1 Timothy 2 - Lakota Portions

Leċel Waċekiyapi Kte

¹ Ṫokaheya leṗiƞ kte, tuwe ki iyuha woċekiye uƞ wiċayeksuyapi kta iwaċiƞċiyapi. Wak̇aƞṫaƞka lena iyuha wiċayawaṡte na owiċakiyiƞ kta. Tuwe ki iyuha wopila uƞ wiċayeksuyapi ki he Wak̇aƞṫaƞka oyakiyakapi kte.

² Wiċaṡa wiċayataƞpi na tuwa wowaṡʹake yuhapi ki hena, waċewiċauƞkic̄iċiyapi kte, heċel Wak̇aƞṫaƞka iṫokab yuonihaƞ ċekiya na waḣwayela uƞkʹuƞpi kte.

³ Leċeḣc̄i waċekiyapi ki he waṡte, na Wak̇aƞṫaƞka Niuƞyapi ki he iyokipi.

⁴ Wak̇aƞṫaƞka tuwe ki iyuha ċaƞteowiċagnake na he iye wiċaṡa owasʹiƞ nipi, na wowiċak̇e slolyapi ki el hipi kte ki he ċiƞ, he le e,

⁵ Wak̇aƞṫaƞka waƞjila, na Jesus Christ eċela Wak̇aƞṫaƞka el uƞkaupi okihi. Jesus ikc̄e wiċaṡa mak̇a akaƞl el wiċaṫuƞpi iyeċel hi, na uƞnipi kta uƞ wiċuƞtʹe el icʹicʹu.

⁶ Aƞpetu tohaƞtu kte ki he waiyehehaƞl, Wak̇aƞṫaƞka leċel waƞyaƞguƞkiyapi.

⁷ Lena heċetu kta uƞ Wak̇aƞṫaƞka eyapaha na wahoṡiya heċa makaḣniġe, woṫaƞiƞ waṡte ki oblakiƞ kte ki heuƞ. Wiċak̇eya wowaglake. Iteṡniya omawak̇aƞk̇aƞ ṡni. Gentile oyate ki wowiċala na wowiċak̇e ki lena owiċawakiyakiƞ kte ki heuƞ Wak̇aƞṫaƞka iyayemaye.

⁸ Tohaƞl oyate ki waċekiyapi ċaƞna, ċaƞtewaṡteya yuġal waċekiyapi kta.

⁹ Wiƞyaƞ ki iƞṡ icʹigluonihaƞ aiyopteya hakiṫuƞpi kta waċiƞ. Owaƞyaƞgwaṡte eċela uƞ hakiṫuƞpi na ṗehiƞ apikiyapi kte ṡni na iƞyaƞ oteḣika na mazazi uƞ wok̇oyakapi kte ṡni.

¹⁰ Wiƞyaƞ eya Wak̇aƞṫaƞka teḣila keyapi hena waokiyapi ki waṡte kte,

¹¹ Na inila uƞpi na taƞyaƞ waablezapi kta waċiƞṫaƞgicʹiyapi kte.

¹² Wiƞyaƞ ki inila uƞpi kte na wiċaṡa ki takuni wauƞspewiċakiyapi kte ṡni, naiƞṡ eċuƞ wiċaṡipi kte ṡni.

¹³ Eċiƞ Adam ṫokahe kaġapi na hehaƞl Eve kaġapi,

¹⁴ nahaƞ wiċaṡa ki he eċa gnayapi ṡni. Eve wiƞyaƞ ki he eċa ataya gnaiḣpeyapi na waḣtani.

¹⁵ Eyaṡ wiƞyaƞ waƞ wak̇aƞyeja yuha ki he iyoḣlogya nipi kte nataƞyaƞ eċel igluha haƞtaƞṡ na wowiċala gluha na wauƞṡila na wak̇aƞya taƞyaƞ awaƞicʹiglag uƞ kte.