Mark 1 - Lakota Portions

Ṫawowauƞspekiye Le John Eċiyapi

¹ Le Jesus eċiyataƞhaƞ woṫaƞiƞ waṡte ki heċa.

² Wokc̄aƞ wiċaṡa Isaiah leċel oṫokaheya owa egnake: “Wak̇aƞṫaƞka leċel eye, ‘Waayaṫaƞiƞ waƞji niṫokab hiyuwayiƞ ktelo, ki he oye ki he nic̄iyuġaƞ ktelo.’

³ Tuwa mak̇oskaƞl ekta paƞpaƞ he lo, ‘Iṫaċaƞ ki ċaƞku ki he kic̄iyuwiƞyeyapo, oomani ki kic̄inastopo, heċel taƞyaƞ mani kte.’”

⁴ Ho ċa, John mak̇oskaƞl ekta ṫaƞiƞicʹiye, na mniawiċakaṡtaƞ, na nakuƞ wahokuƞwiċakiye, “Wowaḣtani ki hetaƞ eglakupo,” ewiċakiye, “kihaƞ, Wak̇aƞṫaƞka wowaḣtani hena anic̄iktuƞjiƞ kte,” ewiċakiye.

⁵ Judea mak̇oċe etaƞhaƞ na Jerusalem oṫuƞwahe etaƞ wiċota hena wanaḣʹuƞpi kta ċa John el hipi. Wowaḣtani oglakapi ċa mniawiċakaṡtaƞ, Jordan wakpa ki hetuċa mniawiċakaṡtaƞ.

⁶ John ṫahayapi ki ċuwinuġa ha uƞ kaġapi ċa uƞ, na ṫaha ipiyaka waƞ ṫaƞopta gluwi, nahaƞ, wiċayajipa ṫuƞkc̄e na gnugnuṡka yute.

⁷ Oyate ki wiċakiyaoṫaƞiƞ, “Wiċaṡa waƞ mihakab u kta ċa he misamtu kte. Miye kayeṡ wapaṫujiƞ na haƞkṗaƞ ki weċiyuṡka owakihi ṡni, na heċamu kte ki he imakipi ṡni yelo.

⁸ Mni uƞ mniaċic̄aṡtaƞ, eyaṡ iye Woniya-Wak̇aƞ aglihe niyiƞ ktelo.”

Jesus Mniakaṡtaƞpi na Wawiyutaƞ

⁹ He ohakab watohaƞlya, Jesus Galilee mak̇oċe hel Nazareth oṫuƞwahe hetaƞhaƞ hi. Jordan wakpa ki hel John Jesus mniakaṡtaƞ.

¹⁰ Jesus mniakaṡtaƞpi na glinaṗe ki walehaƞl maḣpiya ki naġaƞ ċa waƞyaƞke, na Woniya-Wak̇aƞ ki wakiƞyela ska sʹe kutakiya u.

¹¹ Na maḣpiya ki eċiyataƞhaƞ wiċaho waƞ heye, “Miċiƞkṡi tewaḣila kʹuƞ he le niye yelo. Na he iyomakpiyelo.”

¹² Woniya-Wak̇aƞ ki le Jesus waƞċagna mak̇oskaƞl etkiya kaḣab aye.

¹³ Ho ċa, Jesus mak̇oskaƞl ekta aƞpetu wikc̄emna topaċaƞ uƞ. Yuƞk̇aƞ Wak̇aƞ-ṡic̄a ki lila iyutaƞ. Wamakaṡkaƞ waṫoglapi ki ohaƞ uƞ, eyaṡ ogligle wak̇aƞ ki el hipi na okiyapi.

Jesus Hokuwa Wiċaṡa Topa Ki Wiċakiċo

¹⁴ John kaṡkapi ċa he ohakab Jesus Galilee ekta i, na Wak̇aƞṫaƞka woṫaƞiƞ waṡte oyaka ċa he oyate ki owiċakiyake.

¹⁵ Jesus hewiċakiye, “Le hehaƞtu kta ṡke kʹuƞ he wana iyehaƞtu welo,” eye, “na Wak̇aƞṫaƞka ṫawokiċuƞze ki wana kiyela yelo. Wowaḣtani etaƞhaƞ igluḣlayapo, na woṫaƞiƞ waṡte ki wic̄alapo!” ewiċakiye.

¹⁶ Galilee el ble ṫaƞka ċa hel aglagla Jesus omanihaƞ, yuƞk̇aƞ hokuwa wiċaṡa eya atawiċaye, Simon e na suƞkaku Andrew kiċi. Lenauƞs hoipaṫe uƞ hoġaƞ owiċayuspapi.

¹⁷ Jesus hewiċakiye, “Mihakab upo! Oyate ċa wiċayuwita uƞspeċiċiyapi ktelo.”

¹⁸ Waƞċagna hoipaṫe agluṡtaƞpi na ihakab iyayapi.

¹⁹ Ektawaṗa yapi yuƞk̇aƞ wiċowekiċiyapi nupa eya atawiċayapi. Yuƞk̇aƞ, henauƞs Zebedee ċiƞc̄a. James na John ewiċakiyapi. Lenauƞs wata ki mahel hoipaṫe ki gluwiƞyeyapi.

²⁰ Jesus waƞwiċayaƞka ċa wiċakiċo; Zebedee ki le ṫawowaṡi eya ob wata ki el ena yaƞkapi, na uƞma ki Jesus ihakab iyayapi.

Wiċaṡa Waƞ Wak̇aƞ Ṡic̄a Yuha

²¹ Capernaum oṫuƞwahe ki hel Jesus e na wauƞspewiċakiye ṫawa ki ob i, na aƞpetu wak̇aƞ ċa omnic̄iye tipi ki hel tima wauƞspewiċakiye.

