1 Peter 4 - Lakota Portions

¹ Christ mak̇a akaƞl kakiṡyauƞ. Heuƞ niṡʹeya iyeċel nikakijiƞ kta wayakta kte, iċiƞ taku heċetu ṡni etaƞhaƞ nigluḣlaye na heuƞ teḣi waƞ lake ki he aṫaƞiƞ kte.

² Taku eya iyotaƞyala waƞ hena hehaƞyaƞ aluṡtaƞ kta ċa k̇api, na e e wiċoni niṫawa ki uƞ Wak̇aƞṫaƞka ahoyaṗiƞ kte.

³ Etaƞ Wak̇aƞṫaƞka wiċalapi ṡni kʹuƞ he iyeċel yauƞ tk̇a. Waohola ṡni yauƞ na e e taku heċetu ṡni kʹuƞ hena eċela oyale. Wiċitomni ohaƞ taku heċetu ṡni kʹuƞ hena uƞ ob iyokipiniċ'iye. Eṡ eyaṡ, nakuƞ etaƞ tokċiƞċiƞyaƞ taku wak̇aƞlapi waƞ hena owiċayaṗa.

⁴ Hena eċa waƞna takuwe owiċayaṗa ṡni ki iyukc̄aƞpi na oiniḣapi.

⁵ Eyaṡ hena Wak̇aƞṫaƞka eċa ayuptapi kte, he etaƞ nipi na etaƞ tʹapi kʹuƞ hena wiċayasu kte.

⁶ Etaƞ tʹapi kʹuƞ hena ekeyaṡ Woṫaƞiƞ Waṡte ki naḣ'uƞpi, hena nipi waƞ hehaƞ tokel uƞpi kʹuƞ he iyeċel wiċayasupi kte, na naġipi ki Wak̇aƞṫaƞka kiċi uƞpi kte.

⁷ Eċaƞni taku ki iyuha ihaƞkiƞ kte. Heuƞ iḣapiċa ṡniyaƞ yauƞpi na waċiƞṫuƞgya waċeyakiyapi kte.

⁸ Taku waƞ ihaƞkeya yawapi ki he, tuwe ki iyuha ċaƞteowiċagnakiƞ kte, iċiƞ wowauƞṡila ki he tuwe taku waṡte kʹeya naokpaniya najiƞ kʹuƞ hena waƞyaƞke ṡni.

⁹ Woyute ki hena kpaġaƞ na oyate ki yati el upi ċaƞ wowiċakʹu na wateḣila ṡno yo.

¹⁰ Wak̇aƞṫaƞka taku ota oyate ki wawiċakʹu, he otoiyohila waƞji yuha nikiyapi, oyate ki le uƞ owiċayakiyiƞ kta niċ'upi, ċa waniċ'upi ki he taƞyaƞ ilagyayo.

¹¹ Taƞyaƞ woglag walupika haƞtaƞnaṡ, Woṫaƞiƞ Waṡte ki he olakiƞ kte. Oyate ki taƞyaƞ owiċayakiya oyakihi haƞtaƞnaṡ, tohaƞyaƞ oyakihi ki hehaƞyaƞ Wak̇aƞṫaƞka waṡʹagniyiƞ kte. Taku eċuƞpi ki hena iyuha iwaƞgya waeċuƞpi kte, heċel Jesus Christ he iyoḣlogya Wak̇aƞṫaƞka yuonihaƞpi kte, he ihaƞgkeya oṫaƞgṫuƞgyaƞ uƞ, na waƞilya wowaṡʹake ki he ṫawa. Ho heċetu welo.

¹² Mitakuyepi, watohaƞlya ṡna ṗeta ohaƞ mayani sʹe iniyuṫapi kte, eyaṡ iyuṡʹiƞyaƞpi ṡniyo.

¹³ Christ ṫaƞtaƞhaƞ uƞ leċel teḣi waƞlakiƞ kte, eyaṡ ṗe yuwaƞkal ikikc̄upi na bliheliċ'iyapo. Leuƞ saƞmṗaya wowiyuṡkiƞ waƞ ihaƞkeya ṫaƞka ċa waƞlakiƞ kte, tohaƞl Christ ake gli kihaƞ.

¹⁴ Wokakije ki he tuweni waṡtelake ṡni, eyaṡ Christ uƞ ṫaƞtaƞhaƞ kakiṡnikiyapi haƞtaƞnaṡ wapi iglawapo. Woniya Wak̇aƞ ki niċi uƞ ki waƞyaƞkapi kte.

¹⁵ Tiwiċaktepi, na wamanu wiċaṡa, naƞiƞṡ wanakiḣ'uƞḣ'uƞkapi, hena woiyoṗeye waƞ kiċiyaƞkapi.

¹⁶ Christ uƞ ṫaƞtaƞhaƞ teḣiya niċuwapi ki he iṡteċe ṡniyo. Wak̇aƞṫaƞka niċi uƞ ki heuƞ iċ'ilowaƞyo.

¹⁷ Wak̇aƞṫaƞka ṫaoyate ki ehaƞtan wiċaglsu. Heċel woyasu ki he uƞkiyepi etaƞhaƞ ṫokahe iyaye haƞtaƞnaṡ, etaƞ Woṫaƞiƞ Waṡte ki wiċalapi ṡni kʹuƞ hena woteḣi waƞ takuƞni iyehaƞ ṡni ċa kiċiyaƞkapi. Wowapi Wak̇aƞ el leċel owapi,

¹⁸ "Oyate eya taƞyaƞ igluhapi eyaṡ iyusʹoya kpaptapi haƞtaƞnaṡ, etaƞ Wak̇aƞṫaƞka wiċalapi ṡni kʹuƞ hena tuktel yapi kta hwo?"

¹⁹ Heuƞ ċa, Wak̇aƞṫaƞka ṫawaċiƞ uƞ ṫaoyate ki woteḣi waƞ waƞyaƞgwiċakiye kʹeyaṡ, Unkaġapi ki he el iċ'iċ'uya uƞkʹuƞpi kte, he tohiƞniya ṫaoiye ki gluṡna ṡni.