Mark 15 - Lakota Portions

Jesus Pilate Iṫokab Inajiƞ

¹ Hihaƞnaḣċi waċekiye-wiċaṡa-iṫaƞċaƞ ki, kʹaƞ ki epi, an wooṗe ogna wauƞspewiċakiye ki epi, na omniċiye ki ataya, ob inaḣni mniċiyapi, tokeṡke eċuƞpi kte ki he iwoglapkapi. Jesus maza ik̇aƞyaƞpi, na eyayapi na Pilate ekta aipi.

² Ho, hel Pilate ki Jesus wiyuƞġe, “Jew oyatepi ki el iniṫaƞċaƞ hwo?” ekiye. Jesus ayupte, “Ċa, he leyelo.”

³ Waċekiye wiċaṡa iṫaƞċaƞ ki Jesus lila ṡikṡikċaya wiyauƞpapi.

⁴ Ho ċa, ake Pilate Jesus wiyuƞġe, “Lena aluptiƞ kta hwo? Winiyauƞpapi ki hena nakiḣʹuƞ wo!”

⁵ Ake Jesus ayupta ċiƞ ṡni, ċa Pilate lila inihaƞ.

Pilate Wana Jesus Tʹiƞ Kta Yasu

⁶ Tohaƞl wokiksuye woeċuƞ ki hel ṡna Pilate tuwe keeyaṡ wiċayuske oyate ki ċiƞpi ehaƞtaƞṡ.

⁷ Hehaƞ wiċaṡa waƞ Barabbas eċiyapi, ċa hel tona wawihaƞgyapi, ċa hena ob kaṡka yaƞke. Huƞḣ tiwiċaktepi.

⁸ Wana wiċota el ahi, na hena ake takuƞl Pilate iyuƞġapi ki eċel eċawiċakiċiyuƞ kta ċa ahi.

⁹ Pilate iwiċayuƞġe, “Ho, le Jew iṫaƞċaƞ ki bluṡkiƞ kta hwo?

¹⁰ Pilate ehaƞni slolye, le Jesus takuwe ahipi ki, hena wok̇ipajiƞ yuhapi ki uƞ.

¹¹ Eyaṡ, waċekiye wiċaṡa itaƞċaƞ ki, wiċotapi ki lila wiċakihowyapi. Eyaṡ iyeṡ ṫo Barabbas eċa yuṡkiƞ kte.

¹² Ho ċa, ake Pilate wowiċakiyake, “Le wiċaṡa waƞ Jew iṫaċaƞ ki le tokeṡke eċamu kta hwo?”

¹³ “Ċaƞiċipaweġe el otkeyapi kte!” eya ayuptapi.

¹⁴ “Eyaṡ, taku ṡiċaya eċuƞ hwo?” eya Pilate iwiċayuƞġe. Eyaṡ heċena hoṫaƞka heyapi, “Ċaƞiċipaweġe el otkeyapi kte!”

¹⁵ Pilate ċaƞte waṡtewiċaya ċiƞ ċa Barabbas kiyuṡke, na hehaƞl, Jesus kasaksakwiċakiye, na ċaƞiċipaweġa el otkeyapi kta ċa wiċakʹu.

Le Akiċita Ki Jesus Iḣaḣakowapi

¹⁶ Akiċita ki Jesus iċupi na ateya iṫaƞċaƞ ki el aipi, uƞma ki iyuha el wiċayuwitayapi.

¹⁷ Ho, hel ċaƞ waṗeṗe eya iċupi na Jesus nata el okṡaƞ egnakapi na, ogle ṫoṡa waƞ iƞk̇iyapi he ċuƞwiƞyapehe sʹeleċeċa ċa iƞk̇iyapi.

¹⁸ Ho na, iyuha akiċita kiyuwitapi, na hekiyapi, “Jew iṫaƞċaƞ ki le oihaƞke ṡni ni uƞ kte.”

¹⁹ Ċaƞ waƞ nata ki akaƞl aṗapi, na aṫaṡoṡapi, na iṫokab ċaƞṡkeṗamagle inajiƞpi.

²⁰ Iḣaḣapi ki he igluṡtaƞpi, na ogle ṫoṡa ṫawa ki kicʹuƞkiyapi, na hehaƞl yuha iyayapi, he wana ċaƞiċipaweġe akaƞl otkeyapi kta ċa.

Akiċita Ki Wana Jesus Otkeyapi Kte

²¹ Jesus eyapi ki iċuƞhaƞ wiċaṡa waƞ Simon eċiyapi ċa mak̇oskaƞl taƞhan hi, ċa he Jesus okiyekiyapi, ċaƞiċipaweġa ki kiċiyuhakiyapi. (Alexander, na Rufus ki lenauƞs Simon ateyapi, lena oṫuƞwahe waƞ Cyrene eċiyapi ċa hetaƞhaƞpi.)

²² Golgatha eċiyapi, ċa heċi wana Jesus aipi, he “wiċaṗa ṡeċa paha” etu.

²³ Hel mniṡa eya ṗejuta ṡiċa iċahiyapi, na kʹupi kte eyaṡ Jesus yatkaƞ ċiƞ ṡni.

²⁴ Ho na, wana Jesus ċaƞiċipaweġa ki el okataƞpi, na otkeyapi. Ṫahayapi ki kiyuksaksa iċupi, k̇aƞsu ṡkatapi na tuwa ohiye ki he mniḣuha ki haƞke ċiƞ ki he iċu kte.

²⁵ Ho, he mazaṡkaƞṡkaƞ napċiyuƞka, hihaƞna ehaƞl ċaƞiċipaweġa ki el otkeyapi.

