Marku 1 - Uuzi Sana

IISUSAN RUADOLOIN ALGU 1-3 Iivan Ristii

¹ Hyvä viesti Iisussah Hristossah, Jumalan Poigah näh, lähti liikkehele nenga:

² Jumalan iänenkandajan Isaijan kniigas on kirjutettu nämä Jumalan sanat: – Minä työnnän iel Sinuu oman viestinvedäjän, kudai varustau Sinule dorogan.

³ Kirgujan iäni kuuluu elämättömäs muas: – Valmistakkua Ižändäle dorogu, luajikkua oigiekse Hänen tropat!

⁴ Muga rodihgi. Iivan ristii rahvastu elämättömäs muas da saneli, ku heil pidäy hyllätä riähkät, kiändyö Jumalan puoleh da ottua ristindy, ku suaja prosken՚n՚u riähkis.

⁵ Hänen luo tuli äijy rahvastu Jerusalimaspäi da Juudien joga puolespäi. Hyö sanottih omat riähkät, i Iivan ristii heidy Jordanjoves.

⁶ Iivanal oli piäl verbl՚uudan villas luajittu soba, kudai oli vyötetty nahkuvyöl, hänen syömizenny oldih čirkat da meččykimalehien mezi.

⁷ Häi saneli: «Jälles minuu tulou minuu vägevembi. Minä en päi ni kumardumah, ni kerittämäh Hänen jallaččiloin nuorazii.

⁸ Minä ristiin teidy viel, Häi ristiy teidy Pyhäl Hengel.»

Iisussua ristitäh da Hänen mielii opitah

⁹ Niilöinny päivin Iisus tuli Galilein Nazarietan linnaspäi, i Iivan ristii Händy Jordanjoves.

¹⁰ Vies nostes Iisus nägi, kui taivahat levähtettihes avvoi, da Hengi kyyhköilinduzennu heityi Hänen piäle.

¹¹ I taivahispäi kuului iäni: «Sinä olet Minun armas Poigu, Sinuh Minä olen mieldynyh.»

¹² Kerras sen jälgeh Hengi ajoi Händy elämättömäh muah.

¹³ Iisus oli elämättömäs muas n՚ellikymmen päiviä sattanan muaniteltavannu. Häi eli meččyelättilöin joukos, a anhelit piettih Hänes huoldu.

Iisus algau oman ruavon

¹⁴ Sen jälgeh, ku Iivan oli otettu kiini, Iisus tuli järilleh Galileih da saneli Jumalan jevangeliedu.

¹⁵ Häi sanoi: «Aigu on tulluh, Jumalan valdu on tulluh lähäle. Hylläkkiä riähkät da uskokkua hyväh viestih!»

Enzimäzet opastujat

¹⁶ Konzu Iisus astui Galileinjärven randua myöte, Häi nägi Simonan da sen vellen Andrein. Hyö oldih laskemas verkuo järveh, ku oldih kalastajat.

¹⁷ Iisus sanoi heile: «Astukkua minule jälles. Minä luajin teis ristikanzoin pyydäjii.»

¹⁸ Sil sanal hyö jätettih verkot da lähtiettih Hänele jälles.

¹⁹ Palazen peräs Iisus nägi Juakoin da hänen vellen Iivanan, Zevedein poijat. Hyögi oldih venehes, sellitettih verkoloi.

²⁰ Iisus kerras kučui heidy. Hyö jätettih Zevedei-tuatto da hänen palkuruadajat veneheh, a iče lähtiettih Iisusale jälles.

Iisus Kapernauman sinagougas

²¹ Hyö tuldih Kapernauman linnah. Suovattan Iisus meni kohti sinagougah da opasti sie.

²² Rahvas diivuittihes Hänen opastandoi. Häi opasti heidy muga, kui opastau se, kel on valdu, a ei muga, kui opastetah zakonanopastajat.

²³ Sil kerdua linnan sinagougas oli mies, kudai oli paganhengen vallas. Häi rubei kirgumah:

²⁴ «Midäbo sinä meispäi tahtot, Iisus Nazariettalaine? Oletgo tulluh meidy hävittämäh? Minä tiijän, ken sinä olet, Jumalan Pyhä!»

²⁵ No Iisus käski kovah paganhengele: «Salbua suu! Lähte hänespäi iäre!»

²⁶ Sit paganhengi puistaldi miesty i suuren iänenke lähti hänespäi.

²⁷ Kaikin hämmästyttih i kyzeltih toine toizel: «Mibo tämä ollou? Täl miehel on valdu opastua uudeh luaduh! Paganhengetgi kuunnellah Hänen käskyy.»

²⁸ Paginat Hänes levittih kaikkiele ymbäri Galilein muadu.

Iisus piästäy Simonan muatkoin da muut voimattomat

²⁹ Sinagougaspäi hyö kerras mendih Simonan da Andrein kodih. Juakoi da Iivan oldih heijänke.

³⁰ Simonan muatkoi virui suures žuarus, hyö kerras sanottih Iisusale häneh näh.

³¹ Iisus meni hänen luo, otti käis i avvutti nosta. Žuaru lähti naizespäi, häi rubei gostittamah tulluzii.

³² Ehtäl, konzu päiväine laskih, Iisusan luo tuodih kai voimattomat da net, kudamat oldih karuloin muokatut.

³³ Kai linnu kerävyi uksen edeh.

³⁴ Iisus piästi äijii, kedä vaivattih kaikenmoizet voimattomuot, da ajoi ristikanzoispäi äijän karuu. Häi ei andanuh karuloile paista, ku net tiettih, ken Häi on.

Iisus lähtöy iäre Kapernaumaspäi

³⁵ Aijoi huondeksel, konzu vie oli pimei, Iisus nouzi da lähti pihale. Häi meni yksinäzeh kohtah da moliihes sie.

³⁶ Simon da hänenke olijat mendih Iisussua eččimäh,

³⁷ löyttih Händy da sanottih: «Kaikin ečitäh Sinuu.»

³⁸ No Iisus sanoi: «Davaikkua lähtemmö tiäpäi iäre da menemmö rinnalolijoih kylih. Minul pidäy niilöisgi sanella Jumalan sanua, sendähhäi minä olen tiä.»

³⁹ Muga Häi lähti da käveli kaikkiel Galilein muadu myöte, saneli Jumalan sanua sinagougis da ajoi iäres karuloi.

Iisus piästäy prokuazal voimattoman

⁴⁰ Iisusan luo tuli prokuazal voimatoi, langei polvilleh da pokoroiččih: «Ku tahtonet, Sinä voit puhtastua minuu.»

⁴¹ Iisusale rodih žiäli händy. Häi oijendi käin, kosketti miesty da sanoi: «Minä tahton. Puhtastu.»

⁴² Kerras prokuazu lähti miehes iäre, häi rodiihes puhtahakse.

⁴³ Iisus työndi hänen iäres da kieldi lujah:

⁴⁴ «Kačo, ku nikelle et sanos nimidä täh niškoi. Mene vai ozuttai papile da anna omas puhtastundas se, min Moisei on käskenyh andua, ku kaikin nähtäs sinun puhtastundu.»

⁴⁵ No siepäi lähtehyy mies rubei kaikkiel sanelemah, midä Iisus oli luadinuh. Sendäh Iisus ei voinnuh enämbiä kaikkien nähten mennä ni yhteh linnah. Häi pyzyttelih linnoin ulgopuolel elämättömis kohtis, i kaikkielpäi tuli Hänen luo rahvastu.