Likarkar rabte Bulus yǝ nyorsǝ Timotawus wa 1 - Lala NT

¹ Likarkar wa fiɗ a Bulus ɓahone Krisiti Yeso yani yaa yǝ taasǝ yawo lau Kaa ya. Kaa yǝ timinǝ me nǝ nkee waa huurtu wa u yǝsǝ ɗaan a Krisiti Yeso ni wa.

² Nǝn nyor ngǝ Timatawus auwane nǝn taasǝ ya. Lee kwasira ma nyorataara ma naupa u fiɗsǝ a Kaa ni Paapa ma Krisiti Yeso Ankundi yaande yǝ kaɗ ke ma ngase.

Ngǝ kura ɗuura waara ra

³ Nǝ hima Kaan, yaa nǝn tomsǝsǝ tinima ya, nga sirta ɓǝna ɓǝ tomsǝ wa, ma kuɗa fin, nga fer nǝn dimsǝ ma ngiinga a kǝnara na pǝrta ma kaa wa.

⁴ Me nǝ dimma kǝlkǝlta nga nǝn, ǝn tǝnǝ me nǝ ngǝ wǝrǝ, me nǝ kung ma kuɗa pengpeng ra dem.

⁵ Nǝ ɗimin ma na ɓongtǝra u teno nwaango wan, kamǝra na ɓongtǝra wa, u kǝkaange Loyis ma maange Yunis ɓǝsǝ ma siso wa, nǝ maan me ngǝma siso kǝn.

⁶ Me maaso nǝn ɗim ngǝ me a tom tinima Kaa na ngǝsǝ ɓa ɓong, a fer nǝ ti ngǝsǝ neme u saltǝra wa.

⁷ Me Kaa yǝ na ndǝ wis kokto wa ra, pa wis ma kwangto wa, ma yauta ma u kura handa wa.

⁸ Me maaso ngǝ kura ɗuura nwaara ngǝ nkee mara Ankundi yaande wa ra, hana ɗuura nwaara na me ɓaa neunǝ men saase wa. Pa a kaɗ ke ma niina ɗaan a kongsa men Mara Kwalari ra, ma lau kwangto Kaa wa.

⁹ Yǝ konnkweera yǝ ndǝ yar a kaɗo Wis ɗekɗek wa, sem me ndǝ tom mbuka kera, pa men mbu yǝn taasǝ ɓa ma kwasira ira. Kwasira ra ɓaa na ndǝ a Krisiti Yeso ni si ɓa mar put ntaandi wa ra,

¹⁰ pa waso ɓaa weɗan a talte ma lau wo an kon nkweera yaande, Krisiti Yeso, yaa yǝ muɗkǝsǝ woɗɗa yaa wo ma huurtu ya. Ɗǝm ma lau Mara Kwalari ra yǝ weɗa ndǝ kaɗo u feɗ ɗa ra wa, a talte.

¹¹ Men Mara Kwalari ra ɓaa taunǝ me nǝ kaɗ eɗ nkee mara Kaa ra ya, ma ɓahone ma malǝm.

¹² Ən mbu kwaasǝ nǝn weesǝ kongsa nga nǝsǝ wa. Pa nding waso ɗuura nwaa na ra, me nǝ maa yaa nǝn nasǝ ɓongtǝra a sani yan, ɗǝm nǝ yauwan kiya nkaa yǝnǝ war mbu yǝ nanǝsǝ ɓa a wo a kaa sǝsa.

¹³ A ma fǝɗkǝra ra u yaɓ ma lau na ɓongtǝra wa, u ngǝ kurasǝ a nani wa, ma na ɓongtǝra wa, ma yauta a Krisiti Yeso ni.

¹⁴ A war fǝɗkǝra yaɓ u ɓaa ti ngǝsǝ a nema sǝnga wa, a war ma kwasira u Wis Kaa wa yǝsa a dani wa.

¹⁵ Ngǝ maan me hanan yamni a put Asiya wa yǝ kǝrtǝnǝ ndiiran, nsaad ma Faijelus ma Hamojenis.

¹⁶ A lee Ankundi yaande yǝ weɗa nyorataara a taanda Onesiforus ra, me nfee yǝn naa nǝ nkwiiti, ɗǝm yǝ kuraa ɗuura nwaara me nǝ ma sakla ra.

¹⁷ Pa tomsǝ maaso wa, fer yǝ kansǝ Roma wa, yǝ kǝrnǝ ma kongsa pa yǝ wǝrǝ.

¹⁸ A lee Ankundi yaande yǝ waando me Onesiforus yǝ taa nyorataara a sani a kaa feɗefeɗe ɓa! Ngǝ maan me yǝ kwasi ni dem a ɗǝta ɓolɓol a fer nǝsǝ Afisa wa.