Luke 15 - Lakota Portions

Ṫaḣc̄a-ṡuƞkala Wiċagnunipi

¹ Waḣpa-wokaiju-pahipi ki na waḣtanipi sʹa hena Jesus taku eye ki hena naḣʹuƞ ċiƞpi na paokiyuṫapi.

² Ċaƞke Moses-ṫawooṗe-awaƞyaƞkapi ki e na Pharisees waƞ hena iyokipipi ṡni na heyapi, “Wiċaṡa ki le waḣtanipi sʹa ob wotelo.”

³ Hehaƞl Jesus wiyaċiƞpi waƞ owiċakiyake,

⁴ “Ṫaḣc̄a-ṡuƞkala opawiƞġe wiċaluha ki he waƞji yagnuni haƞtaƞṡ tokel eċanu kta hwo? Uƞma ki hena awiċaluṡtaƞpi na waƞji nuni ki he oyakile kta hwo?

⁵ Na tohaƞl iyeyakiye ki lila iluṡkiƞ na ṫaḣc̄a-ṡuƞkala ki he gluha kicʹiƞ yagni ktelo.

⁶ Niṫak̇ola na oyate nikiyela tipi waƞ hena hewiċayakiyiƞ kte, ‘Anamic̄iġoptaƞpo! Ṫaḣc̄a-ṡuƞkala waƞ wagnuni kʹuƞ iyewakiye wimic̄iyuṡkiƞpo,’ ehiƞ ktelo.”

⁷ Hehaƞl Jesus heye, “He iyeċel, tuwa waḣtani sʹa eyaṡ Wak̇aƞṫaƞka el uƞṡiicʹiya haƞtaƞṡ maḣpiyata wowiyuṡkiƞ ṫaƞka ktelo.”

Mazaska Gnunipi Wiyaċiƞpi

⁸ Na ake wiyaċiƞpi waƞ owiċakiyake, “Wiƞyaƞ waƞ aƞpetu waƞjilya wic̄aiju ikipi ki he wikc̄emna yuha yuƞk̇aƞ he waƞji gnuni ċa ṗetijaƞjaƞ ilekiye na owaƞke ki glahiƞtiƞ

⁹ na kitaƞḣc̄i iyekiye hehaƞ lila wiyuṡkiƞ okile. Ṫamaṡke hena hewiċakiye, ‘Mazaska waƞ wagnuni he iyewakiye, wibluṡkiƞ uƞ woċicʹupi kte!’ eye.

¹⁰ He iyeċel tohaƞl tuwa Wak̇aƞṫaƞka etkiya uƞṡiicʹiya haƞtaƞṡ, ṫaogligle waƞ hena lila iyuṡkiƞpi ktelo,” eye.

Ċiƞkṡitku Waƞji Ṫehaƞl Iyaye Waƞ Onuniyata Uƞ

¹¹ Jesus ake wiyaċiƞpi waƞ owiċakiyake, “Wiċaṡa waƞ ċiƞkṡitku nupa.

¹² Hakakta he atkuku ki hekiye, ‘Woiyowaja miṫawa ki hena miċu wo,’ eye. Ċa atkuku ki woyuha hena kinuk̇aƞya wiċakʹu.

¹³ Aƞpetu tona iyohakab hakakta waƞ he waṗakiḣtiƞ na mak̇oċe waƞ iṫehaƞ yaƞka ċa ekta iċimani iyaye na hel woyuha iyuha otuya glusote, waableze ṡni heuƞ.

¹⁴ Wahehaƞlya mak̇oċe waƞ el uƞ ki he wiċaakiḣʹaƞ ṫaƞka waƞ akiṗapi, ċa takuni yute ṡni uƞ.

¹⁵ Mak̇oċe le el wiċaṡa waƞ wowaṡi ekic̄iċuƞ, kukuṡe awaƞyaƞgkiye.

¹⁶ Lila loċiƞ uƞ taku kukuṡe ṫawoyute hetaƞ yuta ċiƞ eyaṡ tuweni takuni kʹu ṡni.

