1 Timothy 6 - Lakota Portions

¹ Wayaka niyuhapi ki hena anawiċaġoptaƞpi na wiċayuonihaƞpo. Heċel oyate ki Wak̇aƞṫaƞka na he eċiyataƞhaƞ takuni yaṡiċapi okihipi kte ṡni.

² Wayaka niyuhapi ki hena Iṫaċaƞ wiċalapi haƞtaƞṡ wiċayuonihaƞpo. Waƞ, lena iƞṡeya Christ wiċalapi, ċa Christ uƞṡiwiċakila. Heuƞ taƞyaƞ wowaṡi eċayeċiċiuƞpi kte na wowaṡi ki hena taƞyaƞ eċanuƞpi kte. Lena eċa oyate ki uƞspewiċayakiyiƞ na eċel eċuƞ wiċayaṡi kte.

False Teaching and True Wealth - Wouƞspe Heċetu Ṡni na Wowijiċa Eḣċa

³ Tuwa takuƞl ṫokca ċa ogna wauƞspewiċakiya haƞtaƞnaṡ Jesus Christ wouƞspe ki he wiċala ṡni.

⁴ Oyate eya heċel wiċalapi ṡni ki hena waḣ'aƞicʹilapi, eyaṡ takuƞni slolyapi ṡni. Ṫawaċiƞ waniċapi sʹe wiyukcaƞpi, na woiye ki hena k̇o uƞ ahoyekiċiyapi. Woanawizi oyableċapi, na waakiniċapi, na wawignupi, na waaiyapi, na waċetʹuƞglapi, na

⁵ Ṡikṡiċaya ahoyekiċiyapi, ṫawaċiƞ iċetupi ṡni sʹe wiyukcaƞpi uƞ wowiċake ki waƞyaƞkapi okihipi ṡni. Lena oyate kihaƞ woċekiye ki he uƞ igluwijc̄api kta keċiƞpi.

⁶ Taku uƞyuhapi ki isam awauƞċiƞpi ṡni haƞtaƞṡ, woċekiye ogna uƞkʹuƞpi ki wiċoni waṡte uƞyuhapi kte.

⁷ Mak̇a akaƞ takuni gluha uƞhipi ṡni yelo! Na takuni gluha uƞkiyayapi kte ṡni yelo!

⁸ Ċa woyute na hayapi heċegla uƞċiƞpi waṡtekelo.

⁹ Huƞḣ isam wijic̄a ċiƞpi hena ṡic̄aya iyaye-icʹiyapi na taƞyela igluṡic̄api.

¹⁰ Mazaska ec̄ela awaċiƞpi he taku ṡic̄a ota waƞyaƞkapi. Huƞḣ mazaska awaċiƞpi kacʹuƞ waṡteya wowic̄alapi hetaƞ ḣeyab iyayapi na oteḣi ota waƞyaƞkapi na ċaƞte igluṡic̄api.

Fighting a Good Fight for the Faith-Wowiċala Ki He Waṡʹagya Nayeċijiƞ Kte

¹¹ Timothy, Wak̇aƞṫaƞka niyuha ki heuƞ taku ṡiċa ki hetaƞhaƞ iḣayab nigluziƞ kte. Wak̇aƞṫaƞka ṫaoiye ki aiyeċel nigluha yaċiƞ ki he waṡte kte. Waċiƞye pic̄a yauƞ kte, wauƞṡiyala kte, waċiƞniyapi, na waḣwayela yauƞ kte.

¹² Wowiċala ki le sutaya nayeċijiƞ kte na wiċoni owihaƞke waƞil wowic̄ala ki he ṫawa niglawa kte. Wak̇aƞṫaƞka wiċoḣ'aƞ ki le niċ'u ki he oyaglake na oyate ota naniḣ'uƞpi.

¹³ Wak̇aƞṫaƞka ċeyakiye ec̄uƞhaƞ leċel niċ'ic̄uƞziƞ kte, na Christ Jesus nakuƞ naniḣ'uƞ eċuƞhaƞ, woiċ'iċuƞze waƞji yeċaġiƞ kte, he iƞṡeya Pontius Pilate iṫokabya ṫawowiċala ki oglake, lena eċuƞċiṡi.

¹⁴ Wowiċ'iċuƞze ki le na taku waƞ eċuƞniṡipi ki he, Jesus Christ gli ṡni ki hehaƞya ohiƞniya paṫokabya yagluziƞ kte. [ Verse markers need adjustment 13-14]

¹⁵ Wak̇aƞṫaƞka oṫaƞṫuƞke ki he iṡnala Iṫacaƞ, Wiċaṡa-yataƞpi eḣċa ki he e, na Iṫaċaƞpi ki eḣċa ki nakuƞ he e. Wak̇aƞṫaƞka aƞpetu waƞ kaḣniḣ ekigle, he el Jesus Christ ake hiyuyiƞ kte.

¹⁶ Wak̇aƞṫaƞka eċela owihaƞke wanilya niuƞ! Na ṫouƞ ki he wak̇aƞ ċa tuweni ik̇aƞyela u okihi ṡni. Ikċewiċaṡa waƞjini tohiƞniya Wak̇aƞṫaƞka waƞyaƞke ṡni na tohiƞniya wanyaƞka okihi ṡni. Wak̇aƞṫaƞka yuonihaƞpi kte, na woyuonihaƞ na wowaṡʹake ki hena ṫawa! Ho heċetuwelo.

¹⁷ Mak̇a wowijiċa ki oyate eya el uƞpi ki hena iwaktawiċayayo, mak̇a akaƞl wijiliċ'iyapi na itaƞpi ki hena taku iyuha tok̇aṡniyaƞ gnuƞnipi okihipi. Wak̇aƞṫaƞka wiċalawiċaṡiyo, wowijiċe ki hena ṫawa na taku uƞkikaġipi ki hena uƞkʹupi kte heċel wiċoni le el iyuṡkiƞya uƞkʹuƞpi kte.

¹⁸ Taku waṡte eċuƞpiċa ki hena ecuƞ wiċayaṡi kte, na uƞṡikapi ki hena owiċakiyapi kte. Wijiċapi ki hena ċaƞtewaṡteya ṫawoyuhapi ki hena yunayekiyapi kte.

¹⁹ Heċel oagle akaƞl wakaġapi ki he ṫokata waṡagya hiƞ kte, heċel mak̇a akaƞl wiċoni eċuƞhaƞ taku waƞ waṡte eḣċa ki he slolyapi kte.

²⁰ Timothy, Wak̇aƞṫaƞka taku waƞ napiyuzniċiye ki he taƞyaƞ awayaƞkayo! Taku eya waċiƞṫuƞṡniya iwoglakapi ki hena anaġoptaƞṡniyo, hena onaḣ'uƞ waṡte sʹeleċeċa eyaṡ hena heċetu ṡni.

²¹ Oyate eya huƞḣ leċel anwiċaġoptaƞpi na wowiċala gnunipi. Wak̇aƞṫaƞka uƞṡinilapi nuƞwe.