Ephesians 5 - Lakota Portions

¹ Wak̇aƞṫaƞka ċiƞċa uƞṡiwiċakila ki he, niƞṡʹeya iyeċel igluhayo. Wak̇aƞṫaƞka Ihaniktapi na uƞṡinilapi ki heuƞ niṡeya eċel iwaƞyaƞg eċanuƞpi kte.

² Waċaƞte ognakapi ki he ognayaƞ uƞkʹuƞpi kte. Christ teuƞḣilapi na iye iċ'iċ'u ki he Wak̇aƞṫaƞka iyokipi.

³ Wak̇aƞṫaƞka ṫaoyate heniċapi ki heuƞ tuweni ainiyapi kte ki he heċetu ṡni, taku owoṫaƞla ṡni na wayuhapi kte ḣci uƞ ainiyapi ki he heċetu ṡni yo.

⁴ Witkotkogya, na woiye ṡikṡiċe ki hena uƞpi ṡni yo. Eeyaṡ wopila ṫaƞka luha ki he oglakayo.

⁵ Wowaċiƞ, na wowiṡteċe naiƞṡ taku owoṫaƞla ṡni ki hena, taku wakaġapi wak̇aƞwiċalapi ki he iyeċeċa. Oyate eya leċel uƞpi ki hena tohiƞniya Wak̇aƞṫaƞka ena Christ ṫawokiċuƞze ki he el oṗapi kte ṡni.

⁶ Tuwa witkoya woglake ki he anaġoptaƞ ṡni yo. He nignayaƞ waċiƞ ktelo. Lena heċel uƞpi ki uƞ Wak̇aƞṫaƞka iyoṗewiċayiƞ ktelo.

⁷ Heċel uƞpi ki hetaƞhaƞ igluḣlaya po.

⁸ Ehaƞni haƞhepi oiyokpaza ki he iyeċel el yauƞpi tk̇a, Eyaṡ waƞna Wak̇aƞṫaƞka waables niċiyapi uƞ niṫawaċiƞpi ki aiyonijaƞjaƞpi. Heuƞ he iyeċel yauƞpi kte

⁹ Le oyate ki ṫawaċiƞ iyoyambwiċayapi ki uƞ taku waṡte na heċetu ki hena iċuƞpi kte

¹⁰ Wak̇aƞṫaƞka taku iyokipi ki hena uƞkolepi na eċuƞkʹuƞpi kte.

¹¹ Taku eya heċetu ṡni na naḣma waeċuƞpi ki hena etan iḣayab igluzayo. Eṡey'aṡ hena heċetu ṡni ki he ableswiċakiyab iyuṫapo.

¹² Taku waanaḣmaya waeċuƞpi kin hena waḣte ṡniya iwoglakapi ki ikipi ṡni.

¹³ Ṫawaċiƞ iyoyambwiċayapi haƞtaƞhaƞṡ, taku heċetu ṡni ki hena aṫaiƞ kte.

¹⁴ woiyoyaƞpa ki he taku ki iyuha yuaṫaiƞ, tuwe waƞ leċel eya keyapi, "Waƞa kiktayo, tukṡa tohaƞl niṫ'e ki hehaƞl heċel yaḣpayahiƞ ktelo, heċel Christ ṫawaċiƞ niyublihelniyiƞ ktelo."

¹⁵ Oyate taƞyaƞ wiyukcaƞpi ki he iyeċel opiiċ'iyiƞ na witkoya uƞ ṡniyo.

¹⁶ Aƞpetu iyohi yaƞni iċuhaƞ taku iyuha taƞyaƞ iċuƞwo.

¹⁷ Waċiƞṫuƞ ṡniya wiyukcaƞ ṡni yo. Eċaƞleṡ, Wak̇aƞṫaƞka ouƞye ki he ogna uƞ waċiƞ yo.

¹⁸ Mni ṡiċa [wak̇aƞ]un itomniiċ'iye ṡni na ihaƞg iċ'iye ṡni yo, eyaṡ Woniya Wak̇aƞ ki uƞ okaḣtaƞ iċ'iyayo.

¹⁹ Tohaƞl mniċiyapi ċaƞna psalms woeye etaƞ uƞ nape yeċiyuzapi na woċekiye olowaƞ etaƞ Wak̇aƞṫaƞka ċaƞte kiċ'uƞya ayeċihiyayapi kte.

²⁰ Jesus Christ ċaje ki uƞ ohiƞniya Wak̇aƞṫaƞka taku yuha niċiyapi ki hena wopila eyakiyapi kte.

²¹ Christ luonihaƞpi uƞ tuwe ki iyuha ṫokaheya wiċaluonihaƞpi kte.

²² Wihiƞgnaṫuƞ waƞ hiƞgnaku ki ṫokahekiyiƞ na ahoṗa uƞ ki he, iyeċel Wak̇aƞṫaƞka ṫokaheyiƞ kte.

²³ Wihiƞgnaṫuƞ tiwahe ṫawa ki he hiƞgnaku ki oiṫaƞċaƞ, he iyeċel ok̇lakiċiye wak̇an ki he Christ ṫawa na oiṫaƞċaƞ.

²⁴ Wihiƞgnaṫuƞpi ki hena hiƞgnakupi ki paṫokalya wiċayuzapi kte, ok̇olakiċiye wak̇an ki he Christ paṫokal yuzapi ki he iyeċel.

²⁵ Wiċaṡa ki he ṫawiċu ki tekiḣila ki he iyeċel Christ ok̇olakiċiye wak̇aƞ ki he tekiḣila uƞ tʹe.

²⁶ Ok̇olakiċiye wak̇aƞ ki he ṫaoiye ki uƞ yuwak̇aƞ, mni uƞ yujaja na ohakab yuwak̇aƞ.

²⁷ Taku uƞ leċuƞ ki he ok̇olakiċiye wak̇aƞ ki he Christ iye ċa iċ'iċe, heċel taku ki iyuha wak̇aƞya iyaƞkiƞ kte.

²⁸ He wiċaṡa ki iƞṡʹeya teiċ'iḣila ki he iyeċel ṫawiċu ki ohiƞniyaƞ tekiḣila kte. Wiċaṡa waƞ taƞyaƞ iċ'iċuwa ki he ṫaiċu ki nakuƞ taƞyaƞ kiċuwa kte.

²⁹ Tuweni waḣteiċ'ila ṡni. wiċaṡa ṫaċaƞ ki zaƞni kta uƞ taƞyaƞ wol uƞkiyapi, Christ Ok̇olakiċiye wak̇aƞ ki he iye ċeḣpi ṫawa ki taƞyaƞ awaƞglake ki he iyeċel,

³⁰ Iċiƞ uƞkiṡʹeya ṫaċaƞ wowiyaċiƞ ki heuƞtaƞhaƞpi.

³¹ Wowapi wak̇aƞ etaƞ leċel yawapi, "Wiċaṡa waƞji ṫawiċuṫuƞ kta haƞtaƞnaṡ, huƞku na atkuki awiċagluṡtaƞ, na ṫawiċu kiċi owaƞjila kiċiyapi.

³² Le wak̇aƞyaƞ woeċuƞ ki he ookaḣniġe ṡiċe, eyaṡ tokel owakaḣniġe ki he Christ ena ok̇olakiċiye wak̇aƞ oṗapi ki hena eċa wic̄ak̇api.

³³ Heuƞ wiċaṡa waƞ waṡte iċ'ilake ki he iyeċel ṫawiċu ki teḣila kte, na wiƞyaƞ ki he iƞṡʹeya hiƞgnaku ki gluonihaƞ uƞ kte.