¹⁷ Ehakeḣc̄i aicʹibleze na heye, ‘Ate ṫawowaṡi hena e kʹeyaṡ aġuyapi iyena yuhapi tk̇a le takuni blute ṡni uƞ amakiḣʹaƞ yelo!’ eye.

¹⁸ ‘Ate ti ekta wagni na leċel eṗiƞ kte, “Ate, Wak̇aƞṫaƞka e na niye nakuƞ niṫokabya taku ota wagluṡna na naokpaniyaƞ nawajiƞ yelo.

¹⁹ Wowaṡi niṫawa ki he iyeċel makuwa yo, eċiƞ hehaƞya takuni imakipi ṡni yelo,” eṗiƞ kte.’

²⁰ Ċa ikpanajiƞ na atkuku ti etkiya kigle. “Nahaƞḣc̄i atkuku ti watohaƞl ku eṡa, atkuku ki iyekiyiƞ na uƞṡikila uƞ etkiya iƞyaƞgyaƞg ye na ṗoski gluze.

²¹ Ċiƞkṡitku ki heye, ‘Ate, Wak̇aƞṫaƞka na niye niṫokabya taku ota wagluṡna na naokpaniyaƞ nawajiƞ, hehaƞlya tiwahe ki le mawaƞji kta imakipi ṡni yelo,’ eye.

²² Eyaṡ atkuku ṫawowaṡi ki hewiċakiye, ‘Inaḣni iyayapi na hayapi iyotaƞ waṡte ki he aupi na le uƞkiyapo. Napsioḣli waƞji uƞkiyapo na haƞpa etaƞ ohekiyapo.

²³ Na ptehiƞc̄ala ċebyapi waƞ he yuwiƞyeyapo, heċel wowiyuṡkiƞ uƞ wauƞtapi kte.

²⁴ Le miċiƞkṡi hehaƞya waƞweglakiƞ kte ṡni sec̄e kʹuƞ taƞyaƞ ti glihuƞni yelo,’ eye. Na wowiyuṡkiƞ uƞ yuonihaƞpi.

²⁵ “Ċiƞkṡitku ṫokaṗa waƞ he owojutaƞhaƞ glihuƞni yuƞk̇aƞ lowaƞwaƞ waċipi ki naḣʹuƞ.

²⁶ Wowaṡi eċuƞpi ki waƞji iyuƞġe, ‘Le taktok̇a hwo?’ eye.

²⁷ Leċel ayupte, ‘Nisuƞkala taƞyaƞ glihuƞni heuƞ niyate wowiyuṡkiƞ uƞ gluonihaƞ na ptehiƞc̄ala ċebyapi waƞ he uƞ wowiċakʹu welo,’ eye.

²⁸ Ċiƞkṡitku ṫokaṗa ki taku lena waƞyaƞke na ṡigla uƞ timahel kigla ċiƞ ṡni. Atkuku ki ṫaƞkal inaṗiƞ na timahel ku ṡi eya ċekiye.

²⁹ Eyaṡ ṫokaṗa ki he leċel atkuku ki ayupte, ‘Wana waniyetu ota oċic̄iye na ohiƞniyaƞ nioiye anaċiġoptaƞ. Miṫak̇ola ob woyute uƞ mayuonihaƞpi waṡte sec̄e keyaṡ ṫaṫokala ċiƞc̄ala waƞji e kʹeyaṡ mayakʹu ṡni yelo.

³⁰ Le niċiƞc̄a ki woyuha niṫawa hena wiƞyaƞ witkowiƞ awiċayusote na gli. Yuƞk̇aƞ ptehiƞc̄ala ċebyapi waƞ yec̄ic̄atʹelo,’ eye.

³¹ Atkuku ki leċel ayupte, ‘Miċiƞkṡi, ohiƞniyaƞ mikiyela yauƞ, taku woyuha miṫawa ki hena iyuha niṫawa iyeċec̄a yelo.

³² Eyaṡ takuƞl uƞ le wauƞtapi na oiyokipi uƞkaġapi ki he, le nisuƞkala wotakuniṡni iyeċel uƞ eṡa zaniya glihuƞni heuƞ leċuƞkʹuƞpelo,’ eye.”