Luke 8 - Lakota Portions

Wiƞyaƞ Eya Jesus Okiyapi

¹ Yuƞk̇aƞ he iyohakab, Jesus e na ak̄e nupapi ki hena ob oṫuƞwahe na ohomni wiċoti iyaza woṫaƞiƞ-waṡte na Wak̇aƞṫaƞka ṫawokiċuƞze ki yaoṫaƞiƞpi.

² Nakuƞ wiƞyaƞ eya huƞḣ wak̇aƞ-ṡic̄a kaṡkawiċayuze na huƞḣ wiċokuje ṡikṡic̄a etaƞhaƞ Jesus apiwiċaye ċa lena oṗapi. Waƞji Mary Magdalene ec̄iyapi. Hektakiya watohaƞl he wak̇aƞ-ṡic̄a ṡakowiƞ kaṡkayuzapi eyaṡ Jesus kiyuṡke.

³ Na Joanna, he hiƞgnaku ki Chuza ec̄iyapi, Herod ṫaomnic̄iye el waawaƞyaƞke heċa. Na Susanna e na wiƞyaƞ ota wakicʹuƞpi. Lena ata iyuha Jesus e na ṫawowaṡi ki owiċakiyapi.

Waiċaḣye Waƞ Wiyaċiƞpi

⁴ Oyate ki oṫuƞwahe ṫokṫokc̄a eċiyataƞhaƞ ahi na haƞkeya lila wiċotapi, Jesus le wiyaċiƞpi ki owiċakiyake.

⁵ “Wiċaṡa waƞ woju iyaye. Owoju-su ki mak̇a el akalala. Su ki huƞḣ ċaƞku aglagla hiƞḣpaye, ċa wiċomani ki su lena anatʹiƞzapi na huƞḣ ziƞtkala ki tebyapi.

⁶ Su ki huƞḣ mak̇a suta na iḣʹe ohaƞ hiƞḣpaye ki lena iċaġe. Eyaṡ mni iyena ic̄u ṡni ċa optelyela iċaġiƞ na waṫoṫo ki ṡnije.

⁷ Na huƞḣ waṗeṗe ohaƞ hiƞḣpayiƞ na oṗeya iċaġe, eyaṡ haƞkeya waṗeṗe ki yutakuniṡni.

⁸ Owoju-su uƞma ki iyuha mak̇a waṡte el hiƞḣpaye, lena e taƞyaƞ iċaġiƞ na etaƞhaƞ suṫuƞ na igluota,” eye. Jesus leċel eyaṡtaƞ, “Ċa le anaġoptaƞpo!” eye.

Wiyaċiƞpi Ṫaƞtaƞhaƞ

⁹ Ihakab-uƞpi ki wiyaċiƞpi le taku ċa k̇a he slolya ċiƞpi, na Jesus iyuƞġapi,

¹⁰ ċa leċel awiċayupte, “Wak̇aƞṫaƞka ṫawokiċuƞze ookaḣniḣṡic̄e he okaḣniḣwaṡteya ċicʹupi, eyaṡ oyate uƞma ki lena e wiyaċiƞpi ogna ec̄ela owiċawakiyaka owakihi. Oyate lena wakita okihipi eyaṡ waablezapi ṡni, wanaḣʹuƞ okihipi eyaṡ okaḣniġapi ṡni.”

Jesus Wiyaċiƞpi Ki Le Ektaḣc̄i Oyake

¹¹ “Wiyaċiƞpi le leċetu: Owoju-su ki he Wak̇aƞṫaƞka ṫaoiye ki e,

¹² Su eya oomani isakibya hiƞḣpaye ki hena oyate eya naḣʹuƞpi waƞ hena epi. Eyaṡ Wak̇aƞ-ṡic̄a ki oyate ki woṫaƞiƞ-waṡte naḣʹuƞwiċakiye ċiƞ ṡni heċel wowic̄ala yuhapi kte ṡni na oihaƞke wanilya nipi kte ṡni.

¹³ Na su eya mak̇a suta na iƞyaƞ ohaƞ iċaġe hena oyate eya woṫaƞiƞ-waṡte naḣʹuƞpi na iyuṡkiƞya ic̄upi eyaṡ wokaḣniġe ṫawapi ki iyehaƞyaƞ mahetuya ṡni ċa wowic̄ala ki akataƞhaƞ iċaġe. Wokakije ohaƞ nipi na haƞkeya aicʹigluṡtaƞpi.

