Likarkar rabte Bulus yǝ nyorsǝ Timotawus wa 2 - Lala NT

Yarma me a kaɗ nsoosa teno wa

¹ Ngase ɗǝm, auwane, a tom kokrok a kwasira yǝsǝ a Krisiti Yeso ni ya.

² Ma mbu ngǝ kuranasǝ nǝn nkeesǝ a wii ɓeta dem ɓǝ wǝrsǝ wa, a nkee ɓaata ɓaa ɓǝkaa maa ɓǝ fǝɗkǝ ɓaata wa.

³ A sǝm kongsa ke ma taase, nga nsosa kwalari u Krisiti Yeso wa.

⁴ Yaake sem kǝn yǝn tomsǝ tinima nsoosa ma yǝ kaa kaɗ a ɗaaso ɓaa ɓǝsǝn sosamse ɓa ra, yǝ kǝ waando me yǝ tom tinima u nkaa tom yaɓ yaa kwang isi kwalari ɓa.

⁵ Maso ɗǝm, yaa yǝn tomsǝ pala mone ya, yǝ taa faɗ wiiyo wa ra me yǝ ɓǝɗ mbu ɓaa nkeesǝ me a tom ɓa ra.

⁶ An waa nyaanyo kǝmto sem ra ya, ǝn sase kiya taa mbu yǝ waasǝ a ntiiri ɓa.

⁷ A ɗim ma mbu nǝn nkee ngǝsǝ ɓa, me Ankundi yaande kiyǝ ngǝ na maa a mbusa nsaad.

⁸ A ɗim ma Yeso Krisiti, yaa ɓaa niksǝsǝ a woɗa ya, yaa yǝ fiɗsǝ a tuwa Dauda wa. Mara Kwalari nǝn nkeesǝra a ɗuura ira,

⁹ meen siso nǝn weesǝ kongsa hana ɓan kaa nǝsǝ ma sakla nga nǝn nkwii wa. Pa mbuka kaa mara Kaa ra.

¹⁰ Me maaso nǝ sǝmsǝ mbusa nsaad meen ɗuura ɓaa Kaa yǝ taausǝ ɓa me ɓǝ tom ɓet ɓǝsa, me ɓosa kǝn ɓǝ taa kon nkweera wa u yǝsǝ a Krisiti Yeso ni wa, ma kwangto pakarese wa.

¹¹ Uwa ndǝ mara ɓongtǝra ra ǝn nkee me, me ndǝ woɗ ma Yeso, ɗǝm kǝ ndǝ nii ma Yeso.

¹² Me ndǝ sǝmǝn, ɗǝm kǝ ndǝ tom kuɓsutu ke ma sase. Pa me ndǝ renǝsǝ, kiyǝ ndǝ renǝ kǝn.

¹³ Me ndǝ sem ma ɓongtǝra ra, usu nfee yǝma ɓongtǝra, me yǝ nkaa yǝ renǝ ɓongtǝra a ɗuura ira ra.

An tinima Kaa yǝ yausǝ ma sase ya

¹⁴ Əɓǝ tomma ɗimo a mbu ɓa. Əɓǝ wiin ngwee a wii Kaa wa. Ɓǝ lee kidsa a mara a sem kwalari ra ɓa. Me yǝn tǝblǝ ɓaa ɓǝn kurasǝ mbusǝsa ɓa.

¹⁵ A kweetǝ ngǝ weɗa eenwango a Kaa ni me ngǝn tom tinima yaɓ, a kaɗ yaa yǝn kuraa ɗuura nwaara a tinima yǝn sǝksǝ ɓa ra, ɗǝm ngǝn fǝɗkǝ mara ɓongtǝra keke.

¹⁶ A moon a mara kan hautǝma ra u yǝ too mara Kaa ra rawa, usu ǝn tisǝ ɓeta ɓǝ tom mǝbmǝb ma Kaa wa.

¹⁷ Fǝɗkǝra ɓoso ǝn nweese a maabiri yǝ kǝu nga siyo tǝmo wa. A ɗaaso ɓoso ǝn Himeniyus ma Filetus,

¹⁸ ɓaa ɓǝ leesǝ ɗǝɗa ɓongtǝrato ɓa. Ɓǝn nkee me ɓaa ɓǝ weesǝ woɗɗo ɓa, ɓǝ wee niinyo a tiina wan, ɗǝm ɓǝ kwa ɓaata ɓǝ lee ɓǝɗ ɗǝɗa ɓongtǝra ra.

¹⁹ Hana maaso, mbu Kaa yǝ nkeesǝ ɓa kaɗan ɓong maaso, nga ɓaa nyorsǝ me, “Ankundi yaande yǝ maa ma ɓet ɓǝ san,” Ɗǝm, “Hana yamni yaa yǝ yarsǝ ɗǝnda Ankundi yaande ra, tomon ɗaɗ yǝ lee tentenato usu.”

²⁰ A ɗur kwang wa mbusa kǝn sem azurfa ma zinariya maɗ ra, pa ma mbu ɓaa sǝksǝ ma ngwate ma honta ɓa, pera ǝn u tinima kwalari wa, pera ǝn tomsǝ tinima maɗ.

²¹ Nsaad yaa yǝ hiksǝ ee usu a mbu sam yaɓ ra ɓa, ɓaa ka ti me a tom tinima yaɓ me u An taanda isi wa, yǝkǝ nkaa yǝ tom hana kamǝra tinima na wa u yaɓ.

²² A tom mǝbmǝb ma ɗeura u pepeto ra, a kweetǝ ngǝ tom kaɗo keke a wiiyo a Kaa ni wa, ma na ɓongtǝra wa, ma yauta ma naupa, ke ma ɓaa ɓǝn yarsǝ a ɗǝnda Ankundi yaande ra a kuɗa pengpeng ra.

²³ A tom mǝbmǝb ma renǝta u sem yaɓ ra wa, ma u ǝn wosǝ ma hautǝma wa, me ngǝ maan ǝn wo ma kito.

²⁴ Ɗǝm hoora Ankundi yaande ra yǝn kong nga kiito ra, para yǝ kaɗ yaɓ ma ɓeta nsaad, pa yǝ nkaa yǝ fǝɗkǝ, ɗǝm yǝn tom an nfiima ya ra.

²⁵ Yǝ fǝɗkǝ ɓaa ɓǝn yausa ra ɓa nlaa, ma senda me Kaa kiyǝ ɓǝ paki me ɓǝ kon nfaata ɓǝ kang ɓaa maa ɓongtǝra,

²⁶ pa ndiira me ɓǝ kang a senta ɓora, pa ɓǝ taa noo a wiita Shetan yǝ ma ɓǝsǝ ma siso wa, me ɓǝ ɓǝɗ mbu yǝn taasǝ ɓa.