Matfei 1 - Uuzi Sana

IISUSAN RODIENDU DA LAPSUSAIGU 1-2 Iisusan tuatat da tuattoloin tuatat

¹ Tämä on Iisusan Hristosan, Davidan poijan da Avraaman poijan rodulangu.

² Avraamale rodiihes Isakku, Isakale Juakoi, Juakoile Juudu da hänen vellet;

³ Juudale Peres da Serah, kudamien muamo oli Tamar, Peresale Hesron, Hesronale Ram,

⁴ Ramale Aminadab, Aminadabale Nahson, Nahsonale Salma,

⁵ Salmale Boas, kudaman muamo oli Ruavu, Boasale Ovid, kudaman muamo oli Ruf՚, Ovidale Iisai;

⁶ Iisaile rodiihes David, suari. Davidale rodiihes Solomon, kudaman muamo oli Uurien akku;

⁷ Solomonale rodiihes Rehabeam, Rehabeamale Avia, Aviale Asaf,

⁸ Asafale Josafat, Josafatale Joram, Joramale Ussia,

⁹ Ussiale Jotam, Jotamale Ahas, Ahasale Hiskia,

¹⁰ Hiskiale Manasse, Manassele Amos, Amosale Josia;

¹¹ Josiale rodiihes Jekonii da sen vellet Vavilonah siirron aigua.

¹² Sen siirron jälgeh Jekoniele rodiihes Sealtielu, Sealtielale Serubbabel,

¹³ Serubbabelale Abihud, Abihudale Eliakim, Eliakimale Asur,

¹⁴ Asurale Sadok, Sadokale Jakim, Jakimale Elihud,

¹⁵ Elihudale Eleasar, Eleasarale Mattan, Mattanale Juakoi,

¹⁶ Juakoile Josif, Marijan ukko, Marija sai Iisusan, kudamua sanotah Messiekse.

¹⁷ Nenga rahvahanpolvii Avraamas Davidah suate on kaikkiedah n՚ellitostu, Davidas Vavilonah siirdymizeh suate sežo n՚ellitostu polvie, i Vavilonah siirdymizes Messieh suate vie n՚ellitostu polvie.

Iisusan rodiendu

¹⁸ Iisusan Hristosan rodiendu oli nengoine. Marija, Hänen muamah, oli uskaldettu Josifale mučoikse. Enne heijän yhtehmenendiä nähtih, Marija on kohtuine. Tämä kohtu oli Pyhäs Henges tulluh.

¹⁹ Josif oli hyvä ristikanzu i ei tahtonuh huijata hänele uskaldettuu Marijua rahvahan ies, a tahtoi hil՚l՚azeh jättiä händy.

²⁰ Konzu Josif duumaičči sidä, yöl unis tuli hänen luo Taivahallizen Ižändän anheli da sanoi: «Josif, Davidan poigu, älä varua ottua Marijua mučoikse. Se, mi on hänen kohtus, on Pyhäs Henges tulluh.

²¹ Häi suau poijan, i sinul pidäy andua Hänele nimi Iisus, ku Häi piästäy oman rahvahan riähkis.»

²² Tämä kai rodih sendäh, ku tuldas tovekse nämä sanat, kudamat Taivahalline Ižändy oli sanonuh oman iänenkandajan suul:

²³ – Kačo, n՚eičoi rodieu kohtuzekse i suau poijan, i sille annetah nimi Emmanuil – se on: Jumal on meijänke.

²⁴ Havaččuhuu Josif ruadoi muga, kui Ižändän anheli oli käskenyh, i otti Marijan mučoikse.

²⁵ Vai häi ei koskenuh Marijua, kuni tämä ei suannuh poigua. Josif andoi poijale nimen Iisus.