¹⁴ Na oyate eya woṫaƞiƞ-waṡte naḣʹuƞpi eyaṡ mak̇a akaƞ wiyutaƞpi hena su eya waṗeṗe ohaƞ hiƞḣpaye iyeċec̄api.

¹⁵ Na su eya owoju waṡte el hiƞḣpaye ki hena oyate eya woṫaƞiƞ-waṡte ki naḣʹuƞpi na ċaƞlwaṡteya na owoṫaƞla ċaƞteokignakapi. Lena sutaya manipi na wiċoni waṡte ṫawapi.

Ṗetijaƞjaƞ Naḣmapi

¹⁶ “Tuwa ṗetijaƞjaƞ ilekiya haƞtaƞṡ wakṡi-ṡkokpa naiƞṡ oyuƞke iyoḣlal naḣme ṡni. Ṗetijaƞjaƞ ki he ohiƞniyaƞ waƞkal egle, heċel oyate el ipi hena taƞyaƞ waƞyaƞkapi kta.

¹⁷ Takuni anaḣme pic̄a kte ṡni na taku akaḣpapi waƞ hena yuaṫaƞiƞpi kte,” eye.

¹⁸ “Heuƞ taƞyaƞ anaġoptaƞpo! Tuwa wokaḣniġe awaċiƞ na ognayaƞ uƞwaċiƞ haƞtaƞṡ he isam Wak̇aƞṫaƞka ṫawokiċuƞze ki he wokaḣniġe yuhakiyiƞ ktelo. Eyaṡ tuwa wokaḣniġe ki le yuha keċiƞ eyaṡ awaċiƞ ṡni haƞtaƞṡ wokaḣniġe yuha keċiƞ le e kʹeyaṡ gnuni ktelo,” eye.

Jesus Huƞku Ki E Na Suƞkawiċaye Ki

¹⁹ Jesus huƞku ki e na suƞkawiċaye waƞ hena waƞyaƞg hipi, eyaṡ wiċotapi heuƞ ikiyela ya okihipi ṡni.

²⁰ Tuwa Jesus okiyake, “Nihuƞ e na nisuƞkala waƞ hena waƞniyaƞg hipi na ṫaƞkal najiƞpelo,” eye.

²¹ Yuƞk̇aƞ Jesus leċel ayupte, “Oyate eya woṫaƞiƞ-waṡte naḣʹuƞpi na eċel igluhapi ki hena inawaye na suƞkawiċawaye ki iyeċel tewiċawaḣila,” eye.

Jesus Ṫate Na Mni Oṫaja Ki Ablakela Ṡi

²² Aƞpetu waƞ el Jesus e na ak̄e nupapi ki ob wata ogna iyotakapi yuƞk̇aƞ heye, “Iṫo ble ki le k̇oakataƞ uƞyapi ktelo,” eye na iyayapi.

²³ Wata ogna yapi eċuƞhaƞ, Jesus kaiṡtime. Ble opta yapi eċuƞhaƞ ognahelaka oṡic̄ec̄a waƞ owiċayuspiƞ na lila ṫate ki waṡʹake uƞ wata ki mni mahel iyayiƞ kta k̇okiṗapi.

²⁴ Jesus yuḣic̄api na okiyakapi, “Iṫaċaƞ! Iṫaċaƞ! Mniuƞtʹapi ktelo!” eyapi. Jesus kikta na mnioṫate na mnioṫaja ki ablakela ṡi. Yuƞk̇aƞ ṫate na oṡic̄ec̄a ki waƞc̄agna awaḣwayela he.

²⁵ Jesus ihakab-uƞpi ki hewiċakiye, “Wowic̄ala luhapi ṡni hwo?” eye. Eyaṡ iyuṡʹiƞyayapi ċa heyapi, “Le wiċaṡa ki tuwe hwo? Ṫate na mni oṫaja ki e kʹeyaṡ ablakelaye!” eye.

Jesus Wiċaṡa Waƞ Wak̇aƞ-ṡic̄a Kaṡkayuzapi Etaƞhaƞ Asniye

²⁶ Jesus ak̄e nupapi ki ob ble opta ihuƞni na mak̇oċe waƞ Gerasa eyapi ċa ekta ipi. Le Galilee etaƞhaƞ mni ik̇owakataƞhaƞ yaƞke.

