1 Peter 3 - Lakota Portions

Winyan Na Hignakupi Ki

¹ Nakuƞ wowiċala uƞkiṫawapi ki iċupi ṡni kʹeyaṡ, winyan ki hignakupi ki ṫokahewiċayapi kte. Tuweni takuƞni okiyake ṡni kʹeyaṡ taku eċanuƞ ki he uƞ iƞṡʹeya aiċ'ibleziƞ kte,

² eċiƞ igluonihaƞ yani na Wak̇aƞṫaƞka luonihaƞ ki he waƞyaƞkiƞ kte.

³ Taku ikc̄eya uƞ ṡaiċ'iyapi ṡni naiƞṡ aiċ'iyuḣopapi ṡni yo.

⁴ Eṡ eyaṡ waḣwayela opiiċ'iyapi na ċaƞte waṡteya yauƞpi ki he ihaƞkeya Wak̇aƞṫaƞka iyokipiye ki he e yelo.

⁵ Ehaƞni wiƞyaƞ kʹeya Wak̇aƞṫaƞka wiċalapi na ċekiya uƞpi kʹuƞ hena hingnakupi ki ṫokahewiċakiyapi uƞ waṡteḣc̄api.

⁶ Eṡaṡa [Ablezapo], Sarah Abraham anakiġoptaƞ na iṫaƞċaƞ eya ċajeglate. He iyeċel iƞṡʹeya Sarah etaƞhaƞ iniċaġapi ċa tohaƞyaƞ taku ki hena taƞyaƞ eċanuƞpi na takuƞni k̇oyakiṗapi ṡni haƞtaƞaṡ.

⁷ He iƞṡʹeya iyeċel wiċa ki ṫawiċu ahawiċakiktapi kte. Na wiċayuonihaƞpi kte eċiƞ hena wiċa waṡʹakapi ki he waiyehaƞ waṡʹakapi ṡni ki heuƞ, na he kiċi wiċoni oihaƞke ṡni ki he luhapi kte. Hehaƞl niṫawoċekiye ki hena takuƞni kuṡeyeṫuƞ kte ṡni.

Suffering for Doing Right

⁸ Ahakeḣc̄i, leċel eṗa waċiƞ, iyuha akiyeċel wilukc̄aƞpi na uƞṡiyeċilakapi kte. Nakuƞ ċantewaṡteya yauƞpi na waḣwala opiniċ'iyapi kte.

⁹ Oyate ki waḣtenilapi ṡni na oṡteniglapi kʹeyaṡ ṫokiċ'uƞpi ṡni yo. Eṡ eyaṡ, tuwe ki iyuha taƞyaƞ owiċakuwapo. Wak̇aƞṫaƞka ṫaoyatepi kta nikaḣniġapi heuƞ,Wowapi Wak̇aƞ ki el heċel owapi,

¹⁰ "Wiċoni lila waṡte yalakapi na iyonikipipi yaċiƞpi haƞtaƞnaṡ hehaƞyaƞ ṡiċaya woyaglakapi kte ṡni, na hehaƞyaƞ oniwak̇aƞk̇aƞpi kte ṡni.

¹¹ Oḣ'aƞ wiċaṡa ṡniyaƞ yauƞpi ki he aluṡtaƞpi kte na e e ċaƞku waƞ aḣwayela yaƞke ki he oyalepi kte.

¹² Tuwa eya Wak̇aƞṫaƞka oholapi ki hena awaƞwiċayaƞkiƞ kte, na ṫawoċekiyepi ki hena anawiċaġoptaƞ kte. Eyaṡ, etaƞ kipajiƞpi ki hena anawiċaptiƞ kte."

¹³ Taku heċetu ki hena eċanuƞ haƞtaƞnaṡ tuwe ċa uƞṫuƞniya okihi hwo?

¹⁴ Taku heċetu ki hena eċanuƞ ki heuƞ woteḣi waƞlakiƞ kte, kʹeyaṡ heuƞ Waƞk̇aƞṫaƞka niyawaṡte kte. Ċa oyate eya waḣtenilapi ṡni ki hena k̇owiċakiṗe ṡni yo.

¹⁵ Christ wiċoni niṫawa ki el Iṫaƞċaƞ yakiye ki heuƞ yuonihaƞyo. Ohiƞniya igluwiƞyeya yauƞ kte, heċel tuwa wowiċala waƞ luha ki he eċiyataƞhaƞ winiyuƞġe ki,

¹⁶ taƞyaƞ waċiƞksabya alupta oyakihi kte, heċel tuwa Christ luonihaƞ ki heuƞ oṡtenigla kʹeyaṡ, waluonihaƞ ki heuƞ iṡteliċ'iyapi kte.

¹⁷ Wak̇aƞṫaƞka luonihaƞ ki heuƞ nikakije ki he iyeṡ waṡte nahaƞ woṡiċe iċanuƞ uƞ nikakije ki he.

¹⁸ Wowaḣtaƞni uƞkiṫawapi uƞ Christ waƞċaḣc̄iƞ tʹe. Tuwe waƞ wowaḣtaƞni iyauƞpepiċa ṡni ċa tʹe, na etaƞ heċel uƞpi kʹuƞ hena e nipi kta uƞ heċuƞ. Wak̇aƞṫaƞka el uƞkaupi kta uƞ heċuƞ, ṫaċaƞ ki ktepi na naġi yukinipi waƞ hehaƞ.

¹⁹ Hehaƞl Christ etaƞ Woṫaƞiƞ Waṡte ki naḣ'uƞpi ṡni uƞ onuƞniyata kaṡka uƞpi kʹuƞ hena wahokuƞwiċakiye.

²⁰ Wak̇aƞṫaƞka Noah wata waƞ kaḣṡi waƞ hehaƞ, lena wanaḣ'uƞpi ṡni kʹeyaṡ waċiƞṫaƞgya owiċakuwa. Oyate etaƞ tuweweka ṡagloġaƞ wata el itimael iyayapi na mnitaƞ ṫaƞka etaƞ niwiċayapi.

²¹ Mnitaƞ ṫaƞka ki he wak̇aƞ woeċuƞ waƞ mnianiċaṡtaƞpi ki uƞ yanipi kta eyapi ki he iyeċetu. Eyaṡ mniawiċakaṡtaƞpi ki he mni eċela uƞ ṫaċaƞ ki niyujajapi kte ṡni. Tk̇a Wak̇aƞṫaƞka etkiya ṫawaċiƞ waṡteya uƞ miċ'iċ'u kte, eċiƞ Jesus Christ wiċuƞtʹe etaƞhaƞ yukinipi ki heuƞ.

²² Christ waƞna maḣpiyata uƞ, heċiya Wak̇aƞṫaƞ iṡliyataƞhaƞ isakibya yaƞke. Ogligle-wak̇aƞ ki, na maḣpiya wokiċuƞze ki, na taku woiṫaƞċaƞ yawapi ki, hena iyuha napiyusya yaƞke.