Lucas 1 - Porciones en Mixe de Huitepec

Teófilo jä'ä nejk yajktunikex

¹ Nimay jä jayeta tjanipëëmete jäts tjaatat wintsoj tiuune kiojtse juu kujk Kunu'kxtee tun mëët ïïm,

² we'en ixu'n ëëts ojts nyajktumumatyek pën ojts t'ix tjawa wintsoj ojts tsyoontejk wa'nits yajktunipëjkte jäts t'awanetat jä oy kets jä oy ayuuk.

³ Ëts nawye'en, ntukukotsep ëts mits Teófilo, të ëts nyajktïwa nyajktumtsa wintsoj ojts tsyoontejk, we'en ëts nwimmay npayo'oy jäts mits ntunijayat tïw tïjkx,

⁴ jäts xnijawat tso tïwa ixwa juu kujk myajk'tuuk'ix.

Ku jä ángel t'awana jäts kä'äxwaamp jä Juan yajknëpätpa

⁵ Jä juunt jä'ä Herodes yajkutujk jäm Judea. Jäm tu'k ijt jä Tee' tsyiina juu txëë Zacarías, Abías jä jyaye. Jä ijt xyëë tye'extëjk, Isabel jä'ä Aarón tyaatsk'ap.

⁶ Oy jaye jä'äta Kunu'kxtee wyinkujkm kyutiuuntep jä kyutujken jäts jä pyawaanen wa'ats oy wa'ats tsuj.

⁷ Ka' y'unek pënta paatty ku Isabel tunipëman ja ijt jäts ka' unejkat; jäts mëjaywan jääta.

⁸ Tu'k jä xëë juma Zacarías tyuketaake tsyapkotset jäp tsaptïjkp,

⁹ we'en wintsoj ijt tu'nta jä'ä teetëjkta, jäts tyuketaake Zacarías tyëkat jäp tsaptïkp jäts jä poom tyajkjoket juma kunu'kx ijt.

¹⁰ Ku'ts jä'ä poom tyajkjek jäp tsaptïkp, jäts jä nimay jaye tsyapkotsta jäp tsaptëjk tajukp.

¹¹ Wa'nit jä'ä mëjWintsën y'ángel ojts jyeya juma Zacarías, jäm akayentso tyena juma jä poom jokpäjtken.

¹² Ku jä Zacarías t'ixpaaty jä ángel, ojts tu atïwa jäts mëjk tsye'ke.

¹³ Jäts jä ángel ojts nyë'ëmxe: —Ka' mtsë'ka Zacarías, tëë jä'ä Kunu'kxtee t'amotenäx mits jä m'amoten pëjk'tsowen, jä mte'extëjk Isabel mowaanep tu'k jä'ä unejk, jä'ä xyëëjap Juan.

¹⁴ Mpaatep mits jä jotkuken mëët jä xoontken, may jaye tuxoontejktap ku jä'ä kyä'äxet,

¹⁵ jä m'unek nimëj jä'ä nëjkx ijt Kunu'kxtee winkujkm. Ka y'uuket myujket, oyam jä'ä kya kyë'ëxnim myëëtan jä kunu'jkx poj.

¹⁶ Jä'ä tyunep jats may jä Israelitas t'awimpitetat jä Wintsën Kunu'kxtee.

¹⁷ Yë Juan twinjayepap jä Kunu'kxtee y'unek, we'en jä kunu'kx poj tmëëta jä mëjken we'en ixu'n ijt jä'ä kukeyepa Elías, jä'ä tyunep jäts jä unektee mëët jä y'unek nyay oy kotsetenet jäts jä'ä ka'oyjayep oy winmaayen tpaatat. Jä juan tka'amayep jä kajpen jäts nyaajk'oyetat jäts jä Kunu'kxtee y'ayuuk tkupëjktat.

¹⁸ Zacarías tyajktïwa jä ángel: —¿Wintsoj ëts jantsy'jawat yë xaja? Mëjaywan ëëts mëët nte'extëjk.

¹⁹ Jä ángel y'atsoowe: —Ëts Gabriel, jä'ä ëts ntuump tso Kunu'kxtee xpawany, xmoopy ëts jä Kunu'kxtee kyutujken, jä'ä ëts xkäxp jäts mits nmënakyotset jäts nyaket nam ayuuk.

²⁰ Pën ka' xjantsy'jawa ëts n'ayuuk, wa mtanet xäm uum, ka' m'uk kotsnet koonem jä xëë paatet jäts kyutyunjet.

²¹ Jäts jä kajpen jaye t'aax ijta jä Zacarías, jäts nyajktïwxeta tiëx kya pitsem jäp tsaptïkp te tyanyoojkne.

²² Ku ojts pitsemne, jäts uum tjätne; jäts ojts twinmoteta jäts t'ix jä wision jäp tsaptïpk wa ojts kyotsne y'aa kyëë tyak yoyne, jeky ijt uum ka' kyets.

²³ Ku ojts tyuunk pyuukne jäts jä Zacarías nyëjkxne tyëjkwintem.

