Luke 17 - Lakota Portions

Wagluṡnapi

¹ Hehaƞl ihakab-uƞpi ki hewiċakiye, Aƞpetu iyohila oyate ki taku gluṡnapi kte ki he yaƞke na tuwe ċa lena ogluṡilwiċakiye ki he woṡic̄e aglihiƞ ktelo.

² Na tuwa leċel eċaċa waeċuƞpi ki he iyeṡ iƞyaƞ waƞji napʹiƞwiċakiyapi na mniowaƞc̄a el oiḣpewiċayapi ki waṡte kte, okenaiƞṡ uƞṡiwiċala pic̄a waƞ hena nakuƞ ogluṡilwiċakiyapi ktelo.

³ Ċa iwaktaya waeċuƞpo. Tuwa wic̄amalapi hena takuƞl gluṡnapi haƞtaƞṡ iwiċayaksapapo na etaƞ ipayeḣya niċuwapi eyaṡ aicʹiblezapi na nape oniyuspapi ċiƞpi haƞtaƞṡ ċaƞtewaṡteya napewiċayuzapo.

⁴ Na tuwa taƞyaƞ niċuwa ṡni na nakuƞ aƞpetu opta ṡakowiƞ akigle ċaƞteniyuṡic̄e kʹeyaṡ iċaƞteṡic̄eṡniya aicʹibleziƞ na napeniyuza ċiƞ haƞtaƞṡ, ċaƞtewaṡteya napeyuza yo.

Wowic̄ala

⁵ Yuƞk̇aƞ wahoṡiyapi ki Jesus hekiyapi, “Wowic̄ala ki uƞkic̄iyuwaṡʹaka yo!” eyapi.

⁶ Jesus leċel awiċayupte: “Wak̇aƞṫaƞka etkiya wowic̄ala luhapi ki he tohaƞyaƞḣc̄i c̄ikʹala eṡa wowic̄ala niṫawa ki he waṡʹaka haƞtaƞṡ, ċaƞ waƞ hute mahetuya he ki le, ‘Kakiya ḣeyab inajiƞ yo,’ ehapi haƞtaƞṡ iyeċetu ktelo,” eye.

Wayaka Niṫawa

⁷ Wayaka niṫawa ki mak̇a-yublu naiƞṡ ṫaḣc̄a-ṡuƞkala awaƞwiċayaƞke he wowaṡi igluṡtaƞ na ḣtayetu eċiyataƞhaƞ glihuƞni ki leċel ehiƞ kta hwo, “Waƞ taƞyaƞ yagli yelo, lel timahel iyotakiƞ na takuƞlḣc̄i yatkiƞ na yuta yo,” ehiƞ kta hwo?

⁸ Hiya, heċel ehapi kte ṡni. Uƞma etkiya ċa ehapi kte, wayaka niṫawa ki yuġo glihuƞni eyaṡ wayaṡi kte, “Hayapi ṫokc̄a etaƞ kicʹuƞ na loliḣʹaƞ yo, heċel taƞyaƞ wawatiƞ na ipimicʹiyiƞ ktelo, tohaƞl migluṡtaƞ ki hehaƞl niṡ-eya wayata oyakihi ktelo,” ehiƞ ktelo.

⁹ Wayakawiċayapi hena wowaṡi eċuƞpi ċaƞ pilawiċayayapi ṡni, eċiƞ wowaṡi ki he ṫawapi heuƞ.

¹⁰ Na niṡ-eya heċel awanicʹiċiƞpi kte, taku eċuƞ pic̄a hena iyuha nigluṡtaƞpi ki hehapi kte, “Wayaka heuƞċapi na wowaṡi ki le uƞkiṫawapi,” ehapi ktelo.

Wiċaṡa Wikc̄emna Asniwiċayapi

¹¹ Samaria na Galilee oko ognayaƞ Jerusalem etkiya Jesus oomani kiċaġe.

¹² Oṫuƞwahe waƞ el i yuƞk̇aƞ wiċaṡa wikc̄emna woyazaƞ ṡic̄a waƞ ha ki ḣaƞḣaƞpi ċa eċec̄api, hena Jesus najiƞ etkiya iwatohaƞl hinajiƞpi na hoṫaƞiƞpi,

¹³ “Jesus, Iṫaċaƞ, uƞṡiuƞlapo!” eyapi.

¹⁴ Jesus awiċayuta na hewiċakiye, “Iyayapi na waċekiye-wiċaṡa ki hena iṫokabya anic̄isnipi ki he kpazopo,” eye. Yuƞk̇aƞ etkiya yapi eċuƞhaƞ Jesus asniwiċaye.

¹⁵ Woyazaƞ etaƞhaƞ waƞji asniyapi he aicʹibleziƞ na hektakiya iyuṡkiƞya gli.

¹⁶ Jesus iṫokabya ṗamagle inajiƞ na wopila ekiye. Wiċaṡa ki le Samaria hetaƞhaƞ.

¹⁷ Jesus leye, “Tokenaiƞṡ wiċaṡa wikc̄emna asniwiċawaye keċami kʹuƞ, uƞma ki iƞṡ tokiyab iyayapi hwo?”

