Mark 4 - Lakota Portions

Woju Wiċaṡa Wan Ṫaƞtaƞhaƞ Woiyaċin

¹ Galilee ble aglagla Jesus ake wauƞspewiċakiye. Ok̇aƞṡniyaƞ ohomni kawitayapi na lila wiċotapi ċaƞke wata waƞ ogna iyotake. Wata ki mniċokata okaġe na oyate ki ohuta el najiƞpi.

² Wiyaċiƞpi uƞ wauƞspewiċakiye taku ota na lewiċakiye:

³ “Namaḣʹuƞpo! Tohaƞ wiċaṡa waƞ iyayiƞ na woju.

⁴ Woju su mak̇a yublupi el okalahe iċuƞhaƞ, huƞġe ipayeḣya hiƞḣpaye, ċa ziƞtkala ahiyu na ṫebyapi.

⁵ Huƞġe iƞyaƞ ohan mak̇a c̄onala ohan hinḣpaye. Mak̇a mahetuyaḣci iċaġe ṡni ċa su ki oḣ'ank̇oya iċaġe.

⁶ Hehaƞl wi hinaṗiƞ na waiċaġela kʹuƞ ak̇ate, ċa eċiƞ ak̇atin na ohute ki mahetuya iyaye ṡni ċa oḣʹaƞk̇oya napuze.

⁷ Huƞġe su kʹuƞ waptaye ohaƞ hiƞḣpaye, ċa waptaye ki eha iċaġiƞ na wojupi hena paok̇aƞ ṡniye ċa ehaṡ wojupi hena suṫuƞ ṡni.

⁸ Tk̇a huƞġe su mak̇a waṡte el hiƞḣpaye, na wojupi ki iċaġin na naḣca na suṫuƞ. Opawinge isam, samya iċaġe welo.”

⁹ Ċa Jesus heye, “Naḣʹuƞpo, le, nuġe niyuk̇aƞpi heċi haƞ!”

Woiyaċiƞ Ki Taku K̇api Ki

¹⁰ Jesus iṡnala uƞ hehaƞ etan naḣʹuƞpi hena ihakab-unpi ki ob hipi na wiyaċiƞpi hena tanyankel iyunġapi.

¹¹ “Niye woslolye waƞ Wak̇aƞṫaƞka ṫawokiċuƞze ṫaƞtaƞhaƞ nicʹupelo,” Jesus awiċayupte. “Tk̇a uƞma hena, ṫaƞtaƞhaƞ uƞpi ki hena, wiyaċiƞpi uƞ ec̄ela wanaḣʹuƞpelo,

¹² ho ċa, ‘Waƞyaƞkapi na pipiya iwanyankapi kʹeyaṡ takuni ablezapi ṡni; tanyan anaġoptaƞpi na anaġoptaƞhaƞpi kʹeyaṡ takuni okaḣniġapi ṡni, eċiƞ heċuƞpi haƞtaƞṡ, Wak̇aƞṫaƞka etkiya igluhomnipi ki waḣtanipi kʹuƞ hena ewiċakiktuƞjiƞ kta.’”

Jesus Woju Wiċaṡa Wan Ṫaƞtaƞhaƞ Wiyaċiƞye He Yuiyelakota

¹³ Hehaƞl Jesus iwiċayuƞġe, “Le wiyaċiƞye ki oyakaḣniġapi ṡni hwo? Le oyakaḣniġapi ṡni haƞtaƞṡ tohaƞḣc̄i wiyaċiƞye waƞjiḣc̄i oyakaḣniġapi kta hwo?

¹⁴ Su wokalapi na wojupi kʹuƞ he Wak̇aƞṫaƞka ṫawooyake kʹuƞ he e.

¹⁵ Wooyake ki le su eya ċaƞku isakib hiƞḣpaye hena e; lena oyate ki naḣʹuƞpi, tk̇a waƞċagna Wak̇aƞ-ṡic̄a hiyu na wooyake waƞ ojupi kʹuƞ hena yuḣeyab iċu.

¹⁶ Oyate uƞma hena su kʹeya mak̇a ṡic̄a el iḣpeyapi kʹuƞ iyeċec̄api. Wooyake naḣʹuƞpi kʹuƞ hehaƞ waƞċagna iyokipiya ic̄upi.

¹⁷ Tk̇a mahetuyaḣc̄i ic̄upi ṡni, na lila ṫehaƞḣc̄i yuha yapi ṡni. Ho ċa tohaƞl wakiṗapi hantanṡ wooyake le yuṡnapi na waƞċagna enakiyapi.

¹⁸ Oyate uƞma hena su kʹeya waptaye ohaƞ iḣpeyapi kʹuƞ hena iyeċec̄api sʹeleċec̄a. Lena wooyake naḣʹuƞpi hena epi,

¹⁹ tk̇a le wiċoni ṡic̄e, wijic̄a waṡtelakapi, na taku iyuha ċiƞpi sʹa, uƞ ok̇aƞpi ṡni na wooyake kʹuƞ he akaḣpeya ahiyupi, na etaƞhaƞ uƞ takuni suṫuƞ ṡni.

²⁰ Tk̇a wiċoni lel taku ṡice hena na wijica waṡtelakapi he na taku iyuha ċinpi sʹa, lena un wooyake kʹun hena awaċinpi ṡni na akaḣpeya iḣpeyapi na etanhan takuni suṫun ṡni. Eyaṡ huƞḣ wooyake ki naḣʹuƞpi kʹun hena, ic̄upi, na su wayuotapi: Huƞġe wikc̄emna yamni, huƞġe wikc̄emna ṡakpe, na huƞġe opawiƞġe kigle yuotapi.”

