1 Peter 1 - Lakota Portions

¹ Le Peter, Jesus Christ ṫawahoṡiye ki e. Wak̇aƞṫaƞka ṫaoyate ki oyate ṫokc̄api sʹe mak̇a glakiƞya okablelya uƞpi, Pontus etu na, Galatia etu na, Cappadocia etu na, Asia etu na, Bithynia el.

² Ate Wak̇aƞṫaƞka ṫaoyatepi kta niċaḣniġapi, na Woniya Wak̇aƞ ki uƞ niyuwak̇aƞpi. Ehaƞni Ṫaṫaƞka ki we kpapsuƞpi heċel oyate ki nipi kta he iyeċel, Jesus Christ we kpapsuƞ na wiċoni ekignake ki he ohoyalapi haƞtaƞnaṡ yani pi kte. Wak̇aƞṫaƞka uƞṡinilapi na wookiye niċ'upi kta uƞ ċewakiye.

Waċiƞyekiya-Piċa

³ Jesus Christ atkuku ki, Wak̇aƞṫaƞka yataƞpo. He lila wauƞṡila, na he Jesus wiċuƞtʹe etaƞhaƞ yukiƞni ki heuƞ wiċoni ṫeċa waƞ uƞkʹupi na waċiƞyekiya uƞkʹuƞpi.

⁴ Maḣpiya wokiċuƞze el, Wak̇aƞṫaƞka, taku waƞ niċiyuwiƞyeya, he tohiƞniya okukiƞ kte ṡni, naiƞṡ yuṡiċapi okihipi kte ṡni, naiƞṡ yutakuƞni okihipi kte ṡni.

⁵ Wak̇aƞṫaƞka wiċayala ki heuƞ ṫawowaṡʹake uƞ niyuha kte, aƞpetu ihaƞke ekta wiċayasupi kte ki hehaƞyaƞ. Na hehaƞl woohiye waƞ ċiƞniċiye kʹuƞ he yuha niċiƞyiƞ kte.

⁶ Heuƞ aƞpetu ki he el iyonikipi kte, nakuƞ wokakije eya ohaƞ ni kte kʹeyaṡ.

⁷ Wowiċala niṫawa ki mazazi ċa ṗeta uƞ iyuṫapi iyeċel eṡ eyaṡ isam waṡte kte. Heuƞ wowiyuṫe eya taku wiċayala ki uƞ iniyuṫapi eyaṡ ihaƞgyepiċa kte ṡni. Hehaƞl woyataƞ, na woyuonihaƞ, na wowitan, un niyuonihaƞpi kte tohaƞl Jesus Christ ake gli kihaƞ.

⁸ Jesus Christ tohaƞni wanlake ṡni, na waƞna wanlake ṡni. Eyaṡ wiċayala na taku uƞ wiċayala ki he teyaḣila, naġi niwiċayapi waƞ niċ'upi ki he wopila uƞ woiye eya eha yaċiƞ kʹuƞ hena waƞniċe sʹeċa.

⁹ Heuƞ ċa wowiċala luha.

¹⁰ Wiċaṡa wak̇aƞ waayaṫaƞiƞ eya huƞḣ leċel eyapi, Wak̇aƞṫaƞka tokel niċuwa kte ki he, woyawaṡte waƞ ikipipi ṡni ċa un niyawaṡtepi kta eyapi, na he naġi wiċoni eyapi ki he samṗaya okaḣnikiyapi kta ċa olepi.

¹¹ Christ ṫaoniye ki he slolyapi na tokel Christ woteḣi waƞ waƞyaƞkiƞ na tʹiƞ kte hehaƞl woyuonihaƞ ṫaƞka waƞ kʹupi kte ki he ableswiċakiyake.

¹² Eyaṡ niye ċa uƞ woilagiċ'iyapi kte na iye ahaiċ'iktapi kte ṡni ki he owiċakiyakapi. Woniya Wak̇aƞ ki maḣpiyataƞhaƞ hiyuyapi kʹuƞ he ṫawowaṡʹake ki un wahokuƞniċiyapi. Na Woṫaiƞ Waṡte ki he ogligle ki iƞṡʹeya samṗaya naḣ'uƞ ċiƞpi kʹeyaṡ niye ċa niċ'upi.