²⁴ Ku yëë xaa nyax, wa'nit jä Zacarías tye'extëjk Isabel mëtax tyaan; muwooxk poo jä Zacarías kya pitsem tyëjkjootm myay tya':

²⁵ Paaty ëts we'en jä Wintsën xtun jäts jä jaye ëts xtsojktat.

Tu'k jä ángel t'awana jäts kä'äxwaamp jä Jesús

²⁶ Ku Tuttejk po'o, jä'ä Kunu'kxtee ojts tkex jä y'ángel Gabriel jäm kajpen Galilea ijt jootm juu kyuxë'ëtep Nazaret,

²⁷ jä'ä tyunike'exp jä kiixte'ex juu txëë María ka'nem jä ya'atyëjk tmëët tsïïna, jä'ä wyena t'atsoowne jä'ä ya'atyëjk juu txëë Jose jäts tmënapyëket, jä yajkutujkpa David tyaatsk'ap.

²⁸ Jäts jä'ä ángel jyay María tyëjkwiinte jäts tnïmye: —Tëë jä Kunu'kxtee mkunu'kxe, jä mëjWintsën mëët mits m'it.

²⁹ Jäts jä María ojts tu atïwa jä ayuuk, jäts payotyëka tiëx ëts yëë xkotspeekx.

³⁰ Jäts jä ángel ojts nyë'ëmxe: —María, ka' mtsëka, tuxoontke jä Kunu'kxtee myaayen.

³¹ Xyam mtanet mëëtax: Mpaatwampy tu'k jä unek, wa xyëjap Jesús.

³² Ni mëë ijtet jä ya'atyëjk, jä'ä tkuxëëtat Kunu'kxtee y'unek juu tmëët jä nimëjen, jäts jä mëjWintsën Kunu'kxtee tyukotspatwä'anye yajkutujkpa, ixam ijt jä David,

³³ we'en wintsoj yajkutuket xëmakëxm jäm Jacob kyapën këxm. Jä kyutujken ka' nikëxen tmëtat.

³⁴ María tyaktïwa jä ángel: —¿Ka' ëts pen nya'atyëjk, wintsoj jawe we'en tiunjet?

³⁵ Jäts jä ángel y'atsëw: —Jä Kunu'kx poj mtujä'yap, jä Kunu'kxtee myawo ju wa'ajts këxm jä'ä mni'äpap. Paaty jä maax juu kä'äxwaamp jä'ä yajkxemoet wa'ats jä Kunu'kxtee y'unek.

³⁶ Nawye'en jä mukä'äx Isabel pyatwäämpy jä'ä y'unek. Oyam jä tmyëjaywene; jä juu tïtep jäts ka' y'unejka. Tujtek po'an tsëmit jä maax.

³⁷ Oyxekëxep jä'ä Kunu'kxtee.

³⁸ Wa'nit jä María tnïmye: —Jä'ä Wintsën tyuumpa ëts n'it; we'en jä Kunu'kxtee tune mëët ëts; we'en ixu'n mits mwa'any, wa'nit jä ángel nyëjkxne.

María tku ix jä Isabel

³⁹ María jatye nïkx jäm kajpen këxm jä'tu'k it kopkëxm jäm Judea,

⁴⁰ ku jäm tyëke Zacarías tyëkjootm jäts tkotspeekx jä Isabel.

⁴¹ Ku Isabel ojts tmote jä María kyotspookxen, jäts jä maax ojts xyoontek jäm jyotm, jäts ojts tyutëkjä jä Kunu'kx poj.

⁴² Wa'nit jä Isabel mëjk kyets jäts tnïmye: —Jä Kunu'kxtee te mkunu'kxe niyujk katii nijum jä te'extëjkta, tëë jä m'unejk yajkunu'kx.

⁴³ ¿Pën ëtse, jäts ëts xnijä'yat xku'ixet ëts jä nWintsën tyaak?

⁴⁴ Wa'ajts jatye ku nmote jä mkospokxen, ëts n'unek xyoontek ëts njotm.

⁴⁵ Kunu'kx mits ku xjantsyjawa jäts kutyunjep jawe, ju mëjWintsën kyetsp.

⁴⁶ María wya'any: Ëts njaawe'en tyukukotsep jä Kunu'kxtee nimëjen.

⁴⁷ Ntuxoonkept ëts jä Kunu'kxtee nitsooken,

⁴⁸ ku ëts jä Kunu'kxtee te xwinken jäts ets x'ixpaaty, ayowa tuumpa ëts n'it, xyam tkotsukwantat jäts tkots ijtat jäts xoon ëts;

⁴⁹ të jä nimëj juu oyxekexep niyuk ëts xtuuna jä myaayen pyutë'ken. Wa'ajts jä Kunu'kx xyëë.

⁵⁰ Kunu'kxtee ijtp jä tmëëta jä tumo'ten pen pën twintsejkep.

⁵¹ Tyuump jä Kunu'kxtee mëët jä kyutujken, tyajkwintoke jä winmayenta jä ju mëj këxm nayjawetep,

⁵² tyajkwintoke jä yajkutujkpatëjkta jä ka' oy jaye jäts tyajkëxemputek jä oy jaye.