²⁷ Jesus wata etaƞhaƞ glic̄u, yuƞk̇aƞ oṫuƞwahe etaƞhaƞ wiċaṡa waƞ ataye, wiċaṡa ki le wak̇aƞ-ṡic̄a ki kaṡkayuze. Wiċaṡa ki ṫehaƞ heċel tiwanilya haċola uƞ na owiċaḣe ohaƞ iglonilya uƞ.

²⁸ Wiċaṡa ki le Jesus waƞyaƞkiƞ na tʹehowaya hoṫaƞiƞ, “Jesus maḣpiya ekta Wak̇aƞṫaƞka-Ċiƞhiƞtku! Tokel mayakuwa kta hwo? Kakiṡmaye ṡni yo,” ċec̄iċiye.

²⁹ Le heye ṡnihaƞni iṫokabya Jesus wak̇aƞ-ṡic̄a ki kiṡic̄e ċa heuƞ heye. Wak̇aƞ-ṡic̄a ki ṫehaƞ kaṡkayuze. Wiċaṡa eya maza uƞ kaṡka egnakapi ki iglupsake. Wak̇aƞ-ṡic̄a ki lena wiċaṡa le mak̇oṡic̄a ekta naṗekiyapi.

³⁰ Jesus wiċaṡa ki le wiyuƞġe, “Taku enic̄iyapi hwo?” eye. Yuƞk̇aƞ leċel ayupte, “‘Uƞkotapi’ uƞkiyepi,” eye. Wak̇aƞ-ṡic̄a ki ota ṫaƞmahel uƞpi heuƞ heye.

³¹ Wak̇aƞ-ṡic̄a ki Jesus iċekiya kilapi, onuniyata kakija ċiƞpi ṡni heuƞ.

³² Paha aglagla kukuṡe optaye eya wol-ahiyaye. Wak̇aƞ-ṡic̄a ki kukuṡe ki hena ṫaƞmahel iyayapi okihipi heċel Jesus iyuƞġapi. Ċa iyowiƞwiċakiye.

³³ Hehaƞl wak̇aƞ-ṡic̄a hena wiċaṡa ki ayuṡtaƞpi na kukuṡe optaya uƞpi waƞ hena el ṫaƞmahel iyayapi. Kukuṡe optaya iyuha naṗapi na maya okakse waƞ hetaƞhaƞ ohiƞḣpayapi na mnitʹapi.

³⁴ Kukuṡe awaƞyaƞkapi waƞ hena le waƞyaƞkapi, na oṫuƞwahe na owoju mak̇oċe ohomni yaƞke hena yaoṫaƞiƞpi.

³⁵ Le taku ṫokc̄a ki he oyate ki waƞyaƞg ipi, Jesus el hipi yuƞk̇aƞ wiċaṡa ki he nakuƞ waƞyaƞkapi. Wak̇aƞ-ṡic̄a hena iyuha kaṫaƞkal iyayewiċayiƞ na wiċaṡa ki le Jesus najiƞ el makikc̄eya yaƞke. Hayapi kicʹuƞ na ṫawaċiƞ ekic̄iċetu. Lena oyate ki waƞyaƞkapi na lila iyuṡʹiƞyayapi.

³⁶ Etaƞ lena waƞyaƞkapi hena oyate ki owiċakiyakapi.

³⁷ Oyate ohomni tipi waƞ hena wak̇okiṗapi uƞ Jesus gle ṡipi. Ċa Jesus wata ogna kigliƞ kta inajiƞ.

³⁸ Yuƞk̇aƞ wiċaṡa waƞ apiye ki he kiċi gla okihi ki iyuƞġe. Eyaṡ Jesus hektakiya gle ṡi na hekiye,

³⁹ “Yati ekta gla yo. Na taku Wak̇aƞṫaƞka eċanic̄iċuƞ ki he tuwe ki iyuha owiċakiyaka yo,” eye. Wiċaṡa ki le oṫuƞwahe ohaƞ taku Jesus ekic̄iċuƞ he oglag omani.

