2 Timothy 4 - Lakota Portions

¹ Tohaƞl Jesus Christ he wiċaṡa-yataƞpi iyeċel ku ki haƞ, oyate ki iyuha, niuƞpi naiƞṡ tʹapi hena k̇o, iyuha wiċayasu kte. Le Wak̇aƞṫaƞka ena Christ wiċiṫokabya, woċiċiyake ki lena miċiyaatʹiƞzapi kte

² na Wak̇aƞṫaƞka ṫaoiye ki uƞ wahokuƞwiċayakiyiƞ kte. Le oweċunṡiċe k̇'eyaṡ, ċaƞtekic̄'uƞya eċanuƞ kte. Oyate ki ogluṡiċapi ki hena waƞglag owiċayakiyiƞ kte. Eyaṡ leċel wauƞspewiċayakiye eċuhaƞ, waċiƞniṫaƞka na nakuƞ blihelwiċayayiƞ kte.

³ Aƞpetu waƞ u kte ki he el oyate ki taku heċetu ṡni ki hena eċela naḣ'uƞ ċiƞpi kte. Eṡʹeyaṡ, wauƞspewiċakiyapi eya nuƞġe akataƞhaƞ eċela onaḣ'uƞwaṡte ċa oyakapi hena eċa owiċalepi kte.

⁴ Taku heċetu ḣ'ċe ki hetaƞhaƞ igluḣlayapi na e e ikċekċeya woyake ċa anaġoptaƞ ċiƞpi kte.

⁵ Taƞyaƞ waeċanuƞ ki heuƞ nikakijiƞ kte, eyaṡ ċaƞtetʹiƞsya opinic̄'iƞyiƞ na Woṫaiƞ-Waṡte ki he taƞyaƞ olakiƞ na wowaṡi ki he tanyaƞ eċanuƞ kte.

⁶ Miye waƞna mak̇a wiċoni ki he imiċihuƞni kte. Wiċoni miṫawa ki he, Wak̇aƞṫaƞka iṫokabya wakic̄'uƞpi papsuƞpi, ki he iyeċel miċihe.

⁷ Kiiyaƞkapi akiċiyapi ki he iyeċel, el ohaƞ taƞyaƞ waimnake. Oihaƞke ki ekta taƞyan migluṡtaƞ, na wowiċala miṫawa ki he wagluha.

⁸ Wak̇aƞṫaƞka iyokipiwaye ki heun woohiye waƞ uƞ wateṡlagmakiyiƞ kte. Tuwe ki iyuha akiċiyela ċaƞtewiċayuze, heuƞ aƞpetu waƞ el wiċayasupi ki woohiye waṡte waƞ uƞ wateṡlagmakiye ki he, na tuwe ki iyuha waktapi na oṗapi ċiƞpi ki hena k̇o wiċakʹu kte.

Personal Instructions - Tuweweka Iwiċayaksapapi

⁹ Oyakihi kihaƞ eċaƞni waƞyaƞgmau wo.

¹⁰ Demas eċa mak̇a el wowiyutaƞye ki hena waṡtelakiƞ na hena amayuṡtaƞ na Thessalonica oṫuƞwahe takiya iyayelo. Crescens eċa Galatiatakiya iyaye, na Titus iƞṡ Dalmatia takiya iyaye.

¹¹ Luke eċela mikiċi uƞ. Mark lila omakiye, ċa ole na kiċi u wo.

¹² Tychicus iƞṡ Ephesusta iyaye waye lo.

¹³ Tohaƞl yau kihaƞ, ogle waƞ Troas el Carpus miċiyuha ċa he au wo. Ektuƞje ṡni na wowapi kaġapi waƞ hena au wo, iyotaƞḣċi etaƞ ṫaha uƞ kaġapi waƞ hena.

¹⁴ Alexander eċiyapi ki he maza uƞ wakaġapi wiċaṡa heċa, na he lila ṡiċaya omakuwa. Eyaṡ tokel omakuwa ki he tukṡa Wak̇aƞṫaƞka iye el etuƞwiƞkte.

¹⁵ Taƞyaƞ awaƞiċ'iglaka yo, Alexander wowahokuƞkiyapi uƞkiṫawapi ki he lila uƞkipajiƞpi.

¹⁶ Wayasupi el ṫokahe amaipi waƞ hehaƞ, tuweni omakiye ṡni. Eṡʹeyaṡ, tuwe ki iyuha miḣayab iyayapi. Leċuƞpi ki hena, lena taku ki kʹiƞ wiċakiyapi ṡni ki waṡte kte.

¹⁷ Eyaṡ Wak̇aƞṫaƞka misakibya najiƞ. Na wowaṡʹake makʹu ċa ṫaoiye ki he ojulya oblake, heċel Jewpi ṡni ki hena iƞṡʹeya naḣ'uƞpi kte. Igmu ṫaƞka eya loċiƞpi ki hetaƞhaƞ nimaye.

¹⁸ Wak̇aƞṫaƞka taku ṡiċe ki etaƞhaƞ ohiƞniya taƞyaƞ mayuha, na maḣpiya wokiċuƞze ki hel taƞyaƞ amaki kte. Woyuonihaƞ uƞ ohiƞniya uƞyataƞpelo! Ho heċetu welo.

Final Greetings - Ahake Waƞkiċiyaƞkapi

¹⁹ Priscilla ena Aquilla, na Onesiphorus ṫatiwahe ki, nape wiċabluza ċa owiċakiyaka yo.

²⁰ Erastus eċa Corinth ektani uƞ. Trophimus iƞṡ wayazaƞka ċa Miletus oṫuƞwahe el abluṡtaƞ.

²¹ Oyakihi kihaƞ waniyetu ṡnihaƞni u wo. Eubulus e na Pudens e ena Linus e na Claudia nape niyuzapi ċa oniċiyakamaṡipelo. Na uƞma Iṫaƞċaƞ-ihakab-uƞpi ki hena nakuƞ.

²² Wak̇aƞṫaƞka niċiuƞ nuƞwe, na ohiƞniya uƞṡinilakapi kte.