Ephesians 2 - Lakota Portions

¹ Wanayaḣʹuƞpi ṡni na wayaḣtanipi ki uƞ niṫawaċiƞpi ki nitʹapi iyeċel yauƞpi ki he kiksuyapo.

² Hehaƞ Wak̇aƞṫaƞka oiye iyaċupi ṡni na wak̇aƞ ṡiċa ki ohoyaṗapi. Wak̇aƞ Ṡiċa ki okaḣuwogya omani ki oyate lena ilagwiċaye. He eċa oiye iyacupi tk̇a. Lehuƞniyaƞ Wak̇aƞṫaƞka oiye naḣʹuƞ ċiƞpi ṡni waƞ hena ilagwiċaye.

³ Eyaṡ iyuha taƞyaƞ wiuƞyukcaƞpi ṡni tk̇a, uƞkiṫaċaƞ ki tukte ognayaƞ imnaicʹiyiƞ kte ki eċa uƞkawaċiƞpi. Ho ċa Wak̇aƞṫaƞka etkiya wauƞgluṡicapi na uƞkiƞṡʹeyaƞ uƞkakijapi tk̇a.

⁴ Eyaṡ, Wak̇aƞṫaƞka lila uƞṡiuƞkilapi na ṫeuƞkiḣilapi kacʹuƞ,

⁵ uƞkiṫawaċiƞpi ki tʹa iyeċeca eyaṡ Christ ognayaƞ uƞyukinipi. Wak̇aƞṫaƞka ṫawowaṡte ki uƞ niuƞyaƞpi.

⁶ Christ ognayaƞ uƞyukinipi, maḣpiyata kiċi uƞkʹuƞpi kta heuƞ.

⁷ Wak̇aƞṫaƞka teuƞkiḣilapi ḣce ki he Christ teuƞkiḣilapi he ognayaƞ oihaƞke wanilya kpazo. Ṫokatakiya ṫawowaṡte ḣc̄e ki he ablesʹuƞkiyapi ċiƞ ċa heuƞ heċuƞ.

^8-9 Wak̇aƞṫaƞka ṫawowaṡte ki ogna wiċoni luhapi. Wicayala heuƞ heċetu. Niṡnala wiċoni iyac̄u oyakihipi ṡni. Wak̇aƞṫaƞka eċa niuƞyaƞpi. Ċa takuni uƞ niglataƞ oyakihipi ṡni yelo.

¹⁰ Wak̇aƞṫaƞka oyate ki taƞyaƞ waeċauƞkiċiċuƞpi kta heuƞ piya niuƞyaƞpi. Taƞyaƞ waeċuƞkʹuƞpi kte ki lena uƞkiċiyuwiƞyeyapi. Heuƞ ċa Christ kiċi owaƞjilauƞkiyapi.

¹¹ Jew heniċapi ṡni ki he kiksuyapo. Eṡʹeyaṡ ehaƞni oyate eya ċeḣpiwiċapaḣlayapi ṡni eya ċajeniyatapi tk̇a, etaƞ heċel ṫawowiċalapi ki ognaya igluhapi waƞ hena eċa heyapi.

¹² Waƞhehaƞtu waƞhehaƞ Christ eċiyataƞhaƞ itok̇a ṡniyaƞ yauƞpi. Israel el oyatepi ki ohaƞ ṫoka yauƞ, Wak̇aƞṫaƞka taku eya oyate ki waktapi kta iwahowiċaye kʹuƞ hena el oyaṗapi ṡni. Mak̇oċe ki leel takuƞni wayakta ṡni, na Wak̇aƞṫaƞka ċola yauƞ,

¹³ Na Wak̇aƞṫaƞka etaƞ iṫehaƞ yauƞ. Eyaṡ Christ we kpapsuƞ na iċ'iċ'u ki heuƞ Wak̇aƞṫaƞka ikiyela aniu.

¹⁴ Christ Jew oyate na Jewpi ṡni hena wiċayuwitaya na taku waƞ uƞ iwaḣtekiċilapi sʹa tk̇a waƞ he yuḣeyab iċu. Christ ṫacaƞ ki kiċ'u

¹⁵ Ki heuƞ Moses ṫawooṗe el taku ota yuṫokeċa. Nakuƞ Jew oyate na Jewpi ṡni oyate ki hena wiċayuwaƞjila, na ok̇olakiċiye waƞjila sʹe wiċakaġe.

¹⁶ Christ ċaƞiċipaweġa waƞ akaƞl ktepi waƞhehaƞ oyate eya waḣtekiċilapi ṡni kʹuƞ hena wawaḣtelapiṡni ki he yuḣeyab iċu. Heċuƞ ki heuƞ Jew oyate ki ena Jewpi ṡni hena Wak̇aƞṫaƞka kiċi waḣwala uƞkʹuƞpi kta uƞ uƞyuwitayapi.

¹⁷ Christ hi na oyate ṫokċa yauƞpi ki hena taƞyaƞ yauƞpi kta uƞ wahokuƞniċiyapi, Wak̇aƞṫaƞka iṫehaƞ yauƞpi ki heuƞ, na Jew oyate ki Wak̇aƞṫaƞka ikiyela uƞkʹuƞpi ki hena uƞkiṡʹeya waḣwala uƞkʹuƞpi kte.

¹⁸ Ċa heuƞ iyuha Wak̇aƞṫaƞka Ateyapi ki el uƞkupi uƞkokihipi, Woniya Wak̇aƞ ki uƞ.

¹⁹ Oyate ṫokċa heniċapi eṡa hehaƞyaƞ heċa niglawapi kte ṡni. Wak̇aƞṫaƞka ṫaoyate na tioṡpaye ṫawa heċa niglawapi kte.

²⁰ Tipi waƞ taku waƞ uƞ sutaya hiƞ kte ki he Christ e. Na wahoṡiye wak̇aƞ eya e na wokċaƞ wiċaṡa eya oagle wiċayapi ki he niƞṡʹeya oṗaniċiyapi.

²¹ Christ eċa ok̇olakiċiye wak̇aƞ ki he wiċayuwaƞjila na ok̇olakiċiye wak̇aƞ ki ohaƞ Wak̇aƞṫaƞka uƞ.

²² Na ok̇olakiċiye wak̇aƞ waƞ Christ kaġe ki he niƞṡʹeya el oyaṗapi, na he el Wak̇aƞṫaƞka ouƞyiƞ kte.