Ayyukan 10 - Lala NT

Bitrus yǝ ko ɗuur kuɓ kwang sosa Roma ke

¹ A put Kaisariya wa ate ke kǝn ǝn yarsǝ me Koneliyus yǝ kuɓ kwang sosa Roma ke a ɓan Tǝmɓa ɗuura ǝn yarsǝ me Italiya wa.

² Sase ma taanda ira nsaad ɓǝn ɓan ɓǝɗ Kaa ɓa, ɗǝm ɓǝn kura kokto Kaa wa; yǝn na saltǝra ma kuɗa fin, yǝn tom kǝnara a Kaa ni nfee.

³ Kakake kaa kausǝ a ɗikira ngeek yǝ rotǝ. Yǝ wǝr an timira Kaa ya yǝn wowo a sani yaa yar ma ɗǝnda ira yaa nkee me, “Koneliyus!”

⁴ Koneliyus ya sengge ma kokto yaa taa me, “Ən mbiu Ankundi?” Pa an timira Kaa ya yaa kak me, “Kǝnara nga a Kaa ni ma kwasira ngǝn tomsǝ hanhanta wa kanan a Kaa ni ɗǝm tom mbu ɗima a sani.

⁵ Waso a timi ɓeta ɓǝ ko Yoffa ko ɓa kang ma Siman u ɓan yarsǝsǝ me Bitrus ya.

⁶ Yǝn kaɗ ma Siman ya yǝn werkǝsǝ ntaamse ya, u ɗuur usu ngwang ma aulaara ya.”

⁷ Pa an timira Kaa yǝ kansǝ ma sase ya yǝ faɗsǝ wa, Koneliyus yǝ yar hoota ita raɓ ma sosa u yǝn nyoosǝ Kaa ya u yǝn tomsǝsǝ tinima ya.

⁸ Yǝɓǝ nkee nsaad mbu tomsǝ ɓa, pa yǝ ɓǝ timi Yoffa.

Rotǝma Bitrus ma

⁹ Si kaa ɗa handa weesǝ wa ɓaa siko ɓǝ ngwang ma ur Yoffa wa, Bitrus yǝ taa ɓoti a hit ko me yǝ tom kǝnara.

¹⁰ Pa ɗoora a si yǝn taa me kama yǝ taa mbuka yǝ se, pa yǝn warsǝ me a feɗ mbuseya wa yǝ rotǝ.

¹¹ Yǝ wǝr liura wilsǝ, pa yǝ wǝr mbuka ham nga laulawara masǝ a kalta kurun a ham a putu.

¹² Mbu ɗaan a laulawara sǝra ɓa weɗa emnama ɓol ɓol u ɓǝn sikisǝ ma kwelkete kurun nwa, ma emnama putu ɓǝn wiinsǝ ma kuti ɓa, ma rǝmɓa.

¹³ Pa yǝ kura kwaro yǝn nkeesǝ me, “A nii, Bitrus. Ngǝ haa nkweera ngǝ kǝuwǝ.”

¹⁴ Bitrus yǝ kak me, “Ɓong semra, Ankundi! Nǝ fǝta se mbuka u sem kwalari ra wa hana u sem ɗekɗek ra wa.”

¹⁵ Pa kwar kawa yǝ ɓaarǝ yaa nkee raɓte, “Me Kaa yǝ nkee me mbuka ɗekɗek ngǝ nkee me sem ɗekɗek ra.”

¹⁶ Mbusa ɓaarǝ yǝ tom a taatǝn, pa nok kǝnso laulawara sǝra ɓaa to a faɗ a liura.

¹⁷ Fer Bitrus yǝsa senta me ǝn kamǝra rotǝma mbiu, pa ɓet Koneliyus yǝ timi ɓǝsǝ ɓa ɓǝ maa ɗuur Siman kawan wo ɓǝ nǝɗ a inntii.

¹⁸ Ɓǝ yara, ɓǝ taa me Siman yaa ɓan yarsǝsǝ me Bitrus ya ko yǝn tǝra ham ɓau.

¹⁹ Bitrus yaa ɗimo nding ma rotǝma imma wa, Wis Kaa wa yaa nkee me, “Siman, ɓaa taka taatǝn ɓǝn taa ngǝ.

²⁰ Waso a nii ngǝ ham a putu. Ngǝ kir ra soo ma ɓosa, me nǝ timi ɓǝ niina.”

²¹ Pa Bitrus yǝ ham yǝɓǝ nkee me, “Ən niina sǝn kǝrsǝ ya. Mbu wosǝ mbiu?”

²² Pa ɓet ka ɓa ɓǝ kak me, “Tǝ fiɗa Koneliyus ni kuɓ kwang soosa ya. Yaa yǝ sǝ ɗekɗek ya ma kokto Kaa wa, u ɓaa Yahudawa nsaad ɓǝn nasǝsǝ mbarta ya. An timira Kaa ya yǝ nkeesǝ me ngǝ ya ra ngǝ ko a ɗuur usu me yǝ kura mbu kǝ ngǝsa nkee ɓa.”

²³ Pa Bitrus yǝ ɓǝ yar me ɓǝ tom waa isa ɓǝ tǝrke kǝnso. Handa weesǝ wa Bitrus ɓǝ nii ke ma ɓosa, ma ɓaata ɓaa fitsǝ Yoffa ɓa ɓǝ ko ke.

Bitrus a ɗuur Karlaniyus wa

²⁴ Handa weesǝ wa ɓǝ kan Kaisariya. Koneliyus ka yǝn war ɓǝn wara yǝ yarsǝ haato usu ma sik ɓisa.

²⁵ Bitrus yǝ kansǝ ɗuur ka wa, Koneliyus yǝ nii koyǝ kwirsǝ a kunda kolkete isi yaa ntii nyoo.

