Titus 2 - Lakota Portions

Wowaṡte Eċuƞpi

¹ Tuk̇a niye taku wouƞspe owoṫaƞla ki he ec̄ela iwoyaglakiƞ kte.

² Wiċaṡa ki hena waḣwayela opiicʹiyapi kte, blesyahaƞ ċaƞte kicʹuƞyaƞ uƞpi kte na itomni icʹiyapi kte ṡni. Wowic̄ala na wowauƞṡila na wowaċiƞye ki hena waṡʹagya gluhapi kte

³ Wiƞyaƞ ki iƞṡ-eya Iṫaċaƞ yuonihaƞpi aiyeċelya opiicʹiyapi kte. Waaiyapi kte ṡni na itomni icʹiyapi kte ṡni. Taku heċetuḣc̄a ki hena wauƞspewiċakiyapi kte,

⁴ heċetu kihaƞ wik̇oṡkalaka hena iƞṡ-eya hiƞgnaṫuƞpi na ċiƞc̄api tiwahe iyokipiya wiċagluhapi kte.

⁵ Wik̇oṡkalaka ki hena iyohila ksapapi na wauƞṡilapi kte, nakuƞ taƞyaƞ tiognaka kiċuwapi kte, na hiƞgnaku ṫokahewiċakiyapi kte. Heċetu kihaƞ tuweni takuni Wak̇aƞṫaƞka ṫaoiye ki yaṡic̄api okihipi kte ṡni.

⁶ Iyeċelya, k̇oṡkalakapi ki hena waċiƞṫaƞkapi kte.

⁷ Ohiƞniyaƞ iwiċalaksapiƞ kte. Na taku wiċoḣʹaƞ waṡte ki he ognayaƞ nigluha na ċaƞte kicʹuƞyaƞ wauƞspewiċayakiyiƞ kte.

⁸ Woiye eya uƞ wauƞspewiċayakiye ki hena taƞyaƞ yaglaḣniġiƞ kte, heċel tuweni woiye niṫawa ki hena yaṡic̄a okihi kte ṡni. Leċanu kihaƞ etaƞ el iniglepi hena iṡtelicʹiyapi kte.

⁹ Tona wayaka wiċayuhapi hena iṫaċaƞwiċayapi ki anawiċakiġoptaƞpi kta, na taku owasʹiƞ waakinic̄api wanil iyokipiwiċayapi kte,

¹⁰ naiƞṡ awiċawamanupi kte ṡni. Taku iyuha owoṫaƞla igluhapi na waċiƞwiċayapi okihipi kta. Heċetu kihaƞ tuwe ki iyuha Wak̇aƞṫaƞka Niuƞyaƞpi eċiyataƞhaƞ wouƞspe ki le yuonihaƞpi kte.

¹¹ Wak̇aƞṫaƞka ṫawowauƞṡila ki kpazo, oyate ki wiċoni wiċakahi ki he ṫaƞiƞyaƞ wauƞyaƞkapi.

¹² Mak̇a wiċoni el uƞkʹuƞpi eċuƞhaƞ, taku ikc̄eya uƞ uƞnipi kte ki hetaƞ uƞkigluḣlayapi kte, na e wiċoni waṡte na owoṫaƞla ki hena ogna uƞkʹuƞpi kte.

¹³ Wak̇aƞṫaƞka Niuƞyaƞpi ki woiṫuƞṗeya Jesus Christ ogna iyojaƞjaƞicʹiye, ake ku kta waċiƞyekiya aṗe uƞkʹuƞpi.

¹⁴ He uƞkiyepi uƞ icʹicʹu heċel taku ṡic̄aya iyopte ki hetaƞhaƞ yuḣeyab uƞkic̄upi ċiƞ ki heuƞ. Wak̇aƞṫaƞka ṫaoyate heuƞċapi heuƞ ċaƞte kicʹuƞyaƞ ni uƞkʹuƞpi kta.

¹⁵ Lena uƞ wahokuƞwiċayakiyiƞ kte na niṫawowaṡʹake uƞ laoṫaƞiƞ kte. Oyate ohaƞ taƞyaƞ yauƞ haƞtaƞṡ iƞṡ-eya ahoniṗapi kte.