Likarkar rabte Bulus yǝ nyorsǝ Timotawus wa 4 - Lala NT

¹ Nǝn nkee ngǝ mbu ɓa a wiiyo a Kaa ni ma Krisiti Yeso, yaa kiya kan kiita ɓaa ma huurtu ɓa, ma ɓaa ɓǝ woɗsǝ ɓa, ɗǝm kiya wo yǝ tom kuɓsutu usu, nǝn nkee ngǝ me,

² a nkee mara Kaa ra ɓeta, hana ma ɗǝɗa hana ɗǝɗa sem ra. Ngǝ ɓǝ sǝkǝ, ngǝ ɓǝ nkwaakǝ ɗǝm ngǝ ɓǝ na'nkwiiti ma sǝmo, ɗǝm ngǝ ɓǝ fǝɗkǝ mara Kaa ra nlaa.

³ Me fer usu kǝ wo, u ɓeta ɓǝ waando ma fǝɗkǝra ɓongtǝra wa ra. Pa me ɓǝn ɓǝɗ mbu kuɗa ɓosa ǝn yausǝ ɓa, ma mbu ngweeme ɓosa ǝn taasǝ me yǝ kura ɓa, ɓǝkǝ kwau malǝmma ɓǝ ka nkee mbu ɓǝn taasǝ me ɓǝ kura ɓa.

⁴ Ɓǝ kǝ kǝrtǝ ngweeme ɓosa a fǝɗkǝra u ɓongtǝra wa, pa ɓǝkǝ kǝrtǝ ɓǝn kura tikaa u sem yaɓ ra wa.

⁵ Pa nwaango, a ma ɗuura nga a mbusa nsaad, a kaa kuɗa a kongsa ɗaan, a nkee mara kwalari Yeso ra, ngǝ tom tinima u hoora Kaa ra wa.

⁶ Pa nwaano, ɓaa wee nǝ naan nga na baiko wa, fer ko nwaano wa tomon.

⁷ Nǝ tom sǝukǝra u yaɓ wan, nǝ feɗ moone kayan, nǝ ma na ɓongtǝra nwaanon.

⁸ Waso, nwaano ɓan war nǝn wara ma kukǝra kaɗo keke a wiiyo a Kaa ni wa. U Ankundi yaande, an kan kiita ya ya, kiyǝ nǝ na a kaa feɗefeɗe ɓa, sem niina fin mana ra, pa ma nsaad ɓaa ɓǝn warsǝ wo usu ɓa.

Feɗefeɗe mara ya

⁹ A kweetǝ ngǝ wo a nani nakǝn,

¹⁰ me Dimas leenǝ, me yǝn waando mbu kaɗo ntaandi wa ɓa, yǝ faɗ Tasalonika. Karaska yǝ faɗ Galatiya, Titus yǝ faɗ Dalmatiya.

¹¹ Ən Luka fin mbusa tǝsǝ ke wa. A kǝr Markus sǝ wo ke, me yǝma kwasira a nani a tinima ma.

¹² Nǝ timi Tikikus me yǝ ko Afisa.

¹³ Me ngǝn wowo, ngǝnǝ wo ma luktu songra nwaano nǝ leesǝ a Karbus ni Toruwas wa, ma likarkar sǝna, ma ɗǝm ntaa u nyorma u faɗ nǝsǝ rǝka wa.

¹⁴ Alekzanda an tee tiyo ya yǝ tom nǝ mbuka kwalakwala. Ankundi yaande kiya puu a mbu yǝ tom nǝsǝ ɓa.

¹⁵ Ngase kǝn ngǝ tom nlaa ma sase, me yǝn yauwa ma mara ndaa ra.

¹⁶ A fer kankiita a ntiiri wa, ate ke semme yǝn konnǝsǝ ee wa ra, pa hanan yamnǝ yǝ monon. Kaa yǝɓǝ kankiita a mbu ɓǝ tom nǝsǝ ɓa ra.

¹⁷ Pa Ankundi yaande yǝ ke ma niina, yǝ nanǝ kokrokto, me ma lau nwaano ɓaa nkee mara Kaa ra ɓaa ɓǝn Yahudawa ra ɓa nsaad. Ɗǝm ɓaa hik nǝ a ee namo yan.

¹⁸ Ankundi yaande ki yǝ nǝ hik a mbu tentena ɓa nsaad, ɗǝm kiyǝ nǝ wo a kuɓsutu usu a liura kwakwa. Ɗǝnda Kaa ra a too pakarese. A kaɗ maaso.

Feɗefeɗe tooma ya

¹⁹ A too Biriskila ma Akila ma taanda Onesiforus ra.

²⁰ Arastus yǝ kaɗ Korinti, ɗǝm nǝ lee Turofimus sem kwakwa ra a ur Militus wa.

²¹ A kweetǝ ngǝ wo pa rara yǝ wo. Yubulus ma Fudens ɓǝn to ngǝ ma Lainus ma Kalaudiya ma ɓaata nsaad,

²² A lee Ankundi yaande yǝ kaɗ ke ma wis nwaango. A lee kwasira Kaa ra a kaɗ ke ma saase nsaad.