ɓan kau nfee a hitsa kwau Yahudawa ɓa a kaa nwiinya Yahudawa ɓa.”

Kakko wiina kan mara ɓa

²² Pa ɓahona ma wiina, ma nsaad ɓan ɓǝɗ Kaa Urshalima ɓa, ɓǝ nkee me ɓǝkǝ tau ɓaata a ɗaaso ɓoso ɓǝɓǝ timi Antakiya ke ma Bulus ma Barnaba. Pa ɓǝɓǝ tau Yahuda ya ɓan yarsǝsǝ me Barsaba ya, ma Silas, parata raɓ ɓaa ɓǝ sǝn wiina a ɗaaso ɓan ɓǝɗ Kaa ɓa.

²³ Ma ɓosa ɓǝ tungsǝ nyor mama me. Ɓahona ma wiina, ɓaata ɓǝsa. A ko a ɓan ɓǝɗ Kaa ɓa ɓaa ɓǝn Yahudawa ra ɓa, Antakiya ma Suriya ma Kilikiya. Tooma.

²⁴ Tǝ kura me ɓaata ka a ɗaaso waato ɓǝ wo sem ma maa wato ra ɓǝn rǝka sǝ, ɓǝn niksǝ senta ma mbu ɓǝn nkee sǝsǝ ɓa.

²⁵ Pa me maaso tǝ yauwan tǝ tau ɓaata a ɗaaso wato tǝɓǝ tung a sani ke ma sik ɓǝnɗaa Barnaba ma Bulus.

²⁶ Ɓet ɓa ǝn ɓosa ɓǝ nasǝ huurtu ɓoso men ɗǝnda Ankundi yaade ra Yeso Krisiti.

²⁷ Me maaso tǝn tung Yahuda ma Silas me ɓǝsǝ nkee ma ee ɓose mbu tǝ nyorsǝsǝ ɓa.

²⁸ Tǝ wǝr tomon yaɓ a Wis Kaa wa ni ma taase ɗǝm me tǝsǝ rǝka ma mbuka ɓol u faɗsǝ u nwa wa ra,

²⁹ sǝ yau sǝ se mbuseya ɓaa werkǝsǝ kwandamse ɓa ra, ndǝ kǝu auname u monma ɗaan wa ra, ma kǝu auname u ɓaa berwensǝsǝ nkweera wa, ɗǝm ma tǝr toona wa ra. Kǝ tom yaɓ sǝ lee mbusǝ sǝ. Sǝ kaɗ hur hur.

³⁰ Pa ɓaa tung ɓet ka ɓa ɓǝ faɗ Antakiya, han ɓǝ kosǝ koɓǝ kwau ɓan ɓǝɗ Kaa ɓa a ham fina ɓǝ na likarkar ɓǝ wosǝ wa.

³¹ Ɓeta ɓǝ kausǝ likarkar ka wa wa, ɓǝ hur kuɗa me ɓǝ taa naˈnkwiiti wa a mara sǝran.

³² Yahuda ma Silas ɓosa ɓǝsǝ ɓan nawanto ɓa nkee mbusa dem ɓaata ɓan ɓǝɗ Kaa mara u kǝɓǝn naˈnkwiiti ma kwakwato wa.

^33-34 Ndiira ɓǝ tǝrsǝ ngeek wa, pa ɓet ɓǝɗ Kaa ɓa, ɓǝɓǝ tung me ɓǝ kang a ɓaa kaɓǝ timi ɓǝsǝ ɓa ni ma saltǝra hurhurto ra.

³⁵ Pa Bulus ma Barnaba ɓǝ tǝng Antakiya, a han ɓosa ma ɓaata dem ɓǝ fǝɗkǝsǝ ɓǝ nkee mara Ankundi ra ɓa.

Ɓaawo Bulus ma Barnabas wa

³⁶ Kaaka ke Bulus yǝ nkee Barnaba me, “Ndǝ kang a ura ham ndǝ nkeesǝ mara Ankundi ra ɓa nsaad konɗǝ sengge ɓaata ɓǝnda ɓan ɓǝɗ Kaa ɓa mbu ɓǝn tomsǝn tom ɓa.”

³⁷ Barnaba yǝn taa me yǝ too Yohanna ya ɓan yarsǝsǝ me Markus ya ɓǝ ko ke,

³⁸ pa Bulus usu yǝ yau me kama a too Markus ra, me kayǝ lee ɓǝ Bamfiliya, yǝ yau ɓǝ faɗ wiyo ke ma ɓosa ra.

³⁹ Ɓaa rǝkata kwang a ɗaaso ɓoso. Barnaba yǝ too Markus ɓǝ tal ɓǝ ko Sayifurus,

⁴⁰ pa Bulus yǝ tau Silas, ndiira ɓan ɓǝɗ Kaa ɓa ɓǝ kǝna ɓǝsǝ kwasira Ankundi ni wa, pa ɓǝɓǝ tung wa faɗa.

⁴¹ Pa ɓǝ ko ma lau Suriya wa ɓǝ kan Kilikiya ɓǝn nkee mbu na kwiiti ɓa ɓan ɓǝɗ Kaa ɓa.