²² Oyate ki Jesus woglaka ċa naḣʹuƞpi na waeye ki lena uƞ lila inihaƞpi. Wauƞspewiċakiye eya uƞmapi ki hena Jesus iyeċeċapi ṡni, tk̇a Jesus lila waslolya ogna woglake.

²³ Walehaƞl, omnic̄iye tipi ki hel tima wiċaṡa waƞ ṫaƞmahel wak̇aƞ ṡic̄a waƞ uƞ, ċa lila ṡic̄ahoyaya iyaye,

²⁴ na Jesus hekiye, “Takuwe paġeuƞyayapi hwo? Lel yau na ihaƞguƞyayapi kta yaċiƞ hwo? Nituwe ki slolwayelo, Wak̇aƞṫaƞka ṫawaayaṫaƞiƞ wak̇aƞ kʹuƞ he le niye yelo.”

²⁵ Ho ċa, Jesus wak̇aƞ-ṡic̄a ki leċel eċuƞṡi, “Inila yaƞka yo, na wiċaṡa ki le etaƞhaƞ glinaṗa yo,” ekiye.

²⁶ Ċa wak̇aƞ ṡic̄a ki ehake wiċaṡa ki ic̄atʹa yuċaƞċaƞ, na hehaƞl glinaṗe.

²⁷ Oyate ki lila inihaƞpi, na lila iwoglakapi, na heyapi, “Le taku hwo? Le wouƞspe ṫokc̄a ki heċa hwo? Wiċaṡa ki le wowaṡʹake yuha ċa wak̇aƞ ṡic̄a ki taku eċuƞṡi yuƞk̇aƞ eċel eċuƞ.”

²⁸ Ho ċa, le Jesus waeċuƞ ki le tuwekeeyaṡ naḣʹuƞpi Galilee mak̇oċe ki okṡaƞ.

Jesus Oyate Ota Asniwiċaye

²⁹ Jesus iye ċa, James e na John kiċi ob, ċa omnic̄iye tipi etaƞhaƞ Simon e na Andrew tipi etkiya iyayapi.

³⁰ Simon k̇uƞku waƞ k̇ata kuja ċa oyuƞke el ḣpaye, ċa Jesus waƞċagna okiyakapi

³¹ Ho ċa, Jesus el i na wiƞyaƞ ki yunajiƞkiye. Wiƞyaƞ ki k̇ate kʹuƞ he akisni, ċa iyuha wowiċakʹu.

³² Ḣtayetu na wi ki mahel iyaye ki walehaƞl, oyate ki okṡaƞtaƞhaƞ kujapi ki wiċaglohipi, na huƞḣ ṫaƞmahel wak̇aƞ ṡic̄a uƞpi.

³³ Lena oṫuƞwahetaƞhaƞ ahi, na tiyopa ki ataya oḣli sʹe najiƞpi.

³⁴ Ho, hel Jesus tona kujapi ki hena asniwiċaye, huƞḣ ṫaƞmahel wak̇aƞ ṡic̄a uƞpi ċa hena k̇o asniwiċaye. Jesus le tuwe ki slolyapi ċa wak̇aƞ ṡic̄a ki lena taku eyapi kte ki Jesus iyowiƞwiċakiye ṡni.

Jesus Galilee el Wahokuƞwiċakiye

³⁵ Hihaƞni ḣc̄i, wi ki hinaṗe ṡnihaƞni, Jesus kikta na oṫuƞwahe ki hetaƞ iyayiƞ na manil waċekiye.

³⁶ Eyaṡ, Simon ṫak̇olaku ki kiċi Jesus ole iyayapi.

³⁷ Jesus iyeyapi ċa hekiyapi, “Oyate ki onilepelo.”

³⁸ Eyaṡ Jesus awiċayupte, “Oyaƞke iyaza uƞyaƞpi ktelo. Wahokuƞwiċakiyapi kta heuƞ wahi yelo,” ewiċakiye.

³⁹ Ho ċa, Galilee mak̇oċe ki okṡaƞ omnic̄iye tipi ki hena iyaza waƞ wahokuƞkiya omani, na wak̇aƞ ṡic̄a ki kaṫaƞkaliyewiċaye.

Jesus Wiċaṡa Waƞ Asniye

⁴⁰ Wiċaṡa waƞ ḣaƞḣaƞ kujapi eċec̄a ċa Jesus el hi, na kul gliḣpayiƞ, na wookiye kila, “Yaċiƞ haƞtaƞṡ asnimayaye oyakihi yelo,” ekiye.

⁴¹ Jesus wowauƞṡila ojula ċa wiċaṡa ki eyuṫaƞ, na hekiye, “Heċamu waċiƞ yelo,” eya ayupte, “Wana asniċiyelo,” ekiye.

⁴² Wiċaṡa ki waƞċagna akisni.

⁴³ Hehaƞl Jesus wiċaṡa ki le kigle ṡnihaƞni

⁴⁴ hekiye, “Anaġoptaƞ yo! Le tuweni okiyake ṡni yo, eyaṡ le owoṫaƞla gni na waċekiye wiċaṡa waƞji ṫaċaƞ ki iwaƞniyaƞgkiya yo. Leċetu ki iƞṡ-eya slolyiƞ kte. Na Moses tokel eye ki aiyeċel wotuḣʹaƞ kiċaġa yo. Tuwe ki iyuha nakuƞ sloyiƞ kte,” ekiye.

⁴⁵ Eyaṡ wiċaṡa ki le ataya yaoṫaƞiƞ omani. Ċa Jesus paokiyuṫapi sʹa heuƞ oṫuƞwahe hel ṫaƞiƞicʹiya okihi ṡni na ehaṡ manilopiicʹiye. Okṡaƞtaƞhaƞ oyate ki el ahi yelo.