⁵³ Pyutëjkep jä ayoow jaye jäts jä juu jotkuk nayjawetep ka' jä tputëjke.

⁵⁴ Pyutëjke jä kyapën Israel, jä'ä tyuumpa, ka' ojts tjatyoke jä'ä myaayen myëët jä tumooten.

⁵⁵ We'en jä kyotstany tyajkktaany mëët ïïm jä ntaatsk'ap Abraham,

⁵⁶ María tyaany mëët Isabel jäm tyëkjootm tuujk po'o ju'n, wa'nit tyëkjootm wimpijtne.

Juan yajknëpätpa kye'ex

⁵⁷ Ku ojts pyuukne jä xëë po'o ku jä Isabel y'unek kyä'äxwaane, jäts kye'ex jä y'unek.

⁵⁸ Wa'nit jä'ä myutëjktemta, jä'ä muwu'kta nyëjkxte ku'ixpa, ku ojts tnijaweta jäts jä kunu'kxpa jä'ä ojts tyuuk ixe jä tumo'ten, wa'nit ojts tmëët xoontejkta.

⁵⁹ Ku tutujtek xëë tyajknëkxte jä maax unejk jäts tsujket, we'en tsojkte jäts tyee txëëpëjket Zacarías.

⁶⁰ Jäts jä tyaak wya'any, —Ka'. Wa yëë xyëjap Juan.

⁶¹ Jäts ojts y'atsowta: —Nipën muwuka we'en tka' xëëjä.

⁶² Wa'nit jä jayeta jä y'aa kyë'ë tjä tyajkyo'yta tjä yajktïweta jä unek tee, tii xëëpëëmawa'any.

⁶³ Jäts jä unejktee t'amote tu'k jä pëjye'tsaa jäts yukjä'et, jäts jyaay: Jä'ä xyëjap Juan. Nijum ojts tu'atïweta.

⁶⁴ Jatye Zacarías ojts kyots pïjk, jäts ojts mëjk t'ajoota jä Kunu'kxtee.

⁶⁵ Nijum jä jaye wa'ajts atïwa ojts tjaweta, jäts tkotsta tmatyëjkta atïwa tï tyune jäm jä tu'k it kopk'akujkm Judea.

⁶⁶ Pënjäty ojts tmoteta kë'ëm tmumayta tmu'tata: ¿Pën it'wa'any yë maax? Jäts jä mëj Wintsën tïwa tyajkjay'ixe jä nyimëjen, jäts jä myaayen yëë këx.

Yëë Zacarías y'ïw

⁶⁷ Jä Zacarías, jä pïjk unejk tyee, jä kunu'kx poj jä'ä mooyep jä mëjken jäts jä winmayeen, jäts ojts tnaskotsa jä Kunu'kxtee y'aa y'ayuuk, jäts wya'any:

⁶⁸ Kunu'kx it jä'ä Wintsën, Kunu'kxtee jyaa Israel, jä'ä tnimets jäts juyimpitet jä kyapën.

⁶⁹ Të ïïm xtunikäxem jä nimëj yajktsoojkpa, David tyaatsk'ap, jä'ä tyuumwa.

⁷⁰ We'en jekan jä'ä kotstan tyajktaany jä'ä ojts twaanya jä Kunu'kxtee kyukexepa:

⁷¹ Ku jä kamäjxpa xkamäjkxem jä'ä ïïm xkuwaanmep nijum juu xkamäjkxem juu xwiink'ixem,

⁷² myetap jä ni'ixkitaken mëët jä jayeta juu jekan juukyete naaxwiinete ka' jä'ä tjatyokewet jä y'oyen pyëkminen.

⁷³ We'en jä kojtstany tyajkktaany mëët ïïm jä tee' Abraham: yajkjatep jä'ä:

⁷⁴ Njuukyemet nitiya nkatsemet, yajkakëxep jä'ä winëëmpa, jäts jä'ä mutuunmep,

⁷⁵ jä'ä këx mjuukyat oy aa oy ayuuk xpaattet win xëë, ïïm it'met jä'ä mëët.

⁷⁶ Jäts mits n'unejk, yajk'anaxpa m'ijtet mëët jä Kunu'kxtee juu wa'ats këxm, mits winjayëpap jä Wintsën, nyëë' tyuu xyajk'oyat,

⁷⁷ jäts xtuujk nijawat jä kyapën jäts Kunu'kxtee token määkxpa jä'ä jäts tmoet jä nitsooken.

⁷⁸ Jäts ïïm jä nKunu'kxtee mëj jä tumo'ten tjakyep, jäm tsapjotm xtunikaxem jä nitsooken we'en ixu'n it jya'wiw,

⁷⁹ jäts tmoet jä ajätejk juu akoots'itep juukyetep, jä'ä wintupëken moojetap jäts tpaattat jä oy në'ë' oy tuu.

⁸⁰ Jä pijk'unejk yääjk'atëëtsp jä'ä, myeet jä kunu'kx poj mëjkpëjk'atëëtsp jä'ä, jäm jä jyuukye apajk it jootm, konem ojts jä xëë tpaaty jäts nyajknikäxe may jaye winkujkm jäm Israel kyajpenkëxm.