Jude 1 - Lakota Portions

¹ Le Jude miye lo, Jesus Christ ṫawowaṡi ki waƞji, na James he mihunkake le miye. Wak̇aƞṫaƞka tuwe wiċakaḣniġiƞ na tewiċaḣila kʹuƞ hena Jesus Christ iyoḣlogya taƞyaƞ awaƞwiċayaƞke.

² Wak̇aƞṫaƞka niyawaṡtepi nuƞwe, na uƞṡinilapi, na wookiye nicʹupi, na waċaƞte ognaka yuha niċiyapi kta ċewakiye.

Wiċakeṡniya Wauƞspewiċakiyapi

³ Mitakuye oyasʹiƞ, Wak̇aƞṫaƞka ṫawowaṡʹake ki tokel uƞkigluhapi ohaƞ ṫaƞiƞ ki he wowapi le el iwowaglaka waċiƞ. Eyaṡ iyeṡ Wak̇aƞṫaƞka ṫawowiċala waƞ ṫaoyate ki wiċakʹu na he yuṫokeċa piċaṡni ki heċa nayeċijiƞpi kta uƞ oċiċiwapi.

⁴ Wiċaṡa eya takuƞni wiċalapi ṡni na waoholapi ṡni ċa, naḣma opiiċ'iyapi na uƞkʹuƞpi ohaƞ ahiyu na heyapi, "Wak̇aƞṫaƞka uƞṡiuƞlapi uƞ takuƞni ṡiċa uƞkaiyukc̄aƞpi kte ṡni, ċa waiċiḣaḣaya opiuƞkiċ'iyapi kʹeyaṡ itok̇a kte ṡni," eyapi. Jesus Christ Iṫaƞċaƞ uƞyaƞpi na ohouƞlapi ki he heċetu lapi ṡni. Eyaṡ ehaƞni Wowapi Wak̇aƞ el oyate eya leċel ṡilya opiiċ'iyapi ki hena aiyeċel wiċayasupi kte ki he iwahouƞyapi.

⁵ Egypt etaƞhaƞ oyate eya Wak̇aƞṫaƞka niwiċaye kʹuƞ hena ohakab tokel wiċakuwa ki he ektuƞjapi ṡni yo. Huƞḣ wowiċala yuhapi ṡni uƞ ohakab wiċayutakunipi ṡni.

⁶ Maḣpiya ogligle eya maḣpiyawokiċunze el woeċuƞ ṫawapi ki agluṡtaƞpi ki he onayaḣ'uƞpi. Wak̇aƞṫaƞka maza wik̇aƞ uƞ hena mak̇a oḣloka oiyokpaze el kaṡka ewiċagnake, aƞpetu ihaƞke ekta tuwe ki iyuha wiċayasupi ki hehaƞyaƞ.

⁷ Oṫuƞwaƞhe eya Sodom ena Gomorrah eya aċaṡṫuƞpi ki hena ena nakuƞ oṫuƞwaƞhe eya ohomni yaƞke ki hena el oyate uƞpi hena wiċakiksuyapo. Taku iṫuƞṗeya ṡikṡil waeċuƞpi na waiċiḣaḣapi hena eċuƞpi. Hena Wak̇aƞṫaƞka woiwaƞyaƞke wiċakaġe na ṗeta waƞ oihaƞke wanil ile ki he uƞ iyoṗewiċaye.

⁸ Oyate eya iwowiċawagleke ki hena tuwe kʹeya takuƞni itok̇api ṡni na woihaƞble el taku waƞyaƞkapi keyapi na ṫaċaƞ ki ihaƞgiċ'iyapi. Taku mak̇a el wokiċuƞze ki hena ahoṗapi ṡni na ogligle wak̇aƞpi ki hena oṡtewiċaglapi.

⁹ Maḣpiya el ogligle wak̇aƞ oiṫaƞċaƞ waƞ Michael eċiyapi ki he ena wak̇aƞṡiċa ki Moses ṫaċaƞ ki akiniċapi waƞ hehaƞ Michael wakaƞṡiċa ki oṡtegla ċiƞ ṡni. Taku waƞ eċela hekiye ki he, "Wak̇aƞṫaƞka niċaṡtakiƞ kte lo!" Eye.

¹⁰ Eyaṡ oyate ki lena taku okaḣniġapi ṡni hena iyuha oṡteglapi. Witkoya wiyukc̄aƞpi uƞ ihaƞgiċ'iyapi, iċiƞ taku waƞyaƞkapi okihipi ki hena uƞ eċela nipi.

