Luke 5 - Lakota Portions

Jesus Ihakab-Uƞpi Kte Ki Hena Wiċaglaḣniġe

¹ Jesus oyate ki Wak̇aƞṫaƞka ṫaoiye ki naḣʹuƞ ċiƞpi na paokiyuṫapi, ċa ble waƞ Gennesaret (Galilee) eyapi ċa aglagla inajiƞ na wauƞspewiċakiye.

² Mniaglagla wata num hokuwa wiċaṡa eya agluṡtaƞpi na ho-ipaṫe kiċaƞkiyapi.

³ Yuƞk̇aƞ Jesus wata uƞma ki Simon ṫawa he el iyotakiƞ na wata ki mniohuta etaƞhaƞ pak̇ab iyeye ṡi na hetaƞhaƞ wauƞspewiċakiye.

⁴ Jesus woglaka igluṡtaƞ na hehaƞl Simon hekiye, “Mni ṡme etkiya wata ki pak̇ab iyeyiƞ na ho-ipaṫe ki mni oiḣpekiyapo,” eye.

⁵ Simon ayupte, “Iṫaċaƞ, haƞhepi ata wowaṡi eċuƞkʹuƞpi eyaṡ takuniḣc̄i uƞkoyuspapi ṡni yelo. Eyaṡ taku eċuƞ mayaṡi ki le eċel eċamu ktelo,” eye.

⁶ Ċa iyeċel eċuƞpi yuƞk̇aƞ hoġaƞ lila ota owiċayuspapi uƞ ho-ipaṫe ki naḣlec̄anasʹe mni etaƞhaƞ gluzepi.

⁷ Hehaƞl ṫak̇olakupi ki wata uƞma waƞ he aupi na okiye wiċaṡipi. Ċa hihuƞnipi na wata ki nupiƞyaƞ hoġaƞ ojulyapi. Lila hoġaƞ otapi heuƞ wata ki lena mni kamahel iyaya tk̇a.

⁸ Simon Peter le waƞyaƞke hehaƞ, Jesus iṫokab ċaƞkpemak̇agleya najiƞ na hekiye, “Iṫaċaƞ, mikiyela u ṡni yo, wiċaṡa waḣtanipi sʹa hemaċa yelo,” eye.

⁹ Simon obtu hena iyuha hoġaƞ lila ota owiċayuspapi ki he iṫuƞṗapi.

¹⁰ Ṫak̇olaku eya James e na John, lena Zebedee ċiƞc̄api, lila iyuṡʹiƞyayapi. Jesus, Simon hekiye, “Ik̇oṗe ṡni yo! Letaƞ ṫokatakiya waċiƞṫaƞgya wowaṡi eċanu he iyeċel oyate ċa awiċayau ktelo,” eye.

¹¹ Hehaƞl wata ki lena mniaglagla yuze ekiglepi na taku iyuha ayuṡtaƞpi na Jesus ihakab iyayapi.

Jesus Wiċaṡa Waƞ Ḣaƞḣaƞ Apiye Pic̄a Ṡni Ċa Ataye

¹² Oṫuƞwahe waƞ el Jesus i, yuƞk̇aƞ wiċaṡa waƞ ḣaƞḣaƞ apiye pic̄a ṡni ċa eċec̄a ċa hel uƞ. Jesus iṫokabya ċaƞkpemak̇agleya najiƞ na uƞṡiicʹiya ċekiye, “Iṫaċaƞ, yaċiƞ haƞtaƞṡ apimayaya oyakihi ki he slolwaye, woasniye makʹu wo,” eye.

¹³ Yuƞk̇aƞ Jesus leċel ayupte, “Ohaƞ. Leċetu ktelo,” eye. Na ṫaċaƞ ki epaṫaƞ yuƞk̇aƞ waƞc̄agnaya akisni.

¹⁴ Jesus hekiye, “Otutuya oglake ṡni yo, eyaṡ ṫokaheya waċekiye-wiċaṡa ki ekta yiƞ na waƞyaƞgicʹiya yo, hehaƞl Moses ṫawooṗe ki he aiyeċel uƞṡiicʹiya yo. Na hehaƞl oyate wiċiṫokabya woasni nicʹupi ki le yaglaoṫaƞiƞ ktelo,” eye.

¹⁵ Jesus waeċuƞ ki le oṫaƞiƞ ċa oyate ki igluwitayapi. Wouƞspe na woasni ċiƞpi uƞ naḣʹuƞ hipi.

¹⁶ Eyaṡ Jesus ḣeyatakiya iṡnala waċekiyiƞ kta ċa iyaye.

Jesus Wiċaṡa Waƞ Mani Ṡni Ċa Asniye

¹⁷ Aƞpetu waƞ el Jesus wauƞspewiċakiye yuƞk̇aƞ Pharisees eya e na Moses ṫawooṗe awaƞyaƞkapi eya ohaƞ timahel yaƞkapi. Lena Galilee mak̇oċe el oṫuƞwahe iyuha etaƞhaƞ ahi na Judea na Jerusalem etaƞhaƞ nakuƞ ahi. Wak̇aƞṫaƞka Jesus waapiyiƞ kta uƞ wowaṡʹake kʹu.

¹⁸ Wiċaṡa eya waƞji mani ṡni ċa oyuƞke ogna ahipi. Timahel eyayapi na Jesus itok̇abya aya waċiƞpi.

¹⁹ Eyaṡ owiċotapi ċa okihipi ṡni. Ċa hehaƞl tiwaƞkata eyayapi na tiakaḣpe ki oyuḣlokapi na etaƞhaƞ patimahel iyeyapi na Jesus najiƞ ki itok̇abya eyuƞpapi.