²⁶ Pa Bitrus yaa nik me yǝ nii kǝɗ, Yaa nkee me, “A nii kǝɗ, Niina nǝ ete mana kǝn.”

²⁷ Ɓaa kanmǝra, Bitrus yǝ kana hito ɗaan koyǝ wa ɓeta ɓǝ kwausǝ dem.

²⁸ Pa Bitrus yǝ ɓǝ nkee me, “Sǝ maan nsaad me masaka Yahudawa wa yau a kaɗ a ham fina ma ɓaa ɓǝn Yahudawa ɓa ra. Pa nwaano Kaa yǝ weɗa nǝ me nǝ nkee yaa ke me yǝma rumta hana yǝ sem ɗekɗek ra.

²⁹ Pa sǝ timisǝ me nǝ yarwa, nǝ wo ma senda kǝra ɓol ra. Pa nǝn taasǝ me sǝ yarnǝ mbiu?”

³⁰ Koneliyus yaa kak me, “Tǝro kurun talǝsǝwa na hito na kǝnara nga fer waso, si kaa kausǝ. Semma maa wanora pa nǝ wǝr yaake ma lukta ɗekɗek yǝ wo yǝ nǝɗ a wii nwaano

³¹ yǝnǝ nkee me, ‘Koneliyus, Kaa yǝ kura kǝnara ngan ɗǝm yǝ ɗimma kwasira ngǝn tomsǝ hanhanta wan.

³² Waso a timi a ur Yoffa wa a yar Siman ǝn yarsǝsǝ me Bitrus ya. Yǝn tǝra ɗuur Siman eɗ werkǝsǝ ntaamse ya, yǝ ngwang a kira aulaara ra.’

³³ Pa nǝ timi nok a nga ni, pa tomon yaɓ me ngǝ wo a nani. Pa wa ndǝ nsaad a ham ɓa a wiyo a Kaa ni me tǝ kura nsaad mbu Ankundi yǝ nkeesǝ me ngǝtǝ nkee ɓa.”

³⁴ Pa Bitrus yǝ ntii kanmǝra yǝ nkee me, “Waso nǝ maan me ǝn ɓong Kaa yǝ tau yaake yǝ lee ate ra

³⁵ yǝn kon hana yamni yaa yǝsa put ntaadiwa ya yaa yǝn kurasǝ kokto usu ya ɗǝm yǝn tom mbu keke ɓa ya.

³⁶ Sǝ maa mara u Kaa yǝ timisǝ ɓaa Isra'ila ɓan, yǝn nkee ɓǝ mara kwalari ra u kaɗ hurhur wa ma lau Yeso Krisiti wa, u yǝsǝ Ankundi meen ɓeta nsaad wa.

³⁷ Sǝ maa mbu tomsǝ a put Yahudiya wan nsaad, ntiisǝ Galili ndiira baptisma u Yohanna yǝ tomsǝ wa

³⁸ fer Kaa yǝ tisǝ nem isi Yeso eɗ Nazarat ya ma Wis ɗekɗek wa ma kwangto usu, ma mbu yǝ tomsǝ yaɓ yaɓ ɓa ma lau roɓ ɓeta wa ɓaa ɓǝsa a nema nsaamse ɓa me Kaa yǝ ke ma sase.

³⁹ “Tǝ kǝnso tǝn wǝr wǝrǝ mbu Yeso yǝ tomsǝ ɓa nsaad a put Yahudawa ma Urshalima wa. Ɓǝ todsǝsǝ ma lau kwaakǝra a ɓota wa,

⁴⁰ pa Kaa yaa niki a wodɗa a tǝro taatǝn wa yaa tung ɓeta ɓaa wǝrǝ.

⁴¹ Ɓaa wǝrsǝ nsaad ra, pa ǝn ɓaa Kaa yǝ tau ɓǝsǝ ɓa, ǝn taase tǝ sesǝ tǝ wee ke ma sase ɓa ndiira yǝ nisǝ a tina wa.

⁴² Kaa yǝ nkee tǝ me tǝ nkee ɓeta me ɓongtǝra ǝn sase u yǝ tausǝ wa me yǝn an kankiita ɓaa ɓǝsǝ ma huurtu ɓa ma ɓaa ɓǝ wodsǝ ɓa.

⁴³ Nsaad ɓan nawanto ɓa ɓǝ nkee mara a ɗuura iran, me nsaad ya yǝ nasǝ ɓongtǝra a sani ya yǝ taa lee a senda wa ma lau ɗǝnda ira wa.”

⁴⁴ Pa Bitrus yǝsa kanmǝra mara sǝra ɗing wa, pa Wis Kaa wa a ham a ɗuura nsaad yaa yǝ kurasǝ mara sǝra ya.

⁴⁵ Pa Yahudawa ɓǝ ɓǝɗsǝ Bitrus ɓǝ wo ke ɓa, ɓǝ kura nhiinyanhiinya to ma Wis Kaa wa hamsǝ hana ɓaa ɓǝn Yahudawa ra ɓa.

⁴⁶ Me ɓǝn kura ɓǝ ɓǝn kan ma eeme ɓolɓol ɓǝn nyoo Kaa. Pa Bitrus yaa nkee me,

⁴⁷ “Yaake kǝn kiya saa ɓet ɓa me ɓaa ɓǝn tom baptisma ma mbraa wau? Ɓǝ kon Wis Kaa wa nga tǝ konsǝ wa kǝn.”

⁴⁸ Pa yǝ nkee me ɓaa ɓǝ tom baptisma ma ɗǝnda Yeso Krisiti ra. Pa ɓǝ kǝna Bitrus me yǝ yau ɓǝ tǝr ma ɓosa tǝro ngeek nhe.