¹¹ Hena waƞna woṡiċeḣc̄i ki he el iyayeiċ'iyapi. Cain tokel waeċuƞ ki he iƞṡʹeya iyeċel eċuƞpi na Balaam nakuƞ mazaska iyotaƞla na taku heċetu ṡni ki he kaḣniġe. Hena Korah Wak̇aƞṫaƞka kipajiƞpi ki he iyeċel iƞṡʹeya eċuƞpi. Na hena uƞ, lena iyuha wiċayutakunipi kte ṡni.

¹² Lena oyate ki ṫawaċiƞṡiċapi, na taku eya iṡteċe ṡniya waeċuƞpi na iṡnaiċ'ila awaiċ'iċiƞpi uƞ wiċawote ki he yuṡiċapi. Hena maḣpiya agli eyaṡ maġaju ṡni ki he iyeċeċapi, takuƞni iwaṡtepi ṡni. Ċaƞ eya kajuƞpi na waḣpeċola tʹapi ki he iyeċeċapi, na he waskuyeċa iċaġa okihi ṡni.

¹³ Woiṡtelya waeċuƞpi ki he ṫaiƞ na mni owaƞċaya okataḣṫuƞya he ki he iyeċeċapi. Maḣpiya glakiƞkiƞkiya wiċaḣpi eya nuƞniya kaḣwokapi na hena wiċotakuƞni ṡni ekta hehaƞya uƞpi.

¹⁴ Enoch he Adam etaƞhaƞ wiċoiċaġe ṡakowiƞ, waƞ eċa leċel oyate ki hena iwowiċaglake: El etuƞwaƞpo! Wak̇aƞṫaƞka ogligle wak̇aƞ eya wiċayawapiċaṡni ċa ob u kte

¹⁵ na tuwe ki iyuha wiċayasupi kte. Oyate eya takuƞni oholapi ṡni na ṡiċaya waeċuƞpi kʹuƞ hena iyuha wiċayasupi kte. Tuwe eya waḣtanipi sʹa na Wak̇aƞṫaƞka oholapi ṡniya waekiyapi kʹuƞ hena k̇'o.

¹⁶ Oyate ki lena oiyahaƞpi na taku iyuha el iglepi na tokċiƞyaƞ igluhapi. Taku ċiƞpi uƞ iglaonihaƞpi na oyate ki wiċayuonihaƞ kuƞzaƞpi.

Iwahowiċayapi

¹⁷ Mitakuyepi, Jesus Christ ṫawahoṡiye ki taku eya iwahoniyapi waƞ hena kiksuyapo.

¹⁸ Aƞpetu ehake ki he ik̇iyela ekta oyate eya iṡna awaiċ'ic̄iƞpi na taku wak̇aƞ ki hena wiċalapi kte ṡni, na Wak̇aƞṫaƞka oṡteglapi kte.

¹⁹ Lena eċa oyate ki egnagna ahoyekiċiyaniċiyapi. Woniya Wak̇aƞ ki yuhapi ṡni uƞ waiċiḣaḣapi na takuƞni oholapi ṡni.

²⁰ Mitakuyepi, taku waƞ wak̇aƞyaƞ wic̄ayalapi ki he gluwaṡʹagya gluha ċekiyapo, Woniya Wak̇aƞ ki wookiye niċ'u kte.

²¹ Wak̇aƞṫaƞka ṫawowauƞṡila ki he gluha manipo, Jesus Christ uƞṡinilapi uƞ wiċoni oihaƞke wanil niċ'upi ṡni hehaƞyaƞ.

²² Etaƞ waċiƞṫaƞkapi ṡni ki hena owiċakiyapo.

²³ Ṗeta etaƞhaƞ niwiċayapi iyeċel, onuniyata uƞpi ki hena oaye-wak̇aƞ ki el hektakiya wiċaglokupo. Hehaƞl ṫawaċiƞ kiċ'uƞyaƞ tuwe waċiƞniyaƞpi haƞtaƞnaṡ uƞṡiwic̄alapo. Eyaṡ ehaƞni tokel opiiċ'iyapi kʹuƞ he taku waḣteka ċa etaƞhaƞ iḣayab uƞpo.

Ahake wiċayawaṡtepi

^24-25 Wak̇aƞṫaƞka Wanikiya uƞkiṫawapi ki, Iṫaƞċaƞ Jesus Christ iyoḣlogya yataƞ po! Wak̇aƞṫaƞka iṡnala wookiye niċ'u okihi, heċel taku waƞ el waniċ'iċuƞze ki he ognaya waṡʹagya nayajiƞ kte, na ċaƞte etaƞhaƞ Wak̇aƞṫaƞka iluṡkiƞ kte. Oṫokahe hetaƞhaƞ na wana na oihaƞke wanilya, Wak̇aƞṫaƞka, wowitaƞ, woyuonihaƞ, wowaṡʹake, na wokiċuƞze ki hena ikipi. Ho, heċetuwelo.