²⁰ Wiċaṡa eya waasniye wic̄alapi waƞ hena awiċableziƞ na wiċaṡa waƞ mani ṡni ki hekiye, “K̇ola, wayaḣtani waƞ hena iyuha eċic̄iktuƞjelo,” eye.

²¹ Moses-ṫawooṗe-awaƞyaƞkapi na Pharisees waƞ hena iglepi, “Jesus wak̇aƞicʹila yelo, Wak̇aƞṫaƞka ec̄ela heċuƞ okihi yelo,” eyapi.

²² Jesus lena ipayeḣya wiyukc̄aƞpi ki awiċableze na heye, “Takuwe heċel wilukc̄aƞpi hwo?

²³ Wiċaṡa waƞ mani ṡni ki le wowaḣtani ewec̄iktuƞjiƞ naiƞṡ inajiƞ waṡi kte ki he tuktuma oeċuƞwaṡte hwo?

²⁴ Eyaṡ Wiċaṡa-Ċiƞkṡitku mak̇a akaƞl wahi na wowaṡʹake bluha ki na wowaḣtani ewiċawec̄iktuƞje owakihi ki he waƞlakapi ktelo,” eye. Jesus hehaƞl wiċaṡa waƞ mani ṡni ki hekiye, “Inajiƞ yo! Oyuƞke ki kpahi na tiyata gla yo,” eye.

²⁵ Yuƞk̇aƞ wiċaṡa ki le timahel yaƞkapi waƞ hena iyuha wiċiṫokabya ikpanajiƞ na oyuƞke gluha gle eċuƞhaƞ Wak̇aƞṫaƞka yataƞ.

²⁶ Tuwe ki iyuha inihaƞpi heuƞ ċaƞċaƞpi na Wak̇aƞṫaƞka yataƞpi. “Aƞpetu ki le taku eċuƞ pic̄a ṡni eya waƞuƞyaƞkapelo,” eyapi.

Jesus Levi Eċa Glaḣniġe

²⁷ Ohakabya, Jesus inaṗe yuƞk̇aƞ wiċaṡa waƞ Levi ec̄iyapi ċa waḣpa-wokaiju-pahi yaƞka ċa waƞyaƞke. Jesus Levi hekiye, “Mihakab opiicʹiya yo,” ekiye.

²⁸ Levi taku iyuha agluṡtaƞ na ihakabya iyaye.

²⁹ Levi Jesus yuonihaƞya oyate ki wowiċakʹu. Ti el oyate wiċakiċo hena ohaƞ waḣpa-wokaiju-pahipi na waḣtanipi sʹa k̇o oṗapi.

³⁰ Pharisees ki e na Moses-ṫawooṗe-awaƞyaƞkapi waƞ hena Jesus ihakab-uƞpi ki iwiċayuƞġapi, “Takuwe lena ob wayatapi hwo? Waḣpa-wokaiju-pahipi na waḣtanipi sʹa heċapelo,” eyapi.

³¹ Jesus awiċayupte, “Oyate zanipi hena ṗejuta-wiċaṡa waċiƞwiċayapi ṡni eyaṡ kujapi hena eċa woasniye ċiƞpelo.

³² Oyate eya taƞyaƞ opiicʹiyapi waƞ hena eċa wiċawak̇e ṡni tk̇a etaƞ owoṫaƞla uƞpi ṡni waƞ hena eċa Wak̇aƞṫaƞka etkiya igluhomnipi na igluonihaƞpi kta uƞ wahi yelo,” eye.

Akiḣʹaƞicʹiyapi Ṫaƞtaƞhaƞ

³³ Oyate ki huƞḣ Jesus hekiyapi, “John ihakab-uƞpi ki ob uƞ wahehaƞl woyute ċola e waċekiya uƞpi na Pharisee wiċihakab-uƞpi waƞ hena iƞṡ-eya heċel uƞpi, eyaṡ nihakab-uƞpi ki hena e wotapi na wayatkaƞpelo,” eyapi.

³⁴ Jesus awiċayupte, “Tuwa ṫawic̄uṫuƞ eċuƞhaƞ ṫak̇olaku ki taƞyaƞ wotapi. Heċeḣc̄i obmaptu ki hena akiḣʹaƞpi kte ṡni.

³⁵ Aƞpetu waƞ yuḣeyab imac̄upi kta ċa u welo. Hehaƞtu ċa mihakab-uƞpi ki nakeṡ akiḣʹaƞicʹiyapi ktelo,” eye.

³⁶ Jesus wiyaċiƞpi waƞ owiċakiyake, “Ogle ṫani waƞji mniḣuha leċala uƞ apikiyapi kte ṡni yelo, heċanupi haƞtaƞṡ apaṫapi leċala ki namniġiƞ na ogle ṫani ki yagluṡic̄api ktelo.

³⁷ Mniṡa ṫec̄a hena nakuƞ mni-ojuha ṫec̄a ċa ognakapi ktelo, heċanupi ṡni haƞtaƞṡ mniṡa ṫec̄a ki napoġiƞ na mni-ojuha ṫani ki naḣlec̄iƞ na yagluṡic̄api ktelo. Nakuƞ mniṡa ki skepiƞ ktelo.

³⁸ Ċa mniṡa ṫec̄a ki he mni-ojuha ṫec̄a ċa ognakapi ktelo.

³⁹ Eyaṡ tuwa mniṡa ṫani yatkaƞ haƞtaƞṡ hehaƞya mniṡa ṫec̄a ċiƞ ṡni yelo, ‘Mniṡa ṫani ki he lila oyatke waṡte yelo,’ eyapi kte,” keye.