Luke 18 - Lakota Portions

Wayasu-Wiċaṡa Ki E Na Wiwazic̄a Ki Wiyaċiƞpi

¹ Jesus ihakab-uƞpi ki hena ohiƞniyaƞ waċekiya uƞpi na waċiƞṫaƞgya uƞpi kte ki heuƞ wiyaċiƞpi waƞ owiċakiyake.

² Leye, “Oṫuƞwahe waƞ el, wayasu-wiċaṡa waƞ Wak̇aƞṫaƞka wic̄ak̇ela ṡni na oyate ki uƞṡiwiċala ṡni ċa uƞ.

³ Ho yuƞk̇aƞ, oṫuƞwahe ki hel nakuƞ wiwazic̄a waƞ uƞ, ċa wayasu-wiċaṡa he iṫokab i hiƞ na leċel ṡna wiyuƞġahe, ‘Tuwe waƞji waṡteṡniya eċamic̄iuƞ ki he mic̄iyuoṫaƞ ye,’ ekiye.

⁴ Owatohaƞ, wayasu-wiċaṡa ki wic̄ala ṡni eyaṡ haƞkeya leċel aicʹibleze, ‘Wak̇aƞṫaƞka wic̄awala ṡni naiƞṡ oyate ki uƞṡiwiċawala ṡni,

⁵ eyaṡ wiwazic̄a ki le owakiyiƞ kta waṡteke, heċamu ṡni ki naġiyemayiƞ ktelo,’ eċiƞ,” eya Jesus owiċakiyake.

⁶ Jesus ake leye, “Wayasu-wiċaṡa owoṫaƞla uƞ ṡni he waeye ki iyukc̄aƞpo.

⁷ Wak̇aƞṫaƞka aƞpetu iyohila ċekiyapi haƞtaƞṡ nawiċaḣʹuƞ na owiċakiyiƞ kte.

⁸ Oḣʹaƞk̇oya wookiye wiċakʹu ktelo. Mak̇a akaƞ wahi ki tuwa wic̄amala kta hwo?” eya iwiċayuƞġe.

Pharisee Na Waḣpa-Wokaiju-Pahi Ki

⁹ Jesus oyate eya waḣʹaƞicʹilapi na tuwe ki iyuha wiċiwaƞkabicʹilapi ċa hena wiċoyake le owiċakiyake:

¹⁰ Wiċaṡa num waċekiyapi kta ċa Tipi-Wak̇aƞ el ipi. Waƞji Pharisee heċa na uƞma ki iƞṡ waḣpa-wokaiju-pahi heċa.

¹¹ Pharisee ki le iṡnala waċekiye, ‘Wak̇aƞṫaƞka, womahitike ṡni naiƞṡ ḣmiya waeċamu ṡni naiƞṡ miṫawic̄u hetaƞhaƞ ipayeḣ waṡkaƞ ṡni ki hena wopila eċic̄iye. Waḣpa-wokaiju-pahi ki he aiyeċel opimicʹiye ṡni ki he iyomakipi.

¹² Oko iyohila, nupaċaƞ akiḣʹaƞmicʹiye na wawakamna ki he huƞḣ oċic̄iye,’ eye.

¹³ Waḣpa-wokaiju-pahi ki itohaƞya najiƞ eyaṡ iye maḣpiyatakiya etuƞwiƞ kte ki he ikipi ṡni keċiƞ. Waeċuƞ ki he iyokiṡic̄e heuƞ ṗamagle inajiƞ na ċekiye, ‘Wak̇aƞṫaƞka, uƞṡimala yo, wowaḣtani gluha nawajiƞ yelo,’ eye.

¹⁴ Yuƞk̇aƞ Jesus hekiye, “Wiċaṡa lenauƞs kiglapi hehaƞ, Pharisee ki he e ṡni eyaṡ waḣpa-wokaiju-pahi he eċa Wak̇aƞṫaƞka uƞṡila. Tuwa nigluwaƞkatuyapi haƞtaƞṡ Wak̇aƞṫaƞka pahukulniyuziƞ kte, eyaṡ uƞṡinicʹiya haƞtaƞṡ, niyuonihaƞpi ktelo,” eye.

