Luke 22 - Lakota Portions

Jesus Anaptapi

¹ Wokiksuye woeċuƞ waƞ “Wiċiwaƞkab” eyapi na nakuƞ “Aġuyapi Blaska Yutapi” eyapi ċa wana kiyela ihuƞni.

² Waċekiye-wiċaṡa-oiṫaċaƞpi na wooṗe-awaƞyaƞkapi ki hena tuktognayaƞ anaḣmala Jesus ktewiċakiyapi kta awaċiƞpi. Owiċota ohaƞ oyuspapi haƞtaƞṡ oyate ki waƞwiċayaƞkapi kta ik̇okiṗapi.

Judas Eċa Jesus Aoyakiƞ Kte

³ Ak̄e nupa ki waƞji, Judas Iscariot ec̄iyapi ki, Wak̇aƞ-ṡic̄a ki ṫawaċiƞ kaṡkayuze.

⁴ Judas waċekiye-wiċaṡa-oiṫaċaƞ hena e na akiċita eya Tipi-Wak̇aƞ awaƞyaƞkapi oiṫaċaƞ waƞ hena ekta wiċai na tokeṡke Jesus oyuspa okihipi ki ob iwoglake.

⁵ Le lila iyokipipi na Judas kic̄aijupi kta gluṡtaƞpi.

⁶ Iyowiƞicʹiyiƞ na tuktognayaƞ anaḣmala Jesus oyuspapi kte ki awaċiƞ.

Jesus Wiċiwaƞkab Wotiƞ Kta Igluwiƞyeya

⁷ Ċa wana Aġuyapi Blaska Yutapi aƞpetu ki hihuƞni. Le aƞpetu ki nakuƞ Wiċiwaƞkab eyapi. Woeċuƞ ki le eċuƞhaƞ ṫaḣc̄a-ṡuƞkala ċiƞc̄ala wiċayutapi ċa wana kiċaƞwiċayapi.

⁸ Ċa Jesus Peter e na John wawiċaṡi, “Iyayapi na wokiksuye woeċuƞ waƞ Wiċiwaƞkab he woyute ki yuwiƞyeyapo,” eye.

⁹ Iyuƞġapi, “Tuktel woyute ki le uƞyuwiƞyeyapi kta hwo?” eyapi.

¹⁰ Jesus leċel awiċayupte, “Oṫuƞwahe el iyahuƞnipi ki, wiċaṡa waƞ mni ṫokṡu ċa atayapi kte. He ihakab ti ki ekta yapo.

¹¹ Na okiyakapo, ‘Wauƞspekiye ki tuktel ak̄e nupa ki ob wokiksuye woeċuƞ wotiƞ kte ki slolya ċiƞ.’

¹² Wiċaṡa ki tiwaƞkal yuok̇aƞ ċa nic̄ipazopi ktelo,” eye.

¹³ Ċa iyayapi na Jesus taku eye ki iyuha aiyeċel iyeyapi ċa waƞc̄agna woyute ki yuwiƞyeyapi.

Jesus Kiċi Ehake Wotapi

¹⁴ Jesus ak̄e nupa ki ob wotiƞ kta iyotake.

¹⁵ Na lewiċakiye, “Makakijiƞ kte ṡnihaƞni Wokiksuye Woeċuƞ wauƞtapi kte ki le lila awiyukc̄aƞ wauƞ.

¹⁶ Takuwe ki le tohaƞl mak̇asitomniya Wak̇aƞṫaƞka yuonihaƞpi ki nakeṡ leċeḣc̄i wotapi el ake omaṗa ktelo,” eye.

¹⁷ Wiyatke waƞ ic̄u na wopila eye, “Letaƞ iyuha yatkaƞpo,” eye.

¹⁸ “Takuwe ki le, tohaƞl Wak̇aƞṫaƞka kiċiuƞkinajiƞpi ki nakeṡ ake mniṡa blatkiƞ ktelo,” eye.

¹⁹ Na hehaƞl, aġuyapi blaska waƞ ic̄u na ċokaƞ yukse. Wiċakʹu na leye, “Le miṫaċaƞ ċa ċicʹupi. Yutapi na ṫokatakiya leċeḣc̄i miksuyapo,” eye.