Wak̇aƞṫaƞka Wak̇aƞya Yauƞ Kta Ċa Niċaḣniġe

¹³ Iwaktaya na taƞyaƞ wiyukc̄aƞpo. Tohaƞl Jesus Christ ake gli kihaƞ Wak̇aƞṫaƞka Tawowaṡte ki uƞ oiyokipiya niyawaṡtepi ktelo.

¹⁴ Wak̇aƞyeja ċa taƞyaƞ waanaġoptaƞpi iyeċel opiiċ'iyapo. Taku eya ehaƞni niye ċiƞiċ'iyiƞ na hena kaṡkanize kʹuƞ hena hehaƞya heċetu kte ṡni.

¹⁵ Wak̇aƞṫaƞka ṫawokiċuƞze el oyate ki tokel igluhapi kte ki iyeċel uƞpo, Iċiƞ Wak̇aƞṫaƞka wak̇aƞ na iye ċa nikaḣniġe.

¹⁶ Heċa uƞ Wowapi Wak̇aƞ ki heċel owapi, "Wak̇aƞṫaƞka lemiye, na niṡeya wak̇aƞya nigluhapi kte."

¹⁷ Wak̇aƞṫanka Ateyayapi kehapi, eyaṡ Wak̇aƞṫaƞka tuwa waƞjila iyotaƞla ṡni! Tk̇a tuwe taku eċuƞpi ki hena akiyeċelya wiċayuze. Heċauƞ mak̇a le el yanipi eċuƞhaƞ Wak̇aƞṫaƞka luonihaƞpi kte.

¹⁸ Tuƞkaṡilawiċauƞyapi eya huƞḣ ṫogmuṡniya uƞpi ċa niṡeya iyeċel iniċaġapi hetaƞhaƞ wayaka wiċakiyuṡkapi iyeċel niyuṡkapi. Eyaṡ maza ska naƞiƞṡ maza zi eya optelela waṡte ki hena uƞ ċa aṗeniṫuƞpi ṡni.

¹⁹ Eyaṡ Christ ṫaḣċiƞċala ċa we kpapsuƞya tʹe ki he iyeċel wiċoni ekignake heċel wayaḣtani ki he uƞ niċiċaijupi.

²⁰ Wak̇aƞṫaƞka mak̇a ki le kaġe ṡnihaƞni Christ kaḣniġe, eyaṡ niyepi uƞ nakeṡ aƞpetu ehake le el gluaṫaƞiƞ.

²¹ Na ṫaiƞiċ'iye ki heuƞ, Wak̇aƞṫaƞka wiċayalapi kte, He wiċuƞtʹe etaƞhaƞ yukini na wowitaƞ uƞ yuonihaƞ. Le uƞ Wak̇aƞṫaƞka wiċayalapi na taku k̇e ki he waċiƞyekiya ayaṗepi.

²² Taku heċetu ki he wiċayalapi, na heuƞ naġi niyawaṡtepi. Ċa he uƞ ċaƞte etaƞhaƞ tekiċiḣila yauƞpi. Na heċel yauƞpi ki waṡte kte.

²³ Woṫaƞiƞ waṡte waƞ oihaƞke waniƞċe ki he Wak̇aƞṫaƞka nayaḣ'uƞ niċiyapi he uƞ unṡiyeċilapi kte.

²⁴ Wowapi Wak̇aƞ el leċel owapi, "Ikc̄e wiċaṡa ki mak̇a el peji iċaġe ki iyeċel uƞpi, na ṫaoye ki iṫuƞṗepiċa, eyaṡ wanaḣc̄a na peji ki puziƞ na ṡeċa kte.

²⁵ Eyaṡ Wak̇aƞṫaƞka taku eye ki he oihaƞke waniċiƞ kte." Leċel uƞkoniċiyakapi waƞhe Woṫaƞiƞ Waṡte ki e.