Likarkar ntiiri Bulus yǝ nyorsǝ Timotawus wa 4 - Lala NT

Fǝɗkǝra u paara wa

¹ Wis Kaa wa yǝ wee nkeen a talte me a tǝro feɗefeɗe wa, ɓaata ɓǝkǝ lee na ɓongtǝra ɓora ɓǝ ɓǝɗ wisa nlaata sa, ma mbu nsaamse yǝn fǝɗkǝ ɓǝsǝ ɓa.

² Kamǝra fǝɗkǝra kara, ǝn fiɗ a ɓaa ma ɗǝlmara raɓ ɓa, ma ɓan nlaata ɓa, ɓaa senta ɓota yabta woɗɗon, nga ɓaa kǝɗ ma mɓaa u fiɗsǝ a ara wa.

³ Ɓǝn saa ɓeta me ɓǝn kon toona ra, ɗǝm ɓǝn ti ɗat me ɓǝ se fera mbuseya ra, u Kaa yǝ marsǝ me ɓaa ɓǝ nasǝ ɓongtǝra ɓa ɗǝm ɓǝ maa ɓongtǝran me ɓǝ kon ma himara.

⁴ Me mbu Kaa marsǝ ɓa nsaad kwalari, me maaso ndǝ ɓisi hana mbusa nsaad da me ndǝ kon ma himaran,

⁵ me tom mbu ɗekɗek ɓa ma lau mara Kaa ra wa ma kǝnara.

⁶ Me ngǝ nkee mbusǝsa ɓaata ɓǝnga ɓan ɓǝɗ Yeso ɓan, ngǝ kaɗ an tom tinima kwalari Krisiti Yeso ma, u ɓaa mbar a mara ɓongtǝra ra ma fǝɗkǝra u yaɓ ngǝn ɓǝɗsǝ wa.

⁷ A tom mǝbmǝb ma tikaa u sem u Kaa ra wa, a tom tikaa u hautǝma wa ra, pa me maaso a fǝɗkǝ ee nwango mbuka tǝǝ Kaa ɓa.

⁸ Me fǝɗkǝra nyaa maabiri wa yǝma kwasira, pa kaɗo a tǝǝ Kaa wa faɗ kwasira nsaad nǝn, hana ma lau nawa, me yǝn wo ma huurtu ete a kaɗɗo ntaadiwa waso wa ma ɗǝm u ka wo a wiiyo wa.

⁹ Mara ra ǝn ɓongtǝra, pamman hana yam ni yǝ kon ma kuɗa fin.

¹⁰ Ən mbu kwaasǝ ndǝ tom tinima ndǝ kweetǝ ɓa, me ndǝ ti kango a Kaa ni yaa ma huurtu ya, yaa yǝn konsǝ nkweera ɓeta nsaad ya, nga ɓaa ɓǝ nasǝ ɓongtǝra ɓa.

¹¹ A ti ɓeta ɓǝ ɓǝɗǝ, ɗǝm ngǝ fǝɗkǝ mbu ɓa.

¹² Ngǝ lee yaake yǝ ngǝ tǝblǝ me ngǝn auwe ra, pa ngǝ kaɗ mbu fǝɗkǝra ɓa a ɓaa nasǝ ɓongtǝra ɓa, ma lau mara ngǝn kansǝ ra, ma mbu ngǝn tomsǝ nsaad ɓa, a yauta, a na ɓongtǝra wa, ma ɗekɗek to.

¹³ Ndub me nǝ won, a tomaa kau likarkar Kaa wa a ɗaaso ɓeta wa, ngǝ ɓǝ nkee mara Kaa ra ngǝ ɓǝ fǝɗkǝ ɗǝm.

¹⁴ Ngǝ roo seu ma naa mbu Kaa na ngǝsǝ u yǝsǝ a ngani wa ra, ma lau mara Kaa ra kansǝwa fer wiina kwausǝ ɓǝ ngǝ ti nema ɓosa wa.

¹⁵ A kweetǝ ngǝ na ɗuura nga, ngǝ tom mbu ɓa, me hanan yamni yǝ wǝr se wiiyo wango.

¹⁶ A tomaa nhii nwa wa ma siko wango ma fǝɗkǝra ngǝn fǝɗkǝsǝ ra. A se wiiyo ma tomo maaso wa, kǝngǝ ta konnkweera ee wango ma ɓaa ɓǝn kura ngǝsǝ ɓa ɗǝm.