Jesus Wak̇aƞyeja Ki Wiċayawaṡte

¹⁵ Oyate eya huƞḣ ċiƞc̄api ki Jesus wiċayawaṡte kta ċa el wiċaglohipi. Eyaṡ ihakab-uƞpi ki leċuƞpi waƞwiċayaƞkapi hehaƞ Jesus iksabye ṡni wiċaṡipi

¹⁶ ċa Jesus wak̇aƞyeja ki el wiċakiċo na leye, “Wak̇aƞyeja ki el mauwiċakiyapo. Anawiċaptapi ṡni yo. Oyate ki wak̇aƞyeja lena iyeċel Wak̇aƞṫaƞka kiċi uƞpi kta waṡtekelo.

¹⁷ Wak̇aƞṫaƞka ṫawokiċuƞze ki he wak̇aƞyeja iyeċel, ec̄ela timahel iyayapi ktelo,”eye.

Wiċaṡa Waƞ Wijic̄a Na Waoiṫaċaƞke

¹⁸ Wiċaṡa waƞ waoiṫaċaƞke waƞ he Jesus leċel wiyuƞġe, “Wauƞspewiċakiya waṡte, tokeṡke eċamu yuƞk̇aƞ wiċoni oihaƞke wanic̄e ki he waƞblakiƞ kta hwo?” eya iyuƞġe.

¹⁹ Jesus leċel ayupte, “Takuwe mawaṡte keha hwo? Wak̇aƞṫaƞka ec̄ela waṡte yelo.

²⁰ Ho wooṗe wak̇aƞ ki slolyaye: ‘Tuwa luziƞ naiƞṡ hiƞgnayayapi haƞtaƞṡ owoṫaƞla uƞpo. Tiwiċaktepi ṡni naiƞṡ wamanupi ṡni yo. Okiċiwak̇aƞk̇aƞpi ṡni yo. Na niyate na nihuƞ wiċagluonihaƞpo,’” eye.

²¹ Yuƞk̇aƞ wiċaṡa ki Jesus hekiye, “Wooṗe wak̇aƞ ki lena maṫec̄a hehaƞtaƞ yuha mawani yelo,” eye.

²² Jesus le naḣʹuƞ hehaƞ heye, “Taku waƞ ehake eċanu ktelo. Waluha ki hena iyuha wiyoṗekiya yo. Na iyayiƞ na mazaska ki uƞṡike ki wiċakʹu wo. Hel ogna Wak̇aƞṫaƞka ṫawokiċuƞze ekta wijic̄a yauƞ ktelo. Na hehaƞl hiyu na mihakab uƞ wo,” eye.

²³ Wiċaṡa ki le naḣʹuƞ hehaƞ ċaƞteṡic̄e, eċiƞ lila wijic̄a ċa heuƞ.

²⁴ Jesus wiċaṡa ki le lila ċaƞteṡic̄e ki ableza ċa hekiye, “Wijic̄api ki hena Wak̇aƞṫaƞka ṫawokiċuƞze slolyapi kta he lila oeċuƞṡic̄e.

²⁵ Ṫahiƞṡpa ċa haḣuƞta ooyaze ogna waniyapi ṫaƞka waƞji oyazapi iyeċel oeċuƞṡic̄e yelo,” eye.

²⁶ Oyate ki le naḣʹuƞpi hehaƞ leċel wiyuƞġapi, “Leċetu kta haƞtaƞṡ tokeṡke tuwa Wak̇aƞṫaƞka ṫawokiċuƞze ekta ya okihi hwo?” eyapi.

²⁷ Jesus awiċayupte, “Oyate ki takuku okihipi ṡni eyaṡ Wak̇aƞṫaƞka taku keyaṡ okihi yelo,” eye.

