Titus 3 - Lakota Portions

Iṫaċaƞ Ki Wic̄alapi Ki Tokel Igluhapi Kte

¹ Oyate niṫawa ki kiksuyewiċaya yo: Tuwa oyate ki iwaƞkal wowaṡʹake yuhapi ki hena ahowiċaṗapi kte. Anawiċaġoptaƞpi kte. Eṡʹeyaṡ ohiƞniya takuƞl waṡteya eċuƞpi kta uƞ igluwiƞyeya uƞpi kte.

² Tuweni wiċayaṡic̄api kte ṡni. Ahoyekiċiyapi kte ṡni. Tuwe ki iyuha ob taƞyaƞ uƞpi kte na waḣwayela opiicʹiyapi kte.

³ Ehaƞni uƞkiṡ-eya waċiƞuƞṫaƞkapi ṡni waƞ hehaƞ waanauƞġoptaƞpiṡni, wiċaṡaṡniya opiuƞkicʹiyapi, na taku iyeċetuṡni hena kaṡkauƞyuzapi, woiyokipi ec̄ela uƞkolepi. Taku ṡic̄e ki hena uƞkokaḣtaƞpi uƞ ṡilwiyukc̄aƞyaƞ uƞkʹuƞpi. Waoyusiƞkapi ki ogna uƞkigluhapi na tuwe ki iyuha ob iwaḣteuƞkiċilapiṡni.

⁴ Tuk̇a hehaƞ Wak̇aƞṫaƞka Niuƞyaƞpi uƞkiṫawapi ki ṫawowauƞṡila na ṫawowaṡte ki gluaṫaƞiƞ.

⁵ Takuni waṡteya eċuƞkʹuƞpi ṡni tk̇a iye ṫawowauƞṡila ki uƞ niuƞyapi. Wak̇aƞṫaƞka ṫawoniya wowaṡʹake ki uƞ piya uƞṫuƞpi iyeċel uƞċaƞtepi ki uƞyueċetupi.

⁶ Wak̇aƞṫaƞka Jesus Christ mak̇a wiċoni el hiyuye, he Woniya-Wak̇aƞ ki uƞkʹupi.

⁷ Jesus ṫawowauƞṡila ki uƞkikipipiṡni eyaṡ, uƞṡiuƞlapi uƞ he yuhauƞkiyapi. Na Wak̇aƞṫaƞka ṫawauƞkiyapi ċa wiċoni oihaƞke wanic̄a ċa u kte ki he aṗe uƞkʹuƞpi.

⁸ Wonaḣʹuƞ ki le ataya heċetu. Wouƞspe ki lena woilake waṡte na iyuha uƞkiwaṡtepi kte. Oyate ki iwaṡtepi kta uƞ lena iyuha yuhapi kta iyowiċayapaṡtakiƞ kte, heċel tuwe ki iyuha Wak̇aƞṫaƞka wic̄alapi hena wiċoḣʹaƞ waṡteṡte eċuƞpi kte.

⁹ Eyaṡ ṫuƞkaṡilawiċauƞyaƞpi kʹuƞ eċiyataƞhaƞ witkoya waakinic̄api, na wawikipajiƞpi, na Moses ṫawooṗe akinic̄api hena etaƞ iṫehaƞ nigluha kte. Lena takuni iwiċawaṡte ṡni na otuyaċiƞ iwoglakapi.

¹⁰ Etaƞ woṡic̄api ec̄ela slolyapi hena waƞji naiƞṡ nupa akigle iwahowiċayayiƞ. Hehaƞl awiċaluṡtaƞ kte.

¹¹ Ṫawaċiƞpi ki kaptaƞyaƞpi uƞ taku ṡic̄a eċuƞpi hena iye icʹiglaṡic̄api ki aṫaƞiƞ.

Wiċayawaṡtepi

¹² Artemas e naiƞṡ Tychicus hiyuwiċawayiƞ kte. Watohaƞl tuktuma hi kihaƞ, Nicopolis el atamayayiƞ kte. Hel waniyetu opta wauƞ kte micʹiċuƞze.

¹³ Tohaƞl Zenas wakiya wiċaṡa ki e na Apollos iyayapi kta igluwiƞyeyapi kihaƞ tohaƞ oyakihi hehaƞya owiċayakiyiƞ kte, heċel takuni ikaċaƞpi kte ṡni.

¹⁴ Crete el Iṫaċaƞ wic̄alapi hena iƞṡ-eya taku waṡte eċuƞ pic̄a hena wilagicʹiyapi kta iyeċetu.

¹⁵ Tona mic̄iċapi hena iyuha nape niyuzapi. Tona ok̇olakiċiye wak̇aƞ oṗapi hena nape wiċauƞyuzapi. Iṫaċaƞ Jesus taƞyaƞ niyuhapi kta waċewakiye. Heċetu welo.