Luke 23 - Lakota Portions

Jesus Pilate Iṫokab Aipi

¹ Igluwitayapi waƞ hena Jesus Pilate, Roman oiṫaċaƞḣc̄a ki, iṫokab aipi.

² Ho na leċel Jesus iyauƞpapi, “Wiċaṡa ki le oyate ki ipayeḣ wiċayahomni. Waḣpa-wokaiju ki Mak̇asitomniya-Yataƞpi kic̄aiju ṡni wiċaṡi na k̇o Messiah ki e keyelo. Messiah ki he wiċaṡa-yataƞpi kta ṡke keyelo,” eyapi.

³ Pilate leċel Jesus wiyuƞġe, “Niyeċa Jew oyate ki wiċaṡa-yataƞpi ki he niye hwo?” eye. Jesus leċel ayupte, “Ċiƞ niyeṡ hehe,” eye.

⁴ Yuƞk̇aƞ Pilate waċekiye-wiċaṡa-oiṫaċaƞpi ki e na uƞma oyate ki leċel owiċakiyake, “Wiċaṡa ki le takuni iyawauƞpa owakihi ṡni yelo,” eye.

⁵ Eyaṡ heċena hoṫaƞiƞpi, “Judea mak̇oċe ataya oyate ohaƞ lila woṡic̄e yelo,” eyapi. “Galilee mak̇oċe ekta heċuƞ na lehaƞyaƞ hi yelo,” eyapi.

Jesus Herod Iṫokab Aipi

⁶ Pilate le naḣʹuƞ hehaƞ Jesus Galilee mak̇oċe etaƞhaƞ ki pasi.

⁷ Hetaƞhaƞ keyapi hehaƞ Herod ṫamak̇oċe etaƞhaƞ ki ableziƞ na eċuƞhaƞ Herod Jerusalem oṫuƞwahe el uƞ ċa ekta Jesus ayewiċakiye.

⁸ Herod Jesus waƞyaƞka hehaƞ lila iyuṡkiƞ. Jesus oċaṡṫuƞka ċa naḣʹuƞ na wak̇aƞya waeċuƞ ki waƞyaƞka ċiƞ.

⁹ Herod Jesus otakiya wiyuƞġe eyaṡ Jesus ataṡ ayupte ṡni.

¹⁰ Waċekiye-wiċaṡa-oiṫaċaƞpi ki e na wooṗe-awaƞyaƞkapi ki inajiƞpi na taku ṡikṡic̄a iyauƞpapi.

¹¹ Ċa hehaƞl Herod ṫaakiċita ki ob Jesus oiḣaḣapi. Ṡina oteḣika waƞ iƞkiyapi na Herod hektakiya Pilate ekta kigleye.

¹² He aƞpetu ki Herod e na Pilate ok̇olakiċiyapi. He iṫokab, taƞyaƞ uƞpi ṡni tk̇a.

Pilate Jesus Ktepi Kte ki Yuṡtaƞ

¹³ Ċa hehaƞl Pilate waċekiye-wiċaṡa-oiṫaċaƞpi ki e na takuku oiṫaċaƞpi ki e na oyate ki iyuƞk̇ala wiċakiċo.

¹⁴ Leċel owiċakiyake, “Wiċaṡa ki le mayakahipi na oyate ki naicʹijiƞwiċaya kehapi. Eyaṡ niṫokab wimuġiƞ na takuni iyayauƞpapi ki iyeċetu ṡni yelo.

¹⁵ Herod e kʹeyaṡ hektakiya glic̄uye. Takuni ṡic̄a eċuƞ uƞ uƞktepi kta iyeċec̄a ṡni,” eye.

¹⁶ “Ċa akiċita miṫawa ki yusagsakapi na hehaƞl wakiyuṡkiƞ kte,” eye.

¹⁸ Eyaṡ oyate ki ṡʹaya wiċahe, “Jesus ktepi na Barabbas kiyuṡkapo!” eyapi.

¹⁹ Barabbas oṫuƞwahe el oyate ki ob waokʹoyiƞ na nakuƞ tiwiċakte uƞ kaṡkapi.

²⁰ Pilate Jesus kiyuṡka ċiƞ ċa ake oyate ki piya iwiċayuƞġe.

