Luke 14 - Lakota Portions

Jesus Wiċaṡa Wayazaƞke Waƞ Apiye

¹ Aƞpetu wak̇aƞ waƞ el, Jesus wiċaṡa iṫaċaƞ waƞ Pharisee heċa, he ti el wotiƞ kta iyotake, yuƞk̇aƞ tuwe iyuha lila taƞyaƞ awaƞyaƞgkuwapi.

² Wiċaṡa waƞ hu na aḣc̄o popo woyazaƞ eċec̄a ċa iṫokab inajiƞ.

³ Jesus igluhomni na Pharisees ki na Moses ṫawooṗe ki slolyapi waƞ hena iwiċayuƞġe, “Aƞpetu wak̇aƞ eċuƞhaƞ waapiyapi okihipi hwo?” eye.

⁴ Eyaṡ tuweniḣc̄i takuni eye ṡni. Hehaƞl, Jesus, wiċaṡa waƞ wayazaƞke he apiyiƞ na kigleye.

⁵ Ohakabya, Jesus oyate ki iwiċayuƞġe, “Aƞpetu wak̇aƞ waƞ el niċiƞc̄api waƞji, naiƞṡ ptegleṡka niṫawa waƞji, mak̇oḣloka waƞ el ohiƞḣpaya haƞtaƞṡ, waƞc̄agna owiċayakiyapi kta hwo?” eye.

⁶ Tuweni takuni eya okihi ṡni.

Taƞyaƞ Woeċuƞ

⁷ Oyate eya wiċakiċopi waƞ hena ċatkutaƞhaƞ awaċiƞya hiyotakapi ċaƞke wiyaċiƞpi waƞ owiċakiyake.

⁸ “Tohaƞl wokiċiyuza wiċawote waƞ el niċopi haƞtaƞṡ, niyuƞk̇ala ċatkutaƞhaƞ yaƞkapi waċiƞpi ṡni yo, okenaiƞṡ tuwe niṫokabya kiċopi waƞ he hihuƞni kihaƞ,

⁹ waƞji niċo ki he lenic̄iyiƞ kte, ‘Le eċa ċatkutaƞhaƞ yaƞkiƞ ktelo!’ eye kihaƞ woiṡtelya ṫok̇aƞl oakaƞke waƞji oyale ktelo.

¹⁰ Tohaƞ tiṫok̇aƞl niċopi haƞtaƞṡ, ċatkutaƞhaƞ hiyaye ṡni yo. Heċetu kihaƞ tuwe niċo he waƞniyaƞkiƞ na heyiƞ kte, ‘K̇ola, ċatkutaƞhaƞ hiyaya yo!’ Hehaƞl tiṫok̇aƞl hipi waƞ hena wiċiṫokabya niyuonihaƞpi ktelo.

¹¹ Tuwe waƞkal iglawa haƞtaƞṡ yuhukul iyeyapi kte, na tuwe uƞṡiicʹiya haƞtaƞṡ oyate wiċiṫokabya yuonihaƞpi ktelo.”

¹² Hehaƞl Jesus wiċaṡa waƞ kiċo waƞ he hekiye, “Tohaƞl wiċawote yakaġa haƞtaƞṡ nititakuye na wijic̄api waƞ hena ec̄ela wiċakiċo ṡni yo. Heċanu haƞtaƞṡ mak̇a akaƞ ec̄ela waƞyeglakiƞ ktelo.

¹³ Etaƞ kakijapi waƞ hena wiċakiksuya yo.

¹⁴ Hena uƞṡiya uƞpi na takuni kicʹuƞ okihipi ṡni. Eyaṡ tokṡa Wak̇aƞṫaƞka niyawaṡte kte na taku yaglusote ki hena hektakiya niċu kte, tohaƞl ṫaoyate ki woekiċetu el inajiƞpi kihaƞ,” eye.

Wiċawote Wiyaċiƞpi

¹⁵ Jesus woglake igluṡtaƞ. Hehaƞl oṗeya yaƞkapi he waƞji hekiye, “Wak̇aƞṫaƞka ṫawokiċuƞze ekta wiċawote hel tuwe kiċopi ki he ihaƞkeya wiċayuonihaƞpi ki he e!”

¹⁶ Yuƞk̇aƞ Jesus leċel ayupte, “Wiċaṡa waƞ wiċawote waƞ kaġe na oyate ota wiċakiċo.

¹⁷ Wana wotapi kte ki iyehaƞtu, hehaƞ ṫawowaṡi ki waƞji iyayiƞ na leċel owiċakiyake ṡi, ‘Wana upo. Taku iyuha yuwiƞyeyapelo!’ eye ṡi.