Jairus Ċuƞwiƞtku E Na Wiƞyaƞ Waƞ Jesus Ekaṫaƞ

⁴⁰ Jesus ble opta uƞma eċiyataƞhaƞ glihuƞni yuƞk̇aƞ oyate ki iyokipiya atayapi.

⁴¹ Hehaƞl wiċaṡa waƞ Jairus ec̄iyapi ċa hihuƞni. Omnic̄iye-tipi iṫaċaƞ heċa. Jesus iṫokabya ċaƞkpemak̇agleya hinajiƞ na ti ekta Jesus kiċo.

⁴² Ċuƞwiƞtku waƞ waniyetu ak̄e nupa ċa wana tʹiƞ kta ikiyela na le ec̄ela ċuƞwiƞtku yuha. Jesus etkiya ye ki eċuƞhaƞ oyate ki paokiyuṫapi.

⁴³ Oyate wiċota kawitayapi ohaƞ wiƞyaƞ waƞ wana waniyetu wikc̄emna waƞji sam nupa wahehaƞl we hiyu woyazaƞ waƞ eċec̄a ċa k̇o oṗa. Taku yuha ki iyuha wapiya wiċaṡa awiċayusote, eyaṡ tuweni apiya okihi ṡni.

⁴⁴ Jesus najiƞ ki ilazata hinajiƞ na ṫaogle ihaƞke el ekaṫaƞ, yuƞk̇aƞ we hiyu waƞ he waƞc̄agna akisni.

⁴⁵ Jesus iwiċayuƞġe, “Tuwe emakaṫaƞ hwo?” eye. Tuweni slolye ṡni, eyaṡ Peter leye, “Iṫaċaƞ, oyate ki nipaokiyuṫapelo,” eye.

⁴⁶ “Tuwa emakaṫaƞ ċa miṫawowaṡʹake iyaye ki slolwakiyelo,” Jesus eye.

⁴⁷ Wiƞyaƞ ki le inaḣma okihi ṡni ki slolkiye, ċa Jesus najiƞ el iṫokabya ċaƞċaƞya ċaƞkpemak̇agleya inajiƞ na tuwe ki iyuha owiċakiyake, ekaṫaƞ na woyazaƞ etaƞhaƞ waƞc̄agna woasni ic̄u ki he.

⁴⁸ Jesus hekiye, “Miċuƞkṡi, wowic̄ala niṫawa ki uƞ woasni iyac̄u na nitaƞyaƞ yelo. Ċaƞtewaṡteya gla yo!” eye.

⁴⁹ Jesus nahaƞḣc̄i woglake eċuƞhaƞ, wahoṡiya waƞ hihuƞni na Jairus okiyake, “Niċuƞkṡi tʹe yelo, hehaƞ wauƞspekiye ki naġiyeye ṡni yo!” eye.

⁵⁰ Jesus le naḣʹuƞ na Jairus hekiye, “Ik̇oṗe ṡni yo! E wic̄ala yo, heċetu ki niċuƞkṡi taƞyaƞ ktelo,” eye.

⁵¹ Tipi el ihuƞnipi hehaƞ Jesus tuweni timahel iyayewiċakiye ṡni. Peter, e na John, e na James, e na wiċiƞc̄ala tʹe ki huƞku na atkuku ki ec̄ela iyowiƞwiċakiye.

⁵² Tuwe ki iyuha wiċiƞc̄ala ki oweċeyapi. Eyaṡ Jesus heye, “Ċeyapi ṡni yo, wak̇aƞyeja ki le tʹeḣc̄e ṡni eyaṡ ikc̄eya iṡtime yelo,” eye.

⁵³ Oyate eya huƞḣ waċetʹuƞglapi waƞ hena wiċiƞc̄ala ki le tʹa ċa slolyapi ċa oiḣapi.

⁵⁴ Jesus wak̇aƞyeja waƞ he nape oyuspiƞ na kipaƞ, “Miċuƞkṡi, inajiƞ yo!” eye.

⁵⁵ Yuƞk̇aƞ woniya ki ake kic̄igli na najiƞ hiyaye. Hehaƞl Jesus wiċiƞc̄ala ki he wokʹu wiċaṡi.

⁵⁶ Taku ṫokc̄a ki le huƞku na atkuku ki inihaƞpi eyaṡ, Jesus tuweni okiyake wiċaṡi ṡni.