²⁶ Jesus taku ṡiċaya eċuƞ ki hena leċuƞsʹe owapi, “Le Jew oyate el Iṫaƞċaƞ.”

²⁷ Nakuƞ, wamanu-wiċaṡa num Jesus iṫaƞnuk otkewiċayapi, uƞma iṡlayataƞhaƞ, na uƞma ki iƞṡ iċatkayataƞhaƞ ki le aik̇oyagyapi.

²⁹ Oyate ki isakib iyayapi na ṗomnamnapi, na taku ṡiċe ki iyuha ekiyapi, “Nahan le tipi wak̇aƞ waƞ lujuju, na aƞpetu yamni ṡnihaƞni ake pawoslal iyeyayiƞ kte kehe seċe kʹuƞ.

³⁰ Wana kul gluċu wo, na niicʹiya yo,” ekiyapi.

³¹ Waċekiye-wiċaṡa-iṫaƞċaƞ Jesus iḣaḣapi he iyeċel iƞṡeyaƞ Wooṗe ogna wauƞspewiċakiye heċuƞpi, na okiċiyakapi, na heyapi, “Ota niwiċaye, eyaṡ niicʹiya okihi ṡni!

³² Wanikiye ki he wauƞyaƞkapi uƞċiƞpelo, Israel el wiċaṡa-yatapi ki he. Ċaƞiċipaweġe ki etaƞ gliċu wo, heċel he wiċauƞlapi ktelo.” Nakuƞ, wamanu-wiċaṡa num otkapi hena k̇o iwiċaḣaḣapi.

Le Jesus Wana Ktepi

³³ Wiċokaƞhiyaye ki walehaƞya mak̇a ki ataya oiyokpaze, na he owaṗe yamni waheċelya heċeċa.

³⁴ Mazaṡkaṡkaƞ yamni ki walehaƞya, Jesus hoṫaƞka hoṫaƞiƞ, na heye, “Ate! Ate! Takuwe amayaluṡtaƞ hwo?”

³⁵ Oyate huƞḣ hel najiƞpi ċa taku eye ki he naḣʹuƞpi, leyapi, “Anagoptaƞpo, Elijah kiċo welo.”

³⁶ Ho ċa, waƞji iyaye, na ċaƞ waƞ mniḣuha aiyakaṡke, na mniṡa ṡiċa el oputkaƞ, na Jesus i el epaṫaƞ, na hekiye, “Hiƞyaƞkapo, iṫo Elijah u, na hetaƞ yuḣpeka.”

³⁷ Jesus hoṫaƞka taku eyiƞ na ehaƞl tʹe.

³⁸ Tipi-Wak̇aƞ el tima mniḣuha waƞ ċokaƞyaƞ naḣleċe.

³⁹ Akiċita iṫaƞċaƞ waƞ ċaƞiċipaweġe ki iyoḣlate waƞyaƞka najiƞ yuƞk̇aƞ he heye, “Aweċak̇eya wiċaṡa ki le Wak̇aƞṫaƞka Ċiƞhiƞtku welo.”

⁴⁰ Hel kaiyuzeya wiƞyaƞ eya waƞyaƞg najiƞpi. Najiƞpi ki hel waƞji Mary Magdalene heċiyapi ċa oṗa, he ċiƞċa ki Joseph, e na Salome, e na hakakta waƞ James eċiyapi, ċa hena Mary ki ċiƞċa.

⁴¹ Galilee el Jesus uƞ ċa hehaƞ wiƞyaƞ ki lehaƞ ihakab uƞpi, lila okiyapi. Nakuƞ wiƞyaƞ eya Jerusalem taƞhaƞ ob Jesus hi, ċa hena nakuƞ el uƞpi.

Le Jesus Ṫaċaƞ Ki Eyupaƞpi

^42-43 Ḣtayetu ktehaƞl Arimathea eċiyataƞ Joseph eċiyapi ki he hi. He omniċiye el wiċaṡa waƞkatuya glawapi. Iƞṡ-eyaƞ he maḣpiya wokikiċuƞze ki ape uƞ he. (Aƞpetu Wak̇aƞ kta, ċa igluwiƞyeyapi.) Ho ċa, Joseph ki le wak̇okiṗe ṡni yiƞ na Pilate iyuƞġe, Jesus ṫaċaƞ ki he iċu okihi heċi iyuƞġe.

⁴⁴ Yuƞk̇aƞ, Pilate Jesus tʹe ki heuƞ lila inihaƞ. Akiċita iṫaƞċaƞ ki kiċo, na Jesus wana tʹa heċi iyuƞġe. Leċala, naiƞṡ ehaƞni.

⁴⁵ Akiċita ki Pilate okiyake ki heuƞ Joseph Jesus ṫaċaƞ ki he iċu kta woiyuwiƞkiye kʹu.

⁴⁶ Joseph iyayiƞ na mniḣuha ska waƞ ṫaƞka oṗeṫuƞ, na heuƞ Jesus opemni, na waƞċak oḣloka waƞ iye kaġa, ċa hel tima euƞpe, na iƞyaƞ waƞ lila ṫaƞka, ċa tiyopa el kuṡeya pagmiyaƞ egnake. Oḣloka ki he ataya iƞyaƞ suta ki heċa.

⁴⁷ Mary Magdalene, e na Joses huƞku waƞ Mary eċiyapi, ċa hena tuktel Jesus euƞpapi slolyapi. Hena waƞyaƞk najiƞhaƞpi ki uƞ.