¹⁸ Eyaṡ iyuha takuṡniya waeċuƞpi kta keyapi. Ṫokaheya ki he eye, ‘Mak̇opaṡpe waƞ oṗewaṫuƞ ċa waƞglag mni kte iyeċetu welo. Iyowiƞmakiya yo.’

¹⁹ Ake tuwe waƞji heye, ‘Ptegleṡka wiyutitaƞpi wikc̄emna oṗewiċawaṫuƞ ċa iwiċabluṫiƞ kte iyeċetu welo. Iyowiƞmakiya yo.’

²⁰ Ake waƞji leċel ayupte, ‘Leċalaḣc̄i ṫawic̄uwaṫuƞ ċa wau owakihi ṡni yelo.’ eye.

²¹ Ċa ṫawowaṡi ki taku ki lena iyuha wahoṡi agli, yuƞk̇aƞ tiiṫaċaƞ ki naḣʹuƞ na ċaƞzehiƞgle, na ṫawowaṡi ki hekiye, ‘Oḣʹaƞk̇oya iyayiƞ na oṫuƞwahe el oċaƞkuyapi na ċaƞku lazataƞhaƞ hena iyuha el ya yo! Na waḣpanic̄api ki, na oicʹihipi ṡni, na huṡtepi na iṡtaġuƞġapi, hena iyuha awiċau wo,’ eye.

²² Ṫawowaṡi ki gli na hekiye, ‘Iṫaċaƞ, taku ehe ki iyuha eċel eċamu, eyaṡ nahaƞḣc̄i ok̇aƞ yelo.’

²³ Ake tiiṫaċaƞ ki ṫawowaṡi ki hekiye, ‘Iyayiƞ na oṫuƞwahe iṫaƞkal, na mak̇oṡkiya uƞpi waƞ hena iyowiċapaṡtaka yo, heċel wati kihaƞ oyate ojulapi ktelo.

²⁴ Etaƞ ṫokaheya wiċaweċo waƞ hena wiċawote wakaġe el oṗapi kte ṡni yelo.’”

Jesus Ihakab Uƞpi Ikipipi Kte

²⁵ Oyate wiċota isakibya manipi yuƞk̇aƞ igluhomni na hewiċakiye,

²⁶ “Tuwe el mau eyaṡ atkuku na huƞku na ṫawic̄u na ċiƞc̄a hena misam tewiċakiḣila haƞtaƞṡ mihakab uƞ okihi ṡni yelo. Na suƞkaku na ṫaƞkṡitku hena naiƞṡ wiċoni tekiḣila haƞtaƞṡ, mihakab uƞ okihi ṡni yelo.

²⁷ Na tuwe mihakab uƞpi uƞ wokakije he icʹicʹu ṡni haƞtaƞṡ, ihakab-uƞpi ki he waƞji okihi ṡni yelo.

²⁸ Tuwe iḣʹe tipi waƞ kaġa ċiƞ ki he wokaiju iyena yuha ki iwaƞglakiƞ ktelo.

²⁹ Heċanu ṡni haƞtaƞṡ wowaṡi he yagluṡtaƞ ṡnihaƞni mazaska ananisota haƞtaƞṡ oyate niokṡaƞ uƞpi hena iniḣaḣapi kte.

³⁰ Na henic̄iyapi kte, ‘Taku waƞ le yakaġe kʹeyaṡ luṡtaƞ oyakihi ṡni yelo,’ enic̄iyapi kte.

³¹ Wiċaṡa-yataƞpi waƞ akiċita k̇oktopawiƞġe wikc̄emna heċegla wiċayuha na ṫokawiċaye ki hena iƞṡ k̇oktopawiƞġe wikc̄emna nupapi, hena ob ṗeta waƞ kaile kte ki he iṫokabya ohiya naiƞṡ ohiya okihi kte ṡni ki he taƞyaƞ iglukc̄aƞ kte.

³² Okiċize ki le ohiya okihi ṡni ki he slolkiya haƞtaƞṡ, kiċizapi ṡnihaƞni etaƞ iyayewiċayiƞ na ṫokawiċaye ki hena ob kiċizapi he ekignakapi kte.

³³ He iyeċel tuwa woyuha hena iyuha agluṡtaƞ ċiƞ ṡni haƞtaƞṡ, mihakab uƞ okihi kte ṡni yelo.

Mniskuya Takuni Ikipi Ṡni

³⁴ “Mniskuya ki skuye ṡni haƞtaƞṡ hehaƞya waṡte ṡni. Tokeṡke eċuƞpi haƞtaƞṡ ake skuyiƞ kta hwo?

³⁵ Hena hehaƞya takuni ikipi ṡni ċaƞ ṫaƞkal iḣpeyapi. Lena woiye ki taƞyaƞ anaġoptaƞpo.”