Luke 24 - Lakota Portions

Jesus Kini

¹ Aƞpetu ic̄iṡakowiƞ hehaƞ aƞpo eċiyataƞhaƞ, wiƞyaƞ ki waḣpe waṡtemna yuwiƞyeyapi waƞ hena yuha Jesus ṫaċaƞ ḣpaye ki ekta ipi.

² Iḣʹe ṫaƞka gmigmela waƞ tiyopoṡtaƞ haƞ waƞ he ḣeyab pagmiya he.

³ Na timahel iyayapi hehaƞ Iṫaċaƞ Jesus ṫaċaƞ ki tok̇aḣʹaƞ.

⁴ Le tokel iyukc̄aƞpi ṫaƞiƞ ṡni. Yuƞk̇aƞ wiċaṡa num hayapi skalaḣc̄aka uƞpi eya wiċiṫokab ṫaƞiƞicʹiyapi.

⁵ Wiƞyaƞ ki ṫaƞsagtʹapi heuƞ ṗamaglegle najiƞpi. Wiċaṡa ki lena wiƞyaƞ ki hewiċakiyapi, “Takuwe tuwa ni ṡk̇a ṫaċaƞ ki oyalepi hwo?” eyapi.

⁶ “Jesus hehaƞya lel uƞ ṡni. Kini yelo. Kiksuyapo, Galilee mak̇oċe ekta taku onic̄iyakapi ki hehaƞ leye kʹuƞ,

⁷ ‘Oyate ki Wiċaṡa-Ċiƞkṡitku miyeċa oyuspamayayapi ktelo. Ċaƞic̄ipaweġa akaƞl omakataƞpi kta eyaṡ hetaƞhaƞ aƞpetu ic̄iyamni ki wakini ktelo,’ eye kʹuƞ.”

⁸ Wiƞyaƞ ki Jesus hehaƞ waeye ki kiksuyapi.

^9-10 Wiƞyaƞ huƞḣ Jesus ṫaċaƞ ḣpaye k̇a ki ekta ipi. Wiƞyaƞ ki lena Mary Magdalene e na Joanna e na Mary, James huƞku ki oṗapi. Kihuƞnipi hehaƞ wahoṡiyapi ak̄e waƞji ki e na Jesus ihakab-uƞpi ki hena taku tok̇a ki lena owiċakiyakapi.

¹¹ Eyaṡ wiƞyaƞ ki woyakapi ki lena ċetʹuƞwiċaglapi.

¹² Yuƞk̇aƞ Peter ikpanajiƞ na Jesus ṫaċaƞ eyuƞpapi ekta inaḣni ihuƞni. Patuṡ eyokasʹiƞ eyaṡ mniḣuha haƞska ki ec̄ela ena yaƞka waƞyaƞke. Taku tok̇a ki ableze ṡni.

Emmaus Wiċotitakiya Yapi

¹³ Jesus ihakab-uƞpi ki num Emmaus wiċoti eċetkiya yahaƞpi. Wiċoti ki le Jerusalem oṫuƞwahe etaƞhaƞ mak̇a-iyuṫapi ṡakowiƞ waheċetu.

¹⁴ Taku tok̇a ki lena iwoglakahaƞpi.

¹⁵ Eċuƞhaƞ Jesus iyuƞk̇ala ṫaƞiƞicʹiyiƞ na wiċisakib ob yahe.

¹⁶ Ho eyaṡ Wak̇aƞṫaƞka Jesus iyekiyewiċakiye ṡni.

¹⁷ Jesus iwiċayuƞġe, “Taku ċa iwoyaglakapi hwo?” eye. Le naḣʹuƞpi hehaƞ inajiƞpi. Ċaƞteṡic̄api ki awiċableze.

¹⁸ Waƞji, Cleopas ec̄iyapi, ki leċel ayupte, “Niṡnala Jerusalem oṫuƞwahe ki lel wana aƞpetu tona taku tok̇a ki slolyaye ṡni hwo?” eye.