²⁸ Yuƞk̇aƞ Peter heye, “Kiksuya yo, nihakab uƞkʹuƞpi kta hehaƞ taku ki iyuha uƞkayuṡtaƞpelo,” eye.

^29-30 Jesus leċel ayupte, “Tuwe keyaṡ titakuye na ṫawic̄u na ċiƞc̄a hena uƞṡiwiċakila eyaṡ Wak̇aƞṫaƞka ṫawokiċuƞze ki he ṫokaheya haƞtaƞṡ Wak̇aƞṫaƞka wiċayawaṡte kte na wiċoni oihaƞke ṡni waƞ u ki he yuhakiyiƞ ktelo,” eye.

Jesus Tʹiƞ Kte Ki Ake Oglake

³¹ Jesus ihakab-uƞpi ak̄e nupa ki yuḣeyab iwiċac̄u na hewiċakiye, “Wana Jerusalem etkiya uƞyapi ktelo. Wiċaṡa-wak̇aƞ-waayaṫaƞiƞ ki Wiċaṡa-Ċiƞkṡitku ki toketu kta keyapi ki oṫuƞwahe hel heċetu ktelo.

³² Jew oiṫaċaƞ ki Gentile oyate ki Wiċaṡa-Ċiƞkṡitku kiċaƞyewiċakiyapi kte. Oiḣapi na aṫaṡoṡapi na iṡiƞkċiƞ okuwapi ktelo.

³³ Lila ksuyeyapi na ktepi kte eyaṡ aƞpetu ic̄iyamni ki kini ktelo, eya owiċakiyake.

³⁴ Ihakab-uƞpi ki Jesus taku iwoglake ki taƞyaƞkel ablezapi ṡni, taku ċa k̇e ki slolyapi ṡni ċa.

Jesus Wiċaṡa Uƞṡika Waƞ Iṡtaġuƞġa Ċa Asniye

³⁵ Jesus Jericho oṫuƞwahe k̇aƞyela ya hehaƞ, wiċaṡa iṡtaġuƞġa waƞ ċaƞku aglagla woċiƞ yaƞke.

³⁶ Iṫokab oyate ki hiyayapi ki nawiċaḣʹuƞ na taku tok̇a ki slolya ċiƞ.

³⁷ Oyate ki huƞḣ okiyakapi, Nazareth etaƞhaƞ wiċaṡa waƞ Jesus ec̄iyapi he eċa opta hiyaye ki.

³⁸ Ċa wiċaṡa iṡtaġuƞġe ki kipaƞ, “Jesus, David ċiƞkṡitku, uƞṡimala yo!” eye.

³⁹ Oyate eya Jesus kiċic̄api waƞ hena wiċaṡa le yainila waċiƞpi, eyaṡ isam hoṫaƞgya kipaƞ, “David ċiƞkṡitku, uƞṡimala yo!” eya kipaƞ.

⁴⁰ Jesus inajiƞ na oyate ki wiċaṡa ki le el au wiċaṡi. Kiyela ahipi hehaƞ Jesus hekiye,

⁴¹ “Taku ċa iwaċiƞmayayiƞ kta hwo?” eya iyuƞġe. “Iṫaċaƞ, waƞblaka owakihi waċiƞ yelo!” eye.

⁴² Jesus leċel ayupte, “Tuƞwaƞ yo. Waayableziƞ ktelo. Wowic̄ala niwaṡʹake ki heuƞ iṡta ki anic̄isni yelo,” eye.

⁴³ Yuƞk̇aƞ wiċaṡa ki le waƞc̄agna waƞyaƞka okihi ċa Jesus kiċi iyayiƞ na Wak̇aƞṫaƞka yaonihaƞ. Oyate ki le waƞyaƞkapi hehaƞ iƞṡ-eya Wak̇aƞṫaƞka yaonihaƞpi.