²¹ Eyaṡ heċena paƞpaƞpi, “Ċaƞic̄ipaweġa akaƞ okataƞpo!” eyapi.

²² Ċa ic̄iyamniya iwiċayuƞġe, “Takuni ṡic̄a eċuƞ uƞ kte pic̄a ṡni, ċa takuwe ċaƞic̄ipaweġa akaƞ okataƞwiċawakiyiƞ kta hwo? Akiċita ki yusagsakapi na bluṡkiƞ ktelo,” eye.

²³ Ho eyaṡ, heċena oyate ki isam hoṫaƞgya Jesus ktepi ċiƞpi. Lila hoṫaƞkapi heuƞ haƞkeya Pilate yahomnipi.

²⁴ Ċa Jesus ktepi kte ki he yuṡtaƞ.

²⁵ Na Barabbas kiyuṡkapi na Jesus eha ċaƞic̄ipaweġa akaƞ okataƞ wiċaṡi.

Jesus Ċaƞic̄ipaweġa Akaƞ Okataƞpi

²⁶ Jesus hetaƞhaƞ yuḣeyab eyayapi hehaƞ akiċita ki Cyrene wiċaṡa waƞ Jesus ṫaċaƞic̄ipaweġa ki kic̄iyuhakiyapi. Wiċaṡa he Simon ec̄iyapi na nakeṡ manitaƞhaƞ hihuƞni.

²⁷ Wiċota Jesus ihakab uƞpi. Wiƞyaƞ huƞḣ ihakab ċeya uƞpi.

²⁸ Jesus awiċableziƞ na hewiċakiye, “Owemaċeyapi ṡni yo. Eyaṡ niye na niċiƞc̄api ki eċa owewiċaċeyapo.

²⁹ Takuwe leṗe ki le, kakijapi heuƞ wiƞyaƞ eya hokṡiċolapi ki hena Wak̇aƞṫaƞka pilayapi kte.

³⁰ E kʹeyaṡ ḣe ki k̇o hoyekiyapi kte, “Waƞċeyaṡ uƞkahiƞḣpayapo,” eyapi ktelo. Na paha ki nakuƞ hoyekiyapi kte, “Uƞkakaṫapo,” eyapi ktelo.

³¹ Nakuƞ takuwe leṗe ki he: Oyate takuni ṡic̄a eċuƞpi ṡni ki hena leċel teḣiya owiċakuwapi haƞtaƞṡ ṡic̄aya waeċuƞpiḣc̄a hena tokel owiċakuwapi kta hwo?” eye.

³² Wamanu wiċaṡa num Jesus kiċi wiċaktepi kta ċa awiċahipi.

³³ Wiċanataṡloke eyapi waƞ el ihuƞnipi. Letu ċa Jesus ċaƞic̄ipaweġa el aokataƞpi, wamanu-wiċaṡa num ob, waƞji iṡlayataƞhaƞ na uƞma ki iƞṡ ċatkayataƞhaƞ otkewiċayapi.

³⁴ Jesus heye, “Ate, awiċakic̄iktuƞja yo, waeċuƞpi ki le akiblezapi ṡni yelo.” Akiċita ki akiċiṡkatapi tuwa ṫahayapi yuha kte ki heuƞ.

³⁵ Oyate ki wawaƞyaƞg najiƞpi eċuƞhaƞ Jew oyate oiṫaċaƞpi ki Jesus oiḣaḣapi na heyapi, “Oyate eya niwiċaye ċa niicʹiya okihi, Messiah waƞ Wak̇aƞṫaƞka glaḣniġe ki he e haƞtaƞṡ.”

³⁶ Akiċita ki nakuƞ Jesus oiḣaḣapi na mniṡa eya lila ṗa ċa kʹupi

³⁷ na hekiyapi, “Jew oyate Iṫaċaƞ he niye haƞtaƞṡ niicʹiya yo!” eyapelo.

³⁸ Iwaƞkab wowapi waƞ otkeyapi, “Le Jew oyate Iṫaċaƞ ki e,” eyapi.

³⁹ Wamanu wiċaṡa okataƞ otkewiċayapi ki waƞji ṡic̄aya waekiye, “Messiah niye ṡni hwo? Niicʹiyiƞ na niuƞyapo,” eye.

