1 Timothy 1 - Lakota Portions

¹ Le Paul miye ċa wowapi ki le wakaġe, Wak̇aƞṫaƞka niuƞyaƞpi ṫawowaṡʹake ki uƞ Christ Jesus ṫawahoṡiye heċa makaġe. He waċiƞkiya uƞkaṗepi ki he e.

² Timothy, wowiċala wak̇aƞ uƞyuhapi ki heuƞ, ċiƞkṡiwiċayapi iyeċel ċaƞtoċignake. Wak̇aƞṫaƞka Ateuƞyaƞpi na Jesus Christ iṫaƞċaƞ ki uƞṡinilapi na taƞyaƞ niyuhapi nuƞwe.

Ipaweḣya Wauƞspewiċakiyapi Eċiyataƞhaƞ Iwahowiċayapi

³ Macedoniatakiya iblable wahehaƞ, Ephesus el oyate ki huƞḣ taku heċetu ṡni eya yaoṫaƞiƞpi hena heċuƞ ṡni wiċayaṡi kta heċel iwahowiċayayiƞ kta uƞ hena aċiyuṡtaƞ.

⁴ Takuni eċuƞ ṡni e ikċekċeya ehaƞni wiċowoyake na ohuƞkakaƞ hena yuwiċak̇e sʹe iwoglakapi. Tiwahe tokiyataƞhaƞ upi ki he eċiyataƞhaƞ iwoglakapi na haƞkeya ahoyekiċiyapi. Lena Wak̇aƞṫaƞka wowaṡi ṫawa ki he awaċiƞpi ṡni, iċiƞ Wak̇aƞṫaƞka ṫawowiċala ki uƞ eċela taku waṡte ki hena eċuƞ okihipi.

⁵ Woteḣila waƞ e ḣc̄a ki he yuha piċa ki uƞspewiċayakiyiƞ kte. Na Wak̇aƞṫaƞka ṫawowiċala ki uƞ ṫawaċiƞ ahokiṗa uƞpi kte.

⁶ Oyate eya huƞḣ lena ahokiṗapi ṡni na e wiċowoyake eya heċetu ṡni e naḣʹuƞ ċiƞpi.

⁷ Moses ṫawooṗe ki hena eċiyataƞhaƞ iye wauƞspewiċakiya ċiƞpi. Lena taku ki slolya iglawapi eyaṡ taku ċa iwoglakapi ki hena slolyapi ṡni.

⁸ Wooṗe ki hena waṡte ċa sloluƞyaƞpi, taƞyaƞ eċel igluhapi haƞtaƞṡ.

⁹ Nakuƞ tokel uƞkokaḣniġapi ki he oyate eya Wak̇aƞṫaƞka wiċalapi ki hena iƞṡiƞkċiƞ wiċakuwapi kta uƞ wiċakʹupi ṡni, eyaṡ etaƞ wooṗe kaksapi sʹa ki hena ena etaƞ ṡiċaya waec̄uƞpi sʹa, na oyate eya Wak̇aƞṫaƞka wiċalapi ṡni na waḣtanipi sʹa hena eċa uƞ wooṗe lena uƞkʹupi. Oyate eya oḣʹaƞ wiċaṡa ṡnipi sʹa na ċaƞte waniċapi sʹe ċeċahena eċa uƞ wooṗe hena uƞkʹupi, nakuƞ tiwiċaktepi sʹa na nakuƞ ena huƞku na atkuku ki wiċakiktepi hena uƞ wooṗe lena yuk̇e.

¹⁰ Wooṗe ki hena oyate eya ṡikṡilya waiċiḣaḣapi sʹa naiƞṡ wiƞkte iglawapi naiƞṡ wiċaṡa mawiċanupi na wiyoṗewiċayapi sʹa. Na oyate eya owak̇aƞk̇aƞpi sʹa naiƞṡ owayasu el owoṫaƞla woglakapi ṡni hena eċa lena owiċakiċiwapi. Taku heċetu ṡni ki hena yuowoṫaƞlapi kta uƞ lena wouƞspe ki yaƞke.

¹¹ Heuƞ Wak̇aƞṫaƞka ihaƞkeya waṡte na iṫuƞṗe piċa ki he woṫaƞiƞ waṡte ki le makʹu.

Wak̇aƞṫaƞka Ṫawowaṡte ki Pilayapo

¹² Iṫaċaƞ Christ Jesus wopila ewakiye, wowaṡʹake makʹu heċel ṫawowaṡi ki he taƞyaƞ eċamu kta uƞ iwaċiƞmaye ki he ehaƞni slolye.

¹³ Jesus ṡikṡiċa waewakiyiƞ na oṡtewagla, ṫawaċiƞ mahiƞyaƞza ki heuƞ. Eyaṡ lena taku ki eċiyataƞhaƞ slolwaye ṡni ki uƞ uƞṡimala, eċiƞ hehaƞ nahaƞḣc̄i he eċiyataƞhaƞ wowiċala bluha ṡni ki heuƞ.

¹⁴ Takuƞni imawaṡte ṡni tk̇a Jesus Christ Iṫaƞċaƞ wowaṡte na wowiċala hena yuha makiye.

¹⁵ “Christ Jesus oyate ki waḣtanipi sʹa uƞ niwiċayiƞ kta ċa mak̇a ki le el hi.” Woyake ki le heċetu, nahaƞ waċiƞyaƞpi okihipi. Wanji waḣtani sʹa na ihaƞkeya ṡiċe kʹuƞ he miyelo!

¹⁶ Eyaṡ eċiƞ oyate ṡiċapi ki he mawaƞji ki heuƞ, Wak̇aƞṫaƞka uƞṡimala na tokel Christ Jesus oyete ki ċaƞtowiċagnake ki he iyeċel miṡʹeya wauƞṡiwala kta ċa makaḣniġe. Taku uƞ heċuƞ ki he oyate ki Christ wiċalapi na wiċoni oihaƞke waniċe ki he yuhapi kte.

¹⁷ Woyuonihaƞ na wowitaƞ ki hena ohiniyaƞ Wak̇aƞṫaƞka waƞjila ki he kʹupi kta waċewakiye, he wiċoni oihaƞke wanilya na waƞyaƞkapiċa ṡniya uƞ! Nuƞwe.

¹⁸ Timothy miċiƞkṡi, wooṗe eya ċicʹu ki lena wiċaṡa wak̇aƞ waayaṫaƞiƞ eya niye ċa niċaḣniġapi, lena woiye ki taƞyaƞ awaƞyaƞglake ki hena uƞ ċaƞtetʹiƞsya nanicʹijiƞ ktelo.

¹⁹ Wowiċala luha ki he ena nakuƞ naġiksabya yauƞ kte. Oyate eya huƞḣ wowiċala ṫawapi ki iglaijenapi, naġiksapapi ṡni ki heuƞ.

²⁰ Hymenaeus e na Alexander lena wiċaṡa ki heċeḣc̄i oicʹiḣʹaƞpi ċa wak̇aƞ ṡiċa ṫawowaṡʹake ki uƞ wiċayuha kta iyayewiċawakiye, heċel Wak̇aƞṫaƞka kipajiƞpi kte ṡni.