¹⁹ Jesus ake iwiċayuƞġe, “Taku tok̇a hwo?” eye. Leċel ayuptapi, “Jesus Nazareth oṫuƞwahe etaƞhaƞ wiċaṡa-wak̇aƞ-waayaṫaƞiƞ heċa na waṡʹagya wauƞspewiċakiya. Wak̇aƞya waeċuƞ na Wak̇aƞṫaƞka e na oyate ki tohaƞyaƞ okihika yuwaƞka yuzapi.

²⁰ Waċekiye-wiċaṡa-oiṫaċaƞpi ki e na takuku oiṫaċaƞpi ki Jesus oyuspewiċakiyapi. Roman oiṫaċaƞḣc̄a ki ṫaakiċita ki Jesus ċaƞic̄ipaweġa akaƞl okataƞpi ċa hel teḣiya tʹe.

²¹ Jesus uƞkiyuṡkapi kte ki he Israel oyate ki awaċiƞya uƞkʹuƞpi tk̇a. Wana aƞpetu ic̄iyamni na nahaƞḣc̄i wakta uƞkʹuƞpi.

^22-23 Yuƞk̇aƞ wiƞyaƞ eya yuṡʹiƞuƞyapi. Hihaƞnilaḣc̄i ṫaċaƞ eyuƞpapi ekta ipi. Yuƞk̇aƞ ṫaċaƞ ki tok̇aḣʹaƞ. Glihuƞnipi hehaƞ ogligle eya waƞwiċayaƞkapi keya oglakapi. Ogligle ki lena Jesus kini keya owiċakiyakapi.

²⁴ Ċa huƞḣ ekta ihuƞnipi yuƞk̇aƞ wiƞyaƞ ki oyakapi heċeḣc̄i Jesus ṫaċaƞ ki tok̇aḣʹaƞ,” eya oyakapi.

²⁵ Ċa Jesus hewiċakiye, “Ataṡ waayablezapi ṡni yelo. Wak̇aƞṫaƞka wiċaṡa-wak̇aƞ-waayaṫaƞiƞ ṫawa ki taku onic̄iyakapi ki nahaƞḣc̄i ċetʹuƞwiċayaglapelo.

²⁶ Wak̇aƞṫaƞka Messiah ki leċel kakijiƞ kta yuṡtaƞ na hehaƞl glukini na maḣpiyata gluonihaƞ kta yuṡtaƞ.”

²⁷ Hehaƞ Jesus Wowapi-Wak̇aƞ el woyakapi ki wiċakic̄iksuye. Moses e na wiċaṡa-wak̇aƞ-waayaṫaƞiƞ uƞma ki wowapi ki owiċakiyake.

²⁸ Wiċaṡa nupa ki ob wiċoti waƞ ekta yapi ki kiyela ihuƞnipi hehaƞ Jesus isam yiƞ kte sʹeleċec̄a ċa ablezapi.

²⁹ Ċa hoyekiyapi, “Wimaheliyayiƞ na eċani ki oiyokpaziƞ kta ċa lena uƞ wo,” eyapi. Ċa hena ob uƞ.

³⁰ Wol-iyotakapi hehaƞ Jesus aġuyapi waƞ ic̄u na yuwak̇aƞ. Ċokaƞ yuksiƞ na wiċakʹu.

³¹ Walehaƞl Jesus iyekiyapi yuƞk̇aƞ ognahelaka tok̇aḣʹaƞ.

³² Ċa hekiċiyapi, “Leċiya kiċi uƞkʹuƞ hehaƞ Wowapi-Wak̇aƞ ki eċel okaḣniḣuƞkiye kʹuƞ. Hehaƞ lila ċaƞteuƞwaṡte kʹuƞ,” ekiċiyapi.

³³ Waƞc̄agna ikpanajiƞpi na Jerusalem oṫuƞwahe ekta kipi. Ak̄e waƞji ki Jesus ihakab-uƞpi ki ob igluwitayapi. Wauƞspewiċakiyapi nupa ki lena igluwitapi ki iyuha iyewiċayapi.