⁴⁰ Eyaṡ uƞma ki iyoṗeyiƞ na heye, “Wak̇aƞṫaƞka k̇oyakiṗe ṡni hwo? Niṡ-eya iyeċel niyasupelo.

⁴¹ Eyaṡ uƞkiye waeċuƞkʹuƞ ki heuƞ ċa aiyeċel uƞyasupi. Na iye wiċaṡa ki le takuni ṡic̄a eċuƞ ṡni yelo,” eye.

⁴² Nahaƞ ake heye, “Jesus, maḣpiya wokiċuƞze ekta yaki ki miksuya yo,” eye.

⁴³ Ċa Jesus ayupte, “Aƞpetu ki le maḣpiya wokiċuƞze iyokipiya uƞkʹuƞ kta ċa le oċic̄iyakelo,” eye.

Jesus Wiċoni Ayuṡtaƞ

^44-45 Wiċokaƞhiyaye hetaƞhaƞ oaṗe yamniyaƞ wi ki ṫaƞiƞ ṡni ċa mak̇oċe ki ata oiyokpaze. Yuƞk̇aƞ Tipi-Wak̇aƞ itimahel mniḣuha ṡoka waƞ tiċokaƞ otke waƞ he ċokaƞ taƞyela naḣlec̄e.

⁴⁶ Jesus hoṫaƞka hoyekiye, “Ate, woniya imic̄ic̄u wo,” eyiƞ na hehaƞl wiċoni agluṡtaƞ.

⁴⁷ Akiċita oiṫaċaƞ waƞ le waƞyaƞka hehaƞ Wak̇aƞṫaƞka yawaṡte na heye, “Ehaƞuƞ le wiċaṡa waṡteḣc̄a heċa,” eye.

⁴⁸ Teḣiya waeċuƞpi ki le wiċota waƞyaƞkapi ċa hena ċaƞteṡic̄a glapi.

⁴⁹ Jesus oyate eya slolwiċaye hena epi na wiƞyaƞ eya Galilee mak̇oċe etaƞhaƞ ihakab hipi waƞ hena itohaƞ najiƞpi ċa taku ki lena iyuha waƞyaƞkapi.

Jesus Ṫaċaƞ Ki Eyuƞpapi

^50-51 Wiċaṡa waƞ Joseph ec̄iyapi ċa Judah mak̇oċe el Arimathea oṫuƞwahe etaƞhaƞ. Wiċaṡa waṡte ki le taƞyaƞ waeċuƞpi ċiƞ. Aƞpetu waƞji oyate ki iyuha Wak̇aƞṫaƞka yuwaƞka yuzapi kte ki he eċa aṗe uƞ. Jew oiṫaċaƞ yaƞkapi waƞ he oṗa eyaṡ Jesus ktepi kta yuṡtaƞpi hehaƞ heċetulake ṡni.

⁵² Wiċaṡa ki le Pilate ekta i na Jesus ṫaċaƞ ki ḣapi kta ċa kila.

⁵³ Hehaƞl iyayiƞ na Jesus ṫaċaƞ ki ċaƞic̄ipaweġa etaƞhaƞ yuḣpapi. Mniḣuha haƞska waƞ uƞ ṫaċaƞ ki opemnipi na iḣʹe oyuḣlokapi waƞ nahaƞḣc̄i wiċatʹa waƞjini ḣpaye ṡni ċa el eyuƞpapi.

⁵⁴ Wana aƞpetu ic̄izaptaƞ. Ḣtayetu iyaye ki Jew oyate ki aƞpetu wak̇aƞ ṫawapi kta ċa wowaṡi eċuƞpi ṡni igluwiƞyeyapi.

⁵⁵ Wiƞyaƞ eya Galilee mak̇oċe etaƞhaƞ Jesus ihakab hipi hena eċa Joseph tuktel Jesus ṫaċaƞ ki eyuƞpe ki ihakab waƞyaƞg ipi.

⁵⁶ Wiċatʹe ki waḣpe waṡtemna uƞ opemnipi kte ki yuwiƞyeyapi kta ċa kiglapi. Ho hehaƞ aƞpetu wak̇aƞ ċa wooṗe aiyeċel asnikiyapi.