Ṗetijaƞjaƞye Waƞ Wakṡiṡkokpa Iyoḣlateya He

²¹ Ho Jesus ake heye: “Tohaƞḣc̄i tuwe ṗetijaƞjaƞye waƞji au na wakṡiṡkokpa naiƞṡ oyuƞke oḣlate egle hwo? Leċel eċuƞ so? Ṗetijaƞjaƞye oegle ki el egle so?

²² Taku naḣma glepi ki yuṫaƞkal ahiyupi kta, na takuḣc̄i akaḣpapi ki hena yublec̄api kta.

²³ Nuġe luhapi heċihan! Naḣ'unpo!"

²⁴ Nakuƞ leċel ewiċakiye: “ Taku nayaḣʹuƞpi ki hena anaġoptanpo! Wooṗe kʹeya un tuwe wiċalasupi ki hena Wak̇aƞṫaƞka inṡʹeya un niyasupi kta na iyeṡ lila suta ktelo.

²⁵ Wiċaṡa waƞ taku yuha ki he isamya wakʹupi kta; wiċaṡa waƞ takuni yuha ṡni ki he taku c̄onala wayuha ki hena ekeyaṡ kipi ktelo.”

Su Iċaġe Ṫaƞtaƞhaƞ Woiyaċinye

²⁶ Jesus iyopteya waeye: “Wak̇aƞṫaƞka ṫawokiċuƞze ki leċel iyeċec̄a, wiċaṡa waƞ mak̇a el su okala iyeċeca.

²⁷ Haƞhepi ċaƞna iṡtime, kikta na aƞpetu opta ṫok̇aƞl ṡkinciye eċuƞhaƞ woju ki suṫuƞ na iċaġe. Tk̇a tokeṡke heċetu kihaƞ slolye ṡni.

²⁸ Mak̇oċe ki eċa wojupi hena iċaḣye na suṫuƞkiye; oṫokaheya ape ki nuṡnuṡyela hinaṗe na hehanl hute ki iċaġin na hehaƞl ehakeḣc̄i suṫuƞ.

²⁹ Tohaƞtu waƞ wojupi ki hena suṫuƞ ki hehaƞl woju wiċaṡa ki hiyu na glak̇an yelo.”

Woju Su Waƞ Ċikʹala Eyapi Ċa Wiyaċinye

³⁰ “ Wak̇aƞṫaƞka ṫawokiċuƞze tokca kʹuƞ unkeyapi kta hwo?” Jesus wiyuƞġe. “Taku wiyaċiƞye uƞkʹuƞpi na uƞyuiyeskapi kta hwo?

³¹ Mak̇asitomniya itimahel el su wan ihaƞkeya ċikʹala ċa oju.

³² Iwatohaƞyaƞ iċaġe na ihaƞkeya ċaƞ ṫaƞka ki he e. Aletka ki lila ṫaƞkiƞkiƞyaƞ ċaƞke ziƞtkala ki ahiyu na oiyohaƞzi ki el wahoḣpi kaġapi.”

³³ Jesus ṫawooyake ki un oyate ki wahokuƞwiċakiye, wiyaċiƞye uƞma ki leċec̄a ota ki uƞ; tona okaḣniġa okihipi kʹuƞ hena owiċakiyake.

³⁴ Wiyaċiƞye ċola wowiċakiyaka ċiƞ ṡni, tk̇a iṡnala ihakab-unpi obtu ċaƞna taku ki iyuha okaḣniḣwiċakiye.

Jesus Oṡic̄ec̄a Waƞ Yuablakela

³⁵ He aƞpetu ki iḣtayetu iċuƞhaƞ Jesus ihakab-unpi ki lewiċakiye, “Uƞkiyayapi na ble ki ak̇otaƞhaƞ uƞyaƞpi ktelo.”

³⁶ Ċa ok̇aƞ ṡni kʹuƞ iḣpeya iwiċayayapi; ihakab-unpi ki wata el iyotakapi, hel Jesus ehaƞni yaƞke, na kiċi iyayapi. Wata uƞma kʹeya nakuƞ hel najiƞpi.

³⁷ Lila oṡic̄ec̄a waƞ woblu hiyu na mnikakiċipehaƞhaƞ hiyu na wata ekta okapsuƞ, ċa mni uƞ ojula tk̇a.

³⁸ Jesus wata ilazataƞhaƞ opiicʹiye, ipahiƞ kiṫuƞ na iṡtime. Yuƞk̇aƞ ihakab-unpi wiċaṡa ki yuḣic̄api na lekiyapi, “Wauƞspekiya, le unṫ'api kte kihaƞ, tok̇ayakiye ṡni hwo?”

³⁹ Jesus najiƞ hiyayiƞ na ṫate ki hekiye, “Waḣwala yo!” na mnikakiċipehaƞhaƞ ki hewiċakiye, “Owaƞjila yaƞka po!” Yuƞk̇aƞ ṫate ki akisni, na lila ablakela.

⁴⁰ Hehaƞtu ċa Jesus hewiċakiye, “Takuwe nihiƞnic̄iyapi hwo? Wowic̄ala ċola nahaƞḣc̄i yauƞpi hwo?”

⁴¹ Ho tk̇a lila wak̇okiṗapi, na lekiċiyapi, “Wiċaṡa ki le tuwe hwo? Ṫate na mni ki ekeyaṡ oiye naḣʹuƞpelo!”