Titus 1 - Lakota Portions

Paul Titus Wowapi Kiċaġe

¹ Wayaka iyeċel Wakaƞṫaƞka ṫawowaṡi ki, na Jesus Christ ṫawahoṡiye ki, le Paul miye. Wak̇aƞṫaƞka ṫaoyate ṫawowic̄alapi ki waṡʹakapi na taƞyaƞ okaḣniġapi kte na heuƞ owoṫaƞla uƞpi kta ċa wowapi wakaġe.

² Heċetu kihaƞ Wak̇aƞṫaƞka wiċoni oihaƞke wanic̄e waƞ iwahowiċaye kʹuƞ he yuhapi kte. Iċiƞ Wak̇aƞṫaƞka ṫaoiye ki tohiƞni gluṡna ṡni.

³ Wak̇aƞṫaƞka aƞpetu waƞ kaḣniġe ki hel oyate ki ṫawahokuƞkiye ki onaḣʹuƞwiċawayiƞ kte. Wak̇aƞṫaƞka Niuƞyaƞpi uƞkiṫawapi ki leċel yaoṫaƞiƞ maṡi.

⁴ Titus, wowic̄ala uƞkiṫawa uƞ takuċiye. Wak̇aƞṫaƞka Ateuƞyaƞpi, na Jesus Christ, Wanikiya uƞkiṫawapi ki, wowaṡte, na wowauƞṡila, na wookiye k̇o, nic̄u nuwe.

⁵ Crete wita hel aċiyuṡtaƞ heċel wowaṡi waƞ uƞyuṡtaƞpiṡni ki he eċanu na taku iyeċetuṡni kʹuƞ hena lueċetu kte. Na oċic̄iyake waƞ he iyeċel oṫuƞwahe he ki hena el ok̇olakiċiye wak̇aƞ ki etaƞ iyohila oiṫaċaƞ wiċayakaḣniġiƞ kte.

⁶ Wiċaṡa eya oiṫaċaƞpi kta wiċayakaḣniġe ki hena taƞyaƞ igluhapi kte na kiċiyuzapi ki he ahokiṗapi kte. Ċiƞc̄a ki hena iƞṡ-eya Iṫaċaƞ Jesus wic̄alapi na ihakab uƞpi kte. Na wanaḣʹuƞpi kte, heċel takuni ṡic̄a awiċayauƞpapi okihipi kte ṡni.

⁷ Ok̇olakiċiye wak̇aƞ oiṫaċaƞpi hena Wak̇aƞṫaƞka ṫawowaṡi heċapi, heuƞ taƞyaƞ igluhapi kte na ċaje igluṡic̄api kte ṡni. Oiṫaċaƞċaƞpi kte ṡni naiƞṡ oċaƞzek̇okelapi kte ṡni. Nakuƞ itomniicʹiyapi kte ṡni naiƞṡ iṡiƞkc̄iƞ waokuwapi kte ṡni naiƞṡ mazaska ec̄ela awaċiƞpi kte ṡni.

⁸ Eṡʹeyaṡ wiċaṡa ṫokec̄api hena taƞyaƞ wiċakuwapi na uƞṡiwiċalapi kte. Na lena iyokipiya eċuƞpi kte. Na naġiksabya uƞpi na owoṫaƞla waokuwapi na Wak̇aƞṫaƞka awaċiƞyaƞ uƞpi, na waċiƞṫaƞgya igluhapi kte.

⁹ Wowahokuƞkiye waƞ uƞspekiyapi ki he sutaya gluha kte, heċel awowahokuƞkiye ki he iƞṡ-eya oyate ki iwaṡtepi kte. Na etaƞ kipajiƞpi ki hena igluwiċak̇api okihipi kte ṡni na iwiċayaksapapi kte.

¹⁰ Wiċaṡa ota wooṗe itok̇apiṡni, na otutuyaċiƞ woglakapi uƞ ota wiċayuhomnipi. Jew oyate ki etaƞ Jesus wic̄alapi ċiƞpi ki hena kakiṡwiċayapi.

¹¹ Eyaṡ leċel iċiḣmiya wiyukc̄aƞpi ki hena wiċayuinilapi kte. Mazaska ec̄ela ċiƞpi uƞ tiwahe alataya owiċayujujupi, le heċetu ṡni.

¹² Crete oyate ki etaƞhaƞ wokc̄aƞ wiċaṡa waƞ leċel eye, “Crete oyatepi ki ohiƞniya owak̇aƞk̇aƞpi sʹa. Taku iyuha iṡic̄awaċiƞpi na uƞċihipiṡni. Wamak̇aṡkaƞ iyeċel waṫoglapi na wotapi kte ki ec̄eyela awiyukc̄aƞ uƞpi.”

¹³ Taku eya wokc̄aƞ wiċaṡa ki eya waƞ hena heċetu. Ċa hena waṡʹagya iyoṗewiċayayapi kte, heċel ṫawowic̄alapi ki waṡʹakiƞ kte.

¹⁴ Ohuƞkakaƞ ehaƞni eya woimaġaġa uƞ oyakapi, hena wowiċak̇e iyeċel oyakapi kte ki he heċetuṡni. Na etaƞ iyuƞk̇ala taƞyaƞ wiyukc̄aƞpi ṡni eyaṡ woglakapi hena anawiċaġoptaƞpi ṡni yo. Lena oyate ki wowiċak̇e ki wic̄alapi ṡni.

¹⁵ Tuwe ċaƞte waṡteya uƞ ki he taku iyuha waṡteya waƞyaƞke. Eyaṡ tuwa ṫawaċiƞ ṡic̄api ki hena ṡilya opiicʹiyapi na takuni waṡte waƞyaƞkapi okihipi ṡni. Tuwa heċel aigluṡtaƞ ki he ṫawaċiƞ ihaƞgkiye.

¹⁶ Oyate ki hena Wak̇aƞṫaƞka slolyapi keyapi, eyaṡ tokel ṫawiċoḣʹaƞ na tokel woglakapi ki hena iċiṫogya igluhapi. Lila ṡic̄api. Wak̇aƞṫaƞka oiye ic̄upi ṡni na takuni ikipipi ṡni yelo.