²⁰ Wol-igluṡtaƞpi hehaƞ, Jesus ake wiyatke waƞ mniṡa ojula ċa ake ic̄u na leye, “Le we miṫawa yelo,” eye.

²¹ “Waƞji iglahomni na kaṡkapimayiƞ kte ki waglutapi lel ohaƞ yaƞke yelo.

²² Wiċaṡa-Ċiƞkṡitku ki he miye. Wak̇aƞṫaƞka eye ki iyeċel, wiċoni abluṡtaƞ kte, eyaṡ tuwe wiċaṡa waƞ makte ċiƞpi waƞ hena aomayake ki he lila oteḣi slolyiƞ ktelo.

²³ Le naḣʹuƞpi hehaƞ, kiċipasipi, tuwe ċa leċuƞ okihi hec̄i.

Tuwa Oiṫaċaƞ Kte Ki Akiċikinic̄api

²⁴ Na tuwa oiṫaċaƞ kte ki akiċikinic̄api.

²⁵ Ċa Jesus awiċayupte, “Mak̇a akaƞ wiċaṡa-yataƞpi ki oyate ki iṡiƞkċiƞya owiċakuwapi na k̇ohaƞ uƞṡiwiċalapi keyapi.

²⁶ Eyaṡ, niye heċuƞpi ṡni yo. Niohaƞ tuwa oiniṫaċaƞpi ki hena ihaƞkeya uƞṡiicʹiyapo.

²⁷ Ċa tuwa ihaƞkeya waċiƞṫaƞka hwo; waƞji waglutapi ekta yaƞke ki he, naiƞṡ waƞji waokiyiƞ na wakpamni ki he e hwo? Le ablezapo, miye uƞṡiicʹiya wauƞ welo.

²⁸ Niyeċa, oteḣi waƞblake ki eċuƞhaƞ misakib yauƞpelo.

²⁹ Ċa takuku oiniṫaċaƞpi ki he wowaṡʹake ċicʹupi kte, Atewaye ki miṡ-eya wowaṡʹake makʹu ki aiyeċel.

³⁰ Ċa tohaƞl oimaṫaċaƞ ki misakib wayatapi ktelo. Israel el tioṡpaye igluotapi ak̄e nupa hena oiniṫaċaƞpi ktelo.”

Peter Jesus Slolye Ṡni Kuƞziƞ Kte

³¹ Hehaƞl Jesus Peter hekiye, “Simon Peter, Wak̇aƞ-ṡic̄a ki iniyuṫapi ċiƞ, ṡic̄e ki waṡte etaƞhaƞ nic̄akak̇aƞpi ċiƞ yelo.

³² Simon, wowic̄ala niṫawa ki waṡʹakiƞ kte ki ċec̄ic̄iċiye. Tohaƞl okakṡaƞ el mayaku ki, obnitu ki lena iƞṡ-eya waṡʹagwiċaya yo,” eye.

³³ Peter leye, “Iṫaċaƞ, owiċakaṡke ekta nihakab wau kte, na niktepi ki miṡ-eya maktepi okihipelo.”

³⁴ Eyaṡ Jesus leċel ayupte, “Peter, le namic̄iḣʹuƞ wo, k̇okayaḣʹaƞla ki aƞpo hoṫuƞ ṡnihaƞni, yamni kigleya slolmayaye ki anayakiḣmi ktelo,” eye.

Mazaska Ognake, Wopaḣte, Na Mila Haƞska

³⁵ Leya iwiċayuƞġe, “Mazaska ognake naiƞṡ wopaḣte naiƞṡ haƞpa ċola iyayeċiyapi hehaƞ takuƞl iniyuċaƞpi hwo?” eye. “Takuni,” eya ayuptapi.

³⁶ Na lewiċakiye, “Eyaṡ wana, tuwa mazaska ognake naiƞṡ wopaḣte luhapi haƞtaƞṡ ikikc̄upo, na mila haƞska ninic̄api haƞtaƞṡ, ogle wiyoṗekiyapi na waƞji oṗeicʹiṫuƞpo.

³⁷ Leċuƞpo, ċiƞ Wowapi-Wak̇aƞ el leċeḣc̄i owa yaƞke: Wooṗe kaksapi ki hena oṗamayapi ki eċani iyeċetu ktelo,” eye.

³⁸ Yuƞk̇aƞ obtu ki leyapi, “Waƞyaƞka yo, Iṫaċaƞ, mila haƞska ki nupa yelo,” eyapi. Jesus “henala” eye.

Jesus Wigli K̇aƞta Paha Eyapi Ċa El Waċekiye

³⁹ Oṫuƞwahe etaƞhaƞ hinaṗiƞ na heċiya yapi sʹa ċa Wigli K̇aƞta Paha eyapi ċa etkiya iyaye. Ihakab-uƞpi ki kiċi iyayapi.

⁴⁰ Hel hihuƞnipi hehaƞ Jesus hewiċakiye, “Ohiƞniyaƞ waċekiyapo, heċel miḣeyab iniyutaƞpi kte ṡni,” eye.

⁴¹ Wiċitohaƞya iyayiƞ na ṗamagle waċekiya iyotake.

⁴² “Ate, oyakihi haƞtaƞṡ, makakijiƞ kte ki le yuḣeyab imic̄ic̄u wo. Eyaṡ taku yaċiƞ ki eċel eċamu ktelo,” eye.

⁴³ Wak̇aƞṫaƞka ṫaogligle waƞ ṫaƞiƞicʹiyiƞ na Jesus blihelye.

⁴⁴ Lila ċaƞteṡic̄a ċa hehaƞl aotaƞhaƞ waċekiye. Kakije heuƞ temni ki we iyeċel ṡʹeṡʹe.

⁴⁵ Waċekiye igluṡtaƞ hehaƞ ikpanajiƞ na ihakab-uƞpi ki ekta wiċaki. Ċaƞteṡic̄a sam-iyayapi heuƞ iṡtimapi.

⁴⁶ Eyaṡ Jesus wiċayuḣic̄e, “Iṡtimapi ṡni yo. Kiktapi na waċekiyapo, heċel miḣeyab iniyutaƞpi kte ṡni yelo,” eye.

Jesus Oyuspapi

⁴⁷ Woglake ki eċuƞhaƞ, wiċota ahihuƞni. Ak̄e nupa ki waƞji, Judas ec̄iyapi ki eċa awiċahi. Kiyela ihuƞni hehaƞ Jesus ṫaṗuƞ el ipuṫake.

⁴⁸ Yuƞk̇aƞ Jesus hekiye, “Judas, takuwe Wiċaṡa-Ċiƞkṡitku ki leċel wiyoṗemayaya hwo?” eye.

⁴⁹ Jesus obtu ki ṡic̄aya kte ki waƞyaƞkapi hehaƞ Jesus iyuƞġapi, “Iṫaċaƞ mila haƞska uƞ nauƞnic̄ijiƞpi yaċiƞ hwo?” eyapi.

⁵⁰ Yuƞk̇aƞ, waƞji waċekiye-wiċaṡa-oiṫaċaƞḣc̄a ṫawowaṡi ki nuġe kaksa iḣpeye.

⁵¹ Eyaṡ Jesus kuṡeya hoṫaƞiƞ, “Heċuƞp ṡni yo!” eye. Wiċaṡa ki nuġe ki eyuṫaƞ na asniye.

⁵² Waċekiye-wiċaṡa-oiṫaċaƞpi na takuku oiṫaċaƞpi eya anagwakapi uƞ hipi ċa Jesus hewiċakiye, “Wamanu wiċaṡa wok̇okṗeka ċa hiyoyahipi iyeċel mila haƞska na ċaƞ gluha mahiyoyahipelo.

⁵³ Wana oko waƞji aƞpetu iyohila, Tipi-Wak̇aƞ okṡaƞ wauƞ eyaṡ omayaluspapi ṡni yelo. Eyaṡ le aƞpetu ki wowaṡʹake luhapi kte ki Wak̇aƞṫaƞka iyowiƞniċiyapelo. Le aƞpetu ki Wak̇aƞ-ṡic̄a wowaṡʹake yuha yelo,” eye.

Peter Jesus Slolye Ṡni Kuƞze

⁵⁴ Jesus yupaḣ oyuspapi na waċekiye-wiċaṡa-oiṫaċaƞḣc̄a ki ti ekta aipi. Peter itohaƞ wiċihakab uƞ.

⁵⁵ Lel iṫaƞkal ċetipi na makikc̄eya iyotakapi ċa Peter iƞṡ-eya ohaƞ iyotake.

⁵⁶ Yuƞk̇aƞ wik̇oṡkalaka waƞ wowaṡiyapi ċa Peter iyekiyiƞ na hekiye, “Wiċaṡa ki le Jesus obtu ki waƞji,” eye.

⁵⁷ Eyaṡ Peter wic̄ala ṡni, “Hiya! Ataṡ slolwaye ṡni yelo,” eye.

⁵⁸ Iyeċani, tuwa ake iyekiyiƞ na hekiye, “Jesus obtu ki niwaƞji yelo,” eye. Eyaṡ ake Peter wic̄ala ṡni, “He mawaƞji ṡni yelo,” eye.

⁵⁹ Oaṗe waƞji wahehaƞl ak̄e waƞji heye, “Wiċaṡa ki le Jesus kiċic̄a iteke ċiƞ nupiƞ Galilee mak̇oċe etaƞhaƞpelo,” eye.

⁶⁰ Eyaṡ Peter ake wic̄ala ṡni, “Takuwe hehe ki slolwaye ṡni yelo,” eye. Eyaṡtaƞ ṡnihaƞni, k̇okayaḣʹaƞla waƞ hoṫuƞ.

⁶¹ Iṫaċaƞ ki igluhomni na Peter ayuta. Peter Iṫaċaƞ ki iṫokab waeye ki kiksuye. Hehaƞ heye, “K̇okayaḣʹaƞla ki aƞpo hoṫuƞ ṡnihaƞni slolmayaye ki yamni kigle anayakiḣmi ktelo,” eye.

⁶² Ċa Peter hetaƞhaƞ ḣeyab iyayiƞ na iṡnaċeye.

Jesus Oiḣaḣapi Na Aṗapi

⁶³ Wiċaṡa eya Jesus awaƞyaƞkapi ki oiḣaḣapi na aṗapi.

⁶⁴ Iṡta ṗaḣtapi na iyopaṡtakapi, “Wiċaṡa-wak̇aƞ-waayaṫaƞiƞ heniċa ki uƞkipazopo. Tuwe ċa aniṗe ki oyaka yo,” eyapi.

⁶⁵ Na isamsam yaṡic̄api.

Jesus Omnic̄iye-Ṫaƞka Iṫokab Wiyuƞġapi

⁶⁶ Ihihaƞni hehaƞ, waċekiye-wiċaṡa-oiṫaċaƞpi ki e na wooṗe-awaƞyaƞkapi ki e na tuwaoka oyate oiṫaċaƞpi waƞ hena igluwitayapi, ċa akiċita ki wiċiṫokab Jesus ahiglepi.

⁶⁷ Wayasupi ki le oiṫaċaƞpi ki Jesus iyuƞġapi, “Messiah ki niye haƞtaƞṡ, lel oglaka yo,” eyapi. Eyaṡ leċel awiċayupte, “Oċic̄iyakapi haƞtaƞṡ ċetʹuƞmayaglapi ktelo,” eye.

⁶⁸ “Na takuwe ċetʹuƞmayaglapi ki iċiyuƞġapi haƞtaƞṡ, amayaluptapi kte ṡni yelo.

⁶⁹ Letaƞ ṫokatakiya, Wiċaṡa-Ċiƞkṡitku ki Wak̇aƞṫaƞka kiċi ċatkutaƞhaƞ yaƞkiƞ ktelo,” eye.

⁷⁰ Ċa leya iyuƞġapi, “Ċa Wak̇aƞṫaƞka-Ċiƞhiƞtku ki he niye hwo?” eyapi. “Ċiƞ niyeṡ hehapelo,” eya Jesus awiċayupte.

⁷¹ Yuƞk̇aƞ ake heyapi, “Isam takuni uƞpasipi kte ṡni. Iyuƞk̇ala oicʹiglakelo,” eyapi.