³⁴ Oyate ki wiċaṡa nupa ki lena leċel owiċakiyakapi, “Iṫaċaƞ ki kiniḣc̄e na Peter el ṫaƞiƞicʹiyelo,” eyapi.

³⁵ Emmaus wiċoti etaƞhaƞ glipi waƞ hena nupiƞ leċel oglakapi, “Ċaƞku ogna Jesus atauƞyapi na aġuyapi ki yuksa hehaƞ nakeṡ iyeuƞkiyapi,” eyapi.

Jesus Ihakab Uƞpi ki El Ṫaƞiƞicʹiye

³⁶ Lena oglakapi eċuƞhaƞ ognahelaka Jesus ṫaƞiƞicʹiyiƞ na hewiċakiye, “Wak̇aƞṫaƞka taƞyaƞ awaƞniyaƞkapi ktelo,” eye.

³⁷ Lila iyuṡʹiƞyayapi. Wanaġi ċa waƞyaƞkapi keċiƞpi

³⁸ ċa Jesus hewiċakiye, “K̇omakiṗapi ṡni yo. Takuwe wakini ki le nahaƞḣc̄i ċetʹuƞmayaglapi hwo?” eye.

³⁹ “Si na napokaṡke ki aomakataƞpi ki waƞmic̄iyaƞkapo. Emayuṫaƞpi na amablezapo. Wanaġi waƞjini leċel eluṫaƞpi oyakihipi ṡni yelo,” eye.

⁴⁰ Leya hehaƞ tuktel okataƞpi ki kpazo.

⁴¹ Woċetʹuƞgla eyaṡ wiyuṡkiƞ sam-iyayapi. Iwiċayuƞġe, “Takuƞl yul pic̄a luhapi hwo?” eye.

⁴² Ċa hoġaƞ waƞ ṗelikc̄eya ṡpayaƞpi ċa kʹupi.

⁴³ Wiċiṫokab ic̄u na yute.

⁴⁴ Na lewiċakiye, “Niohaƞ wauƞ hehaƞ oċic̄iyakapi. Wowapi-Wak̇aƞ el taku omayakapi hena iyuha iyeċetu kta keṗe.”

⁴⁵ Nahaƞ Wowapi-Wak̇aƞ ki okaḣniḣwiċaye,

⁴⁶ na hewiċakiye, Leċel miṫaƞtaƞhaƞ owapi, “Messiah ki kakijiƞ na teḣiya tʹiƞ kte. Ho na aƞpetu ic̄iyamni ki kini kte.”

^47-48 Mak̇asitomniya oyate ki Messiah ṫawokiċuƞze ogna leċel woyakapi kte: Oyate ki ṫoḣʹaƞ akiblezapi na Wak̇aƞṫaƞka kiksuyapi haƞtaƞṡ wagluṡnapi ki hena awiċakic̄iktuƞjiƞ kte. Makakijiƞ na teḣiya matʹiƞ na ake wakini ki lena waƞlakapi ċa Jerusalem etaƞhaƞ iyayapi na kaabyekiya oyakapo.

⁴⁹ Eyaṡ ṫokeya Wak̇aƞṫaƞka Ate eye ki iyeċel, eċani ki Woniya-Wak̇aƞ ki el niupi kta ċa oṫuƞwahe lel aṗe uƞpo.

Wak̇aƞṫaƞka Jesus Maḣpiyatakiya Glokiyagle

⁵⁰ Ho na Bethany oṫuƞwahe hehaƞya awiċai na hehaƞl awiċayuġatiƞ na wiċayuwak̇aƞ.

⁵¹ Leċuƞ wahehaƞ Ate-Wak̇aƞṫaƞka maḣpiyatakiya glokiyagle.

⁵² Ċa Jerusalem oṫuƞwahe etkiya lila wiyuṡkiƞyaƞ kiglapi.

⁵³ Na ohiƞniyaƞ Tipi-Wak̇aƞ ekta Wak̇aƞṫaƞka yawaṡtepi.