¹⁸ Na lena etaƞhaƞ waƞjilaḣc̄i hektakiya gli na Wak̇aƞṫaƞka wopila ekiye na he oyate ṫokc̄a heċa.

¹⁹ Hehaƞl Jesus wiċaṡa ki le hekiye, “Wak̇aƞṫaƞka wic̄ayala he uƞ anic̄isni yelo, inajiƞ na iyaya yo,” eye.

Wak̇aƞṫaƞka Ṫawokiċuƞze Ki U Kte

²⁰ Pharisees eya tohaƞl Wak̇aƞṫaƞka ṫawokiċuƞze he u kte ki slolya ċiƞpi na Jesus iyuƞġapi. Yuƞk̇aƞ leċel awiċayupte, “Wak̇aƞṫaƞka ṫawokiċuƞze he tokel u kte ki waƞlakapi oyakihipi kte ṡni.

²¹ ‘Waƞyaƞkapo, he e yelo! Naiƞṡ ka e yelo!’ ehapi oyakihipi kte ṡni, eċiƞ Wak̇aƞṫaƞka ṫawokiċuƞze ki he nikiyela uƞ ṡk̇a ayablezapi oyakihipi ṡni yelo,” eye.

²² Jesus ihakab-uƞpi ki hewiċakiye, “Wiċaṡa-Ċiƞkṡitku ṫaaƞpetu ċa u, oyate ki oiṫaċaƞ ki he waƞlakapi kte. Hehaƞl mikiyela yauƞ yaċiƞpi kʹeyaṡ oyakihipi kte ṡni yelo.

²³ Oyate eya henic̄iyapi kte, ‘Waƞyaƞkapo! He e yelo, naiƞṡ ka e yelo,’ eyapi kte. Kakel nignayaƞ waċiƞpi kte eyaṡ eċel eċuƞpi ṡni yo.

²⁴ Tohaƞl Wiċaṡa-Ċiƞkṡitku he ake ku ki wakiƞyaƞtuƞwaƞpi iyeċel ṫaƞiƞ kte.

²⁵ Eyaṡ leċetu ṡnihaƞni ṫokaheya, wiċoiċaġe ki le Wiċaṡa-Ċiƞkṡitku kakije ki waƞyaƞgkiyapi kte.

²⁶ Tohaƞl Wiċaṡa-Ċiƞkṡitku ki gli kihaƞ, wiċoiċaġe waƞ iyewiċaye ki he Noah niuƞ hehaƞ tokel uƞpi waƞ he ake iyeċel iyewiċayiƞ kte.

²⁷ Wata ṫaƞka waƞ Noah kaġe ċa waƞyaƞkapi eyaṡ ċetʹuƞglapi na takuni ik̇oṗapi ṡni. Noah wata-ṫaƞka timahel kigle iyagleya kiċiyuzapi na awoicʹihaƞpi ċa oyate ki mnitʹapi.

²⁸ Nahaƞ wiċaṡa waƞ Lot ec̄iyapi ċa nakuƞ niuƞ hehaƞ iƞṡ-eya wiċoiċaġe ki he takuni ik̇oṗapiṡniya uƞpi, taku woyuha hena ec̄elayapi na taƞyaƞ wotapi na wayatkaƞpi.

²⁹ Aƞpetu waƞ el Lot ec̄iyapi ki he oṫuƞwahe waƞ Sodom eyapi ki he hetaƞhaƞ kinaṗe eċuƞhaƞlaḣc̄i maḣpiyataƞhaƞ maġaju iyeċel ṗeta eya ileḣya hiƞhe na oyate ki iyuha ḣugnaġapi.

³⁰ Tohaƞl Wiċaṡa-Ċiƞkṡitku ki he ku ki ake iyeċetu ktelo.

³¹ Aƞpetu ki he tohaƞl u ki tuwa tiwaƞkal uƞpi hena hukutakiya kupi na waikikc̄upi okihipi kte ṡni, etaƞ kakiya wowaṡi eċuƞpi ki he na ti etkiya glapi na waikikc̄upi okihipi kte ṡni.

³² Lot ec̄iyapi ki he ṫawic̄u ki taku akiṗa ki he kiksuyapo.

³³ Tuwe mak̇a akaƞl wiċoni ki he tekiḣila haƞtaƞṡ gnuni kte. Na tuwe miye eċiyataƞhaƞ wiċoni gnuni haƞtaƞṡ wiċoni oihaƞke wanic̄e yuha kte.

³⁴ Haƞhepi el num iṡtimapi kte, eyaṡ waƞjila ic̄upi na uƞma ki e na ayuṡtaƞpi kte.

³⁵ Wiƞyaƞ num nakuƞ wowaṡi eċuƞpi kte, wagmiza kiċaƞyapi kte eyaṡ waƞjila ic̄upi na uƞma ki ena ayuṡtaƞpi ktelo.”

³⁷ Hehaƞl ihakab-uƞpi ki Jesus iyuƞġapi, “Iṫaċaƞ, tuktetu ċa lena ṫaƞiƞ kta hwo?” eyapi. Yuƞk̇aƞ Jesus heye, “Tuktel taku tʹa haƞtaƞṡ hetu ċa hec̄a hena aokiƞyaƞpelo,” eye.