Philemon 1 - Lakota Portions

¹ Paul, Christ Jesus ṫaƞtaƞhaƞ uƞ kaṡka gƞakapi ki he ena Timothy, he suƞkawiċayapi ki he waƞji, kiċi wowapi ki le wakaġe. Philemon, eċiƞ Woṫaƞiƞ Waṡte ṫaƞtaƞhaƞ wowaṡi eċuƞ ouƞyakiyapi ki heuƞ teuƞniḣilapi,

² ok̇olakiċiye wak̇aƞ ki yati el ṡna mniċiyapi sʹa ki hena uƞ nakuƞ wowapi ki le uƞkowapi, nahaƞ nakuƞ Apphia he iƞṡʹeya Christ Jesus wiċala, ena Archippus he akiċita sʹe Woṫaƞiƞ Waṡte ki nakiċijiƞ.

³ Ate Wak̇aƞṫaƞka na Iṫaƞċaƞ Jesus Christ niyawaṡte na okablalya uƞniċiyiƞ kte!

Philemon's Ṫawowauƞṡila na Ṫawowiċala

⁴ Philemon, tohaƞl waċewakiya ċaƞ ċiksuye, na Wak̇aƞṫaƞka piwakila.

⁵ Iṫaƞċaƞ Jesus wiċayala ki he e na tokel Wak̇aƞṫaƞka ṫaoyate ki uƞṡiwiċayalake ki he onaċiḣ'uƞ.

⁶ Wowiċala uƞkiṫawapi ki he uƞyuwaƞjilapi ki uƞ woyawaṡte uƞkiċupi ki hena iyuha taƞyaƞ uƞkokaḣniġapi uƞkokihipi kte.

⁷ k̇ola, ċaƞtouƞyagnakapi ki he ċaƞtewaṡtemayaye na blihelmayaye lo. Nahaƞ Wak̇aƞṫaƞka ṫaoyate ki ota waṡagwiċayaye.

Paul Philemon Kiċi Onesimus Iwoglakapi

⁸ Christ wookiye makʹu ki heuƞ leċel iċiyaksapapi owakihi.

⁹ Eyaṡ iyeṡ iyotaƞ uƞnilapi ki uƞ leċel waċiṡi kte. Han, waƞji Christ uƞ kaṡka yaƞke ki he,

¹⁰ Onesimus oyakiyiƞ kta iwaċiƞċiye! He ċiƞkṡi waye iyeċel ċaƞtowagnake iċiƞ kaṡka make eċuƞhaƞ he Christ el awahi.

¹¹ Ehaƞni he takuƞni ikipi ṡni tk̇a, eyaṡ waƞna he waċiƞuƞyaƞpi.

¹² Onesimus hektakiya hiyuwayiƞ kte ki he ċaƞte mayuṡiċe.

¹³ Lenauƞ kta waċiƞ heċel omakiya okihi kte, Woṫaƞiƞ Waṡte ki oblake uƞ kaṡka make eċuƞhaƞ, niye oṡtaƞ omakiya okihi kte.

¹⁴ Eyaṡ takuƞni eċamuƞ waċiƞ ṡni. Leċel iċaƞteniwaṡte haƞtanaṡ eċel eċuƞwo, na leċel heċuƞnikiyapi keċiƞ ṡni yo.

¹⁵ Tok̇eṡkeṡ Onesimus otohaƞ niḣayab iyaye na ake gli na hehaƞ ohiƞniyaƞ niċi uƞ kta heċetu seċe,

¹⁶ eyaṡ hehaƞ wiċaiju ċola wowaṡi yuhapi kte ṡni, eyaṡ wiċaṡa iyeċel kuwapi kte. He ċanteowagnake, eyaṡ niye he isam waċiƞyayiƞ kte, tuwe ki he Iṫaƞċaƞ ihakab uƞpi ki he waƞji.

¹⁷ Ċa Christ ṫaƞtaƞhaƞ k̇ola mayaye he iyeċel mayaluonihaƞ ki he Onesimus yuonihaƞ yo.

¹⁸ Takuƞl ogluṡiċiƞ naƞiƞs iniċazo haƞtaƞaṡ, oiċazowowapi el ċaje emagnaka yo.

¹⁹ Minape uƞ le wowapi ki wakaġe: PAUL LE MIYE, TAKUNL YAGLUSOTE KI HENA HEKTAKIYA ĊIĊIĊAIJU KTELO. Eyaṡ ektuƞje ṡni yo, miye ċa uƞ Christ el piya wiċoni ki he iyeyaye lo.

²⁰ Ċa, k̇ola, Christ Iṫaƞċaƞyaye ki uƞ, leċa nuƞ ki blihelmayayiƞ ktelo.

²¹ Taku eya le iwaċiƞċiye ki lena na isaƞmya iċamayeċiċuƞ yaċiƞ ki he slolwaye.

²² Nahaƞ ouƞ waƞji miyeċiyuwiƞyeya ki pilamayayiƞ ktelo. Eṡa Wak̇aƞṫaƞka hoyeyakiyapi ki he naniḣ'uƞpi kta eċaƞmi, heċel ake waċiƞyaƞkapi ktelo.

²³ Epaphras iƞṡʹeya Christ Jesus wiċala ki uƞ lel kaṡka yaƞke. Nape niyuzapi keye,

²⁴ Nahaƞ Mark nakuƞ, nahaƞ Aritarchus, nahaƞ Demas, nahaƞ Luke, hena ke wowaṡi eċuƞ omakiyapi.

²⁵ Iṫaƞċaƞ Jesus Christ uƞṡinilapi nuƞwe.