1 Timothy 4 - Lakota Portions

=People Will Turn from Their Faith -Oyate ki Ṫawowicalapi ki Etaƞ Igluḣlayapi Kte

¹ Woniya Wak̇aƞ ki taƞyela heye, aƞpetu ahake ki oyate ota ṫawowiċalapi etaƞ igluḣlayapi kte. Eċiƞ wak̇aƞ ṡiċa ṫawauƞspe ki anaġoptaƞpi ki heuƞ, taku waṡte ṡni ki etkiya wiċayahomnipi kte.

² Nakuƞ etaƞ taku heċetuṡni oyakapi ki hena k̇o anawiċaġoptaƞpi kte, lena owak̇aƞk̇aƞpi sʹa uƞ takuƞni itok̇apiṡni. Lena owak̇aƞk̇aƞpisʹa ki

³ Wokiċiyuze ki he oyate ki ahokiṗapi ṡni wicayaeċeċapi kte, nakuƞ woyute eya etaƞhaƞ yutapi kte ṡni wicayaececapi kte. Eyaṡ Wak̇aƞṫaƞka woyute ki lena kaġe ċa oyate eya Wak̇aƞṫaƞka wiċalapi ki hena iyuṡkiƞya wotapi kte.

⁴ Wak̇aƞṫaƞka taku kaġe ki hena iyuha waṡte. Lena awaċeyakiyapi haƞtaƞṡ taku keyaṡ yatapi oyakihipi yelo.

⁵ Wak̇aƞṫaƞka taku eye ki he ena niṫawoċekiye ki heuƞ woyute ki lena yuwak̇aƞpi na heuƞ lena yulpica.

Paul's Advice to Timothy-Paul Timothy Iyaksape

⁶ Iṫaƞċaƞ wiċalapi ki hena leċel wauƞspewiċayakiye ki, Jesus Christ ṫawowaṡi taƞyaƞ eċayeċiċuƞ kte. Wowiċala eċiyataƞhaƞ taƞyaƞ wauƞspewicayakiyiƞ kte, eċiƞ ṫawaċiƞ taƞyaƞ awaƞyaƞglake ki heuƞ naġi niksape.

⁷ Wiċoyake eya takuni iwaṡtepi ṡni na ṫawaċiƞ iwicakiyujena waƞ hena etaƞ iḣeyab nigluziƞ kte. Wowiċala hecetu ḣc̄i ki he eċa wowaṡi taƞyaƞ eċel eċanuƞ kte.

^8-9 Woiye eya leċel eyapi ki he heċetu, “Taċaƞ ki igluṡkaƞṡkaƞpi ki he ṫaċaƞ ki iwaṡte kte, eyaṡ wowiċalayuhapi ki he taku iyuha wookiye yuhapi kte. Lecel eċuƞpi ki hena wiċozaƞni yuhapi kte na ṫokata zaƞniyaƞ uƞpi kte.” Woiye ki lena yuhapi na ektuƞjepica ṡni.

¹⁰ Wak̇aƞṫaƞka oihaƞke wanilya uƞ ki he waċiƞuƞyaƞpi ki he e, he oyate ki niwiċakiye, iyotaƞḣc̄i etaƞ wiċalapi ki hena. Heuƞ ċa wowaṡi ki le yuha ṡkiƞuƞkicʹiyapi.

¹¹ Lena wouƞspe ki tuwe ki iyuha naniḣ'uƞpi ki hena eċel eċuƞwiċayaṡi kte.

¹² Na niṫeċa ki he uƞ tuweni oiniḣawiċayakiyiƞ kte ṡni. Eyaṡ etaƞ Wak̇aƞṫaƞka wiċalapi ki hena wiċiṫokabya taƞyaƞ nigluha kte, wowiċala na wowauƞṡila ki hena taƞyaƞ eċanuƞ kte.

¹³ Wahi ṡni hehaƞyaƞ Omniciye-Wak̇aƞ el Wowapi Wak̇aƞ ki hena el lawa kte, na ohiniyaƞ oyate ki wahokuƞwicayakiyiƞ na wauƞspewicayakiyiƞ kte.

¹⁴ Wicaṡa-Wak̇aƞ-Waayaṫaiƞ eya na Tipi-Wak̇aƞ oiṫacaƞpi eya awaniċekiyapi na eniċaṫaƞpi na niyawaṡtepi, wookiye waƞ nicʹupi ki he ilag yayiƞ kte.

¹⁵ Lena taku ki awilukc̄aƞ na eyektuƞjiƞ kte ṡni, heċel tuwe ki iyuha lena taƞyaƞ eċanuƞ ki waƞyaƞkapi kte.

¹⁶ Tokel nigluha ki he taƞyaƞ awaƞnicʹiglakiƞ kte, na wauƞspewicayakiye ki he iyecel nigluha kte. Heċel nigluha ki Wak̇aƞṫaƞka wiċoni oihaƞke waniċa ki he yuha niċiyiƞ kte, na oyate eya naniḣ'uƞpi ki hena k̇'o nipi kte.