Ayyukan 11 - Lala NT

Bitrus yǝ nkee mbu kiya tom ɓa

¹ Ɓahona ma ɓaata ɓan ɓǝɗɗa nsaad a put Yahudiya wa ɓa ɓǝ kura me ɓaa ɓǝn Yahudawa ra ɓa kǝn ɓǝ kon mara Kaa ran.

² Pa Bitrus yǝ kosǝ Urshalima wa, ɓaa Yahudawa ɓaa fir ɓǝsǝ ɓa, ɓaa nhoorǝ,

³ ɓǝn nkee me, “Ngǝ kana ɗuur ɓaa sem Yahudawa ra ɓa sǝ se ke ma ɓosa.”

⁴ Bitrus yǝ ntii yǝɓǝ nkee mbu nsaad tomsǝ ɓa:

⁵ “Ka nǝ a ur Yoffa wa na kǝnara, pa na kana rotǝma, pa nǝ wǝr mbuka ham nga laulawara masǝ a kalta kurun a fiɗ a liura a ham a han nǝsǝ ɓa.

⁶ Nǝ sengesǝ laulawara kara wa, pa nǝ wǝr mbuka nga emnama a put ntaandi wa ɓa, u ɓǝn sikisǝ ma kwelkete kurun ɓa, ma emnama putu ɓǝn wiinsǝ ma kuti ɓa, ma rǝmɓa.

⁷ Pa nǝ kura kwaro yǝn nkee nǝ me, ‘Bitrus a nii, a haa nkweera ngǝ kǝuwǝ.’

⁸ “Nǝ kak nǝ nkee me, ‘Ɓong sem ra, Ankundi! Mbu kwalakwala ɓa hana u sem ɗekɗek ra wa fǝta kano a ee yaane ra.’

⁹ “Pa kwaro a fiɗ a liura ya ɓaarǝ yǝ kan raɓte, ‘Me Kaa yǝ nkee me mbuka ɗekɗek ngǝ nkee me sem ɗekɗek ra.’

¹⁰ Mbusa ɓaarǝ yǝ tom a taatǝn, pa a wiin laulawara a faɗ a liura ɗǝm.

¹¹ “A han sǝsa ɓaata ka kǝn taatǝn u ɓaa tung ɓǝsǝ a nani wa ɓǝ fiɗ Kaisariya ɓǝ nǝɗ a ɗuur a han nǝsǝ ɓa.

¹² Wis Kaa wa yǝ nkee nǝ me nǝ kǝr ko ma ɓosa ra. Ɓaata ɓǝna mindike ɓan ɓǝɗ Ankundi ɓa tǝ ko ke ma ɓosa, pa tǝ kana a hito a eɗ kaya.

¹³ Yǝ nkee tǝ an timira Kaa ya yǝ weɗa ee usu ɗuur a sani yaa nkee me, ‘A tung ete Yoffa a Siman ni yaa ǝn yarsǝsǝ me Bitrus ya.

¹⁴ Kiyǝ ngǝ wo ma mara u ngase ma ɓet ɓǝnga nsaad sǝka taa kon nkweera wa.’

¹⁵ “Nǝ ntiisǝ kan mara wa, Wis Kaa wa a ham a ɓoni nga yǝ wosǝ a dani ntiiri wa.

¹⁶ Pa nǝ ɗimma mbu Ankundi yǝ nkeesǝ ɓa me, ‘Yohanna yǝ tom baptisma ma mbraa, pa waaso kǝsǝ tom baptisma ma Wis Kaa wa.’

¹⁷ Pa me Kaa yǝ naɓǝ kwasira keke nga yǝ na nɗǝsǝ wa, a fer ndǝ nasǝ ɓongtǝra a Ankundi Yeso Krisiti ya, nǝn yamni kǝna nkee me kǝnǝ ɓisi mbu Kaa yǝ nkeesǝ ɓau?”

¹⁸ Ɓǝ kurasǝ mbusǝsa maaso wa, ɓǝ semma mbukake kǝn ɗǝm ɓǝka nkee wara ɓǝ nyoo Kaa, ɓǝn nkee me, “Pa waso, Kaa yǝ na hana ɓaa ɓǝn Yahudawa ra ɓa ɗǝɗa me ɓǝ taa kon nfaata a huurtu wa.”

Ɓan ɓǝɗ Ankundi ɓa Antakiya

¹⁹ Pa wa ɓaa ka ɓǝ nweesǝ me kongsa a fer ɓa todsǝ Istifanus wa ɓǝ mon ɓǝ ko Finikiya ma Sayifurus ma Antakiya, ɓǝn nkee mara sǝra ɓaa Yahudawa seɗe.

²⁰ Pa ɓaata kǝn ɓaa ɓǝsǝ Sayifurus ɓa ma Sayirin, ma Antakiya ɓa ntii kanmǝra ɓaa ɓǝn kurasǝ ee Helenawa ɓa, ɓǝn nkee ɓǝ mara Kwalari a ɗuura Ankundi Yeso ra.

²¹ Pa nem Ankundi ya ke ma ɓosa, ɓeta dem ɓǝ na ɓongto ɓǝ kǝrtǝ a Ankundi ni.

²² Mara sǝra a kan a ɓan ɓǝɗ Ankundi ɓa Urshalima, pa ɓǝ tung Barnaba yǝ ko Antakiya.

²³ Yǝ kansǝ wa yǝ wǝr mbu Kaa yǝn kwasi ɓǝsǝ wa, yǝ hur kuɗa, yǝɓǝ na nkwiiti me ɓǝ tom ɓong a Ankundi ni ma kuti ɓose nsaad.

²⁴ Barnabas yǝ yaa yaɓ ya, kungsǝ ma Wis Kaa wa ma ɓongtǝra, pa ɓeta dem ɓaa ɓǝn wo a Ankundi ni.

²⁵ Pa Barnabas yǝ ko Tarsus me koyǝ sengge Shawulu,

²⁶ pa yǝ wǝrsǝsǝ wa, yaa sa kang Antakiya. Maso meera kǝmmǝ Barnaba ma Shawulu ɓǝ pam ma ɓan ɓǝɗ Ankundi ɓa ɓǝ fǝɗkǝ ɓeta dem. Ɓan ɓǝɗ Ankundi a ntiiri ɓa, ɓaa ntii ɓǝ yar me Krista Antakiya.

²⁷ A fersiso ɓan nawanto ɓa ɓǝ wo ɓǝ fiɗ Urshalima me ɓǝ ko Antakiya

²⁸ Fin a ɗaaso ɓoso, ǝn yarsǝ me Agabus, yǝ nii kǝɗ ma lau Wis Kaa wa yǝ nkee me, me kuɓ kwang ɗoora ya kǝ kana a put Roma wa nsaad. (Mbusa tom fer kuɓsutu Kalaudiyus wa.)

²⁹ Emfǝɗkaa, hana yam ni yǝ yau me yǝ kwasi ma mbu yǝsǝ ma siso ɓa, ɓaata ɓisa ɓǝsa Yahudiya ɓa

³⁰ Pa ɓǝ, tung kwasira ɓora a wiina ni ma lau Barnaba ma Shawulu wa.