Iivan 1 - Uuzi Sana

Sana tuli ristikanzakse

¹ Allus oli Sana. Sana oli Jumalan luo, i Sana oli Jumal.

² Alguu myö Sana oli Jumalan luo.

³ Kai on tulluh Sanaspäi. Ni mi, mi on roinnuhes, ei ole roinnuhes Hänettäh.

⁴ Hänes oli elos, i elos oli rahvahan valgei.

⁵ Valgei pastau pimies, pimei ei voittanuh sidä.

⁶ Tuli ristikanzu, kudaman työndi Jumal, hänen nimi oli Iivan.

⁷ Häi tuli nähtyn sanojakse, sanomah valgieh näh, ku kaikin hänen sanan kauti uskottas sih valgieh.

⁸ Iivan iče ei olluh se valgei, a häi vai tuli ku sanuo tozi sih valgieh näh.

⁹ Tozi valgei, kudai ozuttau tuldu jogahizele ristikanzale, oli tulos muailmah.

¹⁰ Muailmas Häi oli, i muailmu oli roinnuhes Hänen kauti, no se ei tunnustannuh Händy.

¹¹ Häi tuli omah muailmah, no se ei vastannuh Händy.

¹² No kaikile, ket vastattih Händy, Häi andoi vallan tulla Jumalan lapsikse, kaikile, ket uskotah Hänen nimeh.

¹³ Hyö ei olla ristikanzan suavut, ei rungan himos, ei miehen tahtos, a ollah Jumalaspäi tulluot.

¹⁴ Sana rodih ristikanzakse, i eli meijän keskes. Myö kaččelimmo Hänen taivahallistu valgiedu, valgiedu, kudaman Tuatto andau aino Poijale. Häi oli täyzi hyvytty da toven tundemistu.

¹⁵ Iivan saneli Häneh näh da kirgui: «Häi on se, kudamah näh sanoin: Ken tulou jälles minuu, on suurembi minuu, ku Häi on olluh enne minuu.»

¹⁶ Hänen kyllyhyvyös myö kaikin olemmo suannuh, hyvytty hyvyön piäle.

¹⁷ Zakon annettih Moisein kauti, hyvys da tozi tuldih Iisusan Hristosan kauti.

¹⁸ Jumalua niken nikonzu ei ole nähnyh. Aino Poigu, kudai on Tuatan rinnal, opasti meidy tundemah Händy.

Iivan Ristii sanelou iččeh näh

¹⁹ Tämä on se tozi, kudaman Iivan sanoi, konzu jevreilöin vahnimat työttih Jerusalimaspäi pappiloi da leevieläzii kyzymäh hänel: «Ken sinä olet?»

²⁰ Iivan sanoi kohti, ei puččevunnuh. Häi sanoi kohti: «En minä ole Messii.»

²¹ «Kenbo sit olet?» kyzyttih hyö. «Oletgo Il՚l՚u?» «En ole», vastai Iivan. «Oletgo sit se uskaldettu Jumalan iänenkandai?» Häi vastai: «En.»

²² Sit hyö sanottih: «Kenbo sit sinä olet? Meil pidäy vediä viesti niilöile, ket meidy työttih. Midäbo sanot iččes näh?»

²³ Iivan sanoi: «Minä olen se iäni, kudai kirguu elämättömäs muas: ‘Luajikkua oigiekse Ižändän dorogu!’ Nengahäi iänenkandai Isaija on ennustannuh.»

²⁴ Niilöin joukos, kudamii oli työtty Iivanan luo, oli fariseidugi.

²⁵ Hyö kyzyttih hänel: «Miksebo sit ristit rahvastu, ku et ole Messii, etgo Il՚l՚u, etgo se Jumalan iänenkandai?»

²⁶ Iivan vastai: «Minä ristin viel, a teijän keskes on toine, kudamua työ etto tunne.

²⁷ Häi on se, kudai tulou jälles minuu. Minä en päi ni Hänen kengien nuorazii kerittämäh.»

²⁸ Tämä oli Jordanjoven toizel puolel, Vifanies, kus Iivan oli rahvastu ristimäs.

Jumalan Vuonu

²⁹ Tossupiänny Iivan nägi Iisusan tulemas hänen luo. Iivan sanoi: «Kačokkua! Jumalan Vuonu, kudai ottau iččeh piäle muailman riähkän!

³⁰ Häi on se, keh näh sanoin: ‘Jälles minuu tulou mies, kudai on minuu suurembi, ku on olluh enne minuu.’

³¹ I minägi en tundenuh Händy, no ku Izrail՚u suas tiediä, ken Häi on, tulin viel ristimäh.»

³² Iivan tovesti: «Minä näin, kui Hengi heityi, kui kyyhköi, taivahaspäi da jäi Hänen piäle.

³³ Minägi en tundenuh Händy. No Häi, kudai työndi minuu ristimäh viel, sanoi minule: ‘Kudaman piäle näit Hengen heittymäs da azettumas, se ristiy Pyhäl Hengel!’

³⁴ Minä näin sen i tovestan – tämä ristikanzu on Jumalan Poigu.»

Iisusan enzimäzet opastujat

³⁵ Tossupiänny Iivan myös oli sil samazel kohtal, i hänenke oldih hänen kaksi opastujua.

³⁶ Iisus astui siiriči. Iivan nägi sen i sanoi: «Kačokkua: Jumalan Vuonu!»

³⁷ Konzu net opastujat kuultih Iivanan sanat, hyö lähtiettih Iisusale peräh.

³⁸ Iisus kiändyi, i ku nägi heidy jälles astumas, Häi kyzyi: «Midäbo työ tahtotto?» Hyö vastattih: «Ravvi,» – se on meikse ‘opastai’ – «kesbo Sinä elät?»

³⁹ «Läkkiä, sit näittö», sanoi Iisus. Hyö lähtiettih i nähtih, kes Häi eläy, i jiädih lopukse päiviä Hänenke. Silloi oli nenga kymmenes čuassu.

⁴⁰ Yksi niilöis, kudamat kuultih Iivanan sanat da lähtiettih Iisusale peräh, oli Andrei, Simon-Pedrin velli.

⁴¹ Häi enzimäzekse löydi oman vellen, Simonan, da sanoi hänele: «Myö lövvimmö Messien!» – se on Hristos.

⁴² Andrei vedi hänen Iisusan luo. Iisus kačoi häneh da sanoi: «Sinä olet Simon, Jonan poigu. Sinun nimekse roih Kifa» – se on Kallivo, Pedri.

⁴³ Tossupiänny, konzu Iisus šuorii lähtemäh Galileih, häi löydi Hilipän da sanoi hänele: «Läkkä minunke.»

⁴⁴ Hilippy oli Vifsaidaspäi, sit samazes linnaspäi kui i Andrei da Pedri.

⁴⁵ Hilippy löydi Natanailan da sanoