Likarkar ntiiri Bulus yǝ nyorsǝ Timotawus wa 2 - Lala NT

Mara a Kǝnara ra.

¹ Ntiiri nǝ kǝna ngǝ, me a tom kǝnara men ɓeta nsaad. A nǝɗ a ɗaaso ɓeta ma Kaa wa a kǝnara, yǝɓǝ kwasi, ɗǝm aa na himara men ɓeta nsaad

² ma kuɓsa ma ɓa ɓǝsǝ ma kwangto ɓa, me ndǝ kaɗ hurhur ma kaɗo yaɓto wa, ma kokto Kaa wa ma ɗekɗek to a mbusa nsaad.

³ U nwa kwalari, ɗǝm ǝn tǝǝ Kaa an kon nkweera yaande,

⁴ yaa yǝn yausǝ me ɓeta nsaad ɓǝ taa konnkweera wa, dem ɓǝ wo ɓǝ maa ɓongtǝra.

⁵ Kaa yǝ fin ɗǝm yaa yǝsǝ a ɗaaso Kaa ma ɓeta ya fin, ǝn Krisiti Yeso,

⁶ yaa yǝ nasǝ ee usu men ɓeta nsaad ya, waan siso ɓongtǝra u ɓaa weɗasǝ a fer ǝn taasǝ wa.

⁷ Wan mbu kwaasǝ ɓaa tau nǝsǝ me nǝ kaɗ an nkee mara Kaa ra ya ma ɓahone, nǝn nkee ɓongtǝra, nǝn kanaa para ra. Kaa yǝ timinǝ me nǝ fǝɗkǝ ɓaa ɓǝn Yahudawa ra ɓa, a ɗuura mbu ndǝ yausǝ ɓa, u isi ma lau na ɓongtǝra wa.

⁸ Nǝn waando me parata hana na ɓǝ nik nema ɗekɗek ɓosa a kǝnara, semma nfiima hana renǝta ra.

⁹ Nǝn waando me toona ɓǝ tung mbusa u pamsǝ a tung wa, u yǝsǝ a ɗǝɗa wa ma lukta u keke a tung wa, ɓǝn luu mbusa kwang a ɗuura ra, ma mbu ɓa werkǝsǝ ma zinari ɓa ra, hana lukta u koɓa dem wa ra,

¹⁰ pa ma tinimsa yaɓsa, u pamsǝ ma toona ɓaa ɓǝn hiyasǝ Kaa ɓa.

¹¹ Toone yǝ fǝɗkǝ mbuka ma seuto ma na mbarta wa.

¹² Nǝ waando me toone yǝ fǝɗkǝ ra hana yǝ kaɗ kwang a ɗuura parara ra, yǝ kaɗ seu.

¹³ Me Adamu ɓaa marsǝ a ntiiri, pa a mar Hawawu.

¹⁴ Ɗǝm ɓaa nlaa Adamu ra, ɓaa nlaa toone kaya pa yǝ tom mbu tentena ɓa.

¹⁵ Pa toona kǝ ɓǝ taa konnkweera wa ma lau haa emba wa, me ɓǝ se wiiyo ma kaɗo ma lau na ɓongtǝra wa ma yauta ma ɗekɗek to ma ma ɗuura wa.