Mark 5 - Lakota Portions

Jesus Wiċaṡa Waƞ Wak̇aƞ Ṡic̄a Ojula Ċa Aṗiye

¹ Jesus e na ihakab-unpi ki Galilee ble ak̇otaƞhaƞ Geresenes mak̇oċe el ipi na

² Jesus wata etaƞ glic̄u haƞ el owiċaḣe etaƞ wiċaṡa waƞ wak̇an ṡic̄a yuha ċa hinaṗe ċa he el hi.

³ Owiċaḣe el uƞ iciƞ, tuweni maza uƞ kaṡka okihi ṡni.

⁴ Si na nape maza uƞ ṗaḣtapi kʹeyaṡ yupsapsake. Na ekta ik̇oyagyapi ki hena akablaska igluṡka he ki tuweni ayuṡtaƞkiya okihi ṡni lila waṡʹake heuƞ.

⁵ Aƞpetu alataya owiċaḣe el na paha iyaza ṡic̄ahowawa omani na iƞyaƞ ogli uƞ kiigluksaksa.

⁶ Kaiyuzeyataƞhaƞ Jesus waƞyaƞke hehaƞl iyayiƞ na Jesus iṫokab ċaƞkpe mak̇agle inajiƞ

⁷ na hoṫaƞka leye, “Jesus, Wak̇aƞṫaƞka iyotaƞ waƞkatuya ċiƞc̄a, tok̇amayauƞ kta hwo? Wak̇aƞṫaƞka caje ki uƞ kakiṡmakiye ṡni yo.”

⁸ Ecanl Jesus hekiye, “ Wak̇aƞ ṡic̄a, wiċaṡa ki le etaƞ hinaṗa yo.”

⁹ Jesus wak̇an ṡica ki iyunġe, “Taku enic̄iyapi hwo? “Wiċota emaċiyapelo. Lila uƞkotapelo.”

¹⁰ Na Jesus lila iċekiye, wak̇aƞ ṡic̄a ki lena mak̇oċe ki letaƞ ḣeyab iyaye wiċaṡi ciƞpi ṡni.

¹¹ Kukuṡe ota hel ik̇aƞyela wokilehaƞpi.

¹² Yuƞk̇aƞ wak̇aƞ ṡic̄a ki Jesus iċekiya, “Kukuṡe ki el yeuƞyaƞpo. Mahel iwiċauƞkiyayapi ktelo.”

¹³ Ċaƞke iyowiƞwiċakiye. Wak̇aƞ ṡic̄a ki wiċaṡa ki etaƞ hinaṗapi na kukuṡe koktaoṗawiƞġe nupa ṫaƞmahel iwiċayayapi. Kukuṡe ki naṗapi na maya waƞkatuya etaƞhaƞ ble el ohiƞḣpayapi na mnitʹapi.

¹⁴ Wiċaṡa eya kukuṡe awaƞwiċayaƞkapi ki naṗapi na oṫuƞwahe na woju wiċaṡa tipi eċel oyakapi. Ċaƞke oyate ki taku tok̇a ki ekta waƞyaƞg hipi.

¹⁵ Oyate ki Jesus el hipi na wiċaṡa waƞ wak̇aƞ ṡic̄a ota ik̇oyaka tk̇a kʹuƞ hel yaƞka ċa waƞyaƞkapi. Taƞyaƞ hakiṫuƞ na tawaċiƞ ki taƞyaƞ iyaye. Wiċaṡa ki k̇okipapi,

¹⁶ heċel tona waƞyaƞkapi ki hena uƞma oyate ki owiċakiyakapi. Wiċaṡa wak̇an ṡic̄a eya ik̇oyake, na kukuṡe ki tokeṡke el tok̇api ki he oyakapi.

¹⁷ Waƞċak mak̇oċe ki hetaƞ Jesus ḣeyab iyaye ṡipi.

¹⁸ Ċaƞke Jesus wata ki ekta mahel k̇iyotake. Hehaƞl wiċaṡa waƞ wak̇aƞ ṡic̄a yuha tk̇a kʹuƞ he Jesus okiyakiƞ na iƞṡ-eya ya ċiƞ keye.

¹⁹ Eyaṡ Jesus wic̄ala ṡni. Eye hekiye, “Tiyata gni na tiwahe niṫawa ki owiċakiyaka yo. Iṫaċaƞ ki tokel eċaniċiuƞ na tokel niċiyuwaṡte ki owiċakiyaka yo.”

²⁰ Heċel wiċaṡa ki he kigle, na ṫaoyate ki owiċakiyake, tohaƞyaƞ wowauƞṡila Wak̇aƞṫaƞka kiyuha ki.

Jairus Ċuƞwiƞtku Ki E na Wiƞyaƞ Waƞ Jesus Ṫaogle Ki Epaṫaƞpi

²¹ Ake Jesus wata waƞ ogna iyotakiƞ na Galilee ble ki iyuweġe.

²² Owaċekiye el iṫaċaƞ waƞ Jairus eċiyapi, ċa hi, na Jesus waƞyaƞke, na iṫokab iḣpeicʹiye

²³ na Jesus pipiya iwaċiƞye, “Miċuƞkṡi cikʹala ki lila wayazaƞ, na tʹa kiyela ċa eyapaṫaƞ ki akisni na ni kte,” eye.

²⁴ Na hehaƞl Jesus kiċi iyaye. Ċa oyate ota k̇o ihakab yapi. Jesus paok̇aƞ ṡniyaƞ aye.

²⁵ He wiƞyaƞ waƞ we hiyu woyazaƞ wan waniyetu wikc̄emna waƞji ak̄e nupa wahehaƞyaƞ yuha.

²⁶ Maza ska ota yuha ki iyuha wapiya wiċaṡa ki awiċayusote eyaṡ tuweni aṗiya okihi ṡni.

²⁷ Wiƞyaƞ ki le Jesus onaḣʹuƞ ċa wicota ahi ki ohan hi,

²⁸ na le iyukc̄aƞ, “Ṫaogle ki ewapaṫaƞ haƞtaƞs asnimayiƞ kte sec̄e.”

²⁹ Ċa iyayiƞ na ṫaogle ki epaṫaƞ, yuƞk̇aƞ we hiyu waƞ he waƞċagna akisni na ṫaƞmahel akisni ki he akibleze.

³⁰ Waƞċagna, Jesus ṫawowaṡʹake ki huƞḣ iyaye ki slolkiye. Jesus iwiċayuƞġe, “Tuwe ċa miṫaogle ki epaṫaƞ hwo?” eye.

³¹ Ihakab-unpi ki ayuptapi, “Oyate ki nipakiyuoṫapi ċa takuwe heha hwo?”

³² Eyaṡ Jesus nahanḣci tuwa heċuƞ ki ole.

³³ Wiƞyaƞ ki slolkiye ċa Jesus iṫokab ċaƞċaƞyela, ċaƞkpe ṗamagle inajiƞ na Jesus taku ki iyuha okiyake.

³⁴ Jesus leye, “Miċuƞkṡi, wowicala luha ki un ċa asniniye, ċa ċaƞte waṡteya gla yo, wana nitaƞyaƞ yelo.”

³⁵ Jesus heya ki walehaƞl Jairus ti etaƞhaƞ hipi, na heyapi, “Iṫaċaƞ ki hehaƞyaƞ naġiyeye ṡni yo, niċuƞwiƞtku ki tʹelo,” ekiyapi.

³⁶ Eyaṡ Jesus el ewiċatuƞwe ṡni, eyaṡ owiċakiyake, “Wak̇okiṗapi ṡni yo, e eye wic̄alapo,” ewiċakiye.

³⁷ Hetaƞhaƞ tuweni kiċi yekiye ṡni, e eye Peter e na James e na James suƞkaku waƞ John e, henakec̄a ob iyaye.

³⁸ Jairus ti el wana ipi, yuƞk̇aƞ Jesus wiċaċeya ċa naḣʹuƞ. Nakuƞ lila wiċahoṫaƞiƞ na iċiyumnahe sʹe ṡkaƞpi ċa waƞyaƞke.

³⁹ Jesus tima iyayiƞ na hewiċakiye, “Takuwe leċeḣc̄i yaṡkaƞpi hwo? Takuwe yaċeyapi hwo? Wak̇aƞyeja ki le tʹe ṡni tk̇a iṡtima ḣpaye,” ewiċakiye.

⁴⁰ Eyaṡ, Jesus aiḣatʹapi ċa iyuha ṫaƞkal iyayewiċaye, na huƞku na atkuku ki, na ṫawouƞspewiċakiye ki hena iwiċac̄u, na wak̇aƞyeja waƞ ḣpaye el tima iyayapi.

⁴¹ Jesus wak̇aƞyeja ki nape el oyuspiƞ na hekiye, “Wiƞċiƞc̄ala! Kikta yo, eṗelo,” ekiye.

⁴² Wiƞċiƞc̄ala ki kikta, na waƞċag mani. Wiƞċiƞc̄ala ki waniyetu ak̄enupa. Iyuha lila waeċuƞ ki le inihaƞpi.

⁴³ Eyaṡ Jesus taku eċuƞ ki le oyake ṡni wiċaṡi, na heye, “Takuƞl yutiƞ kta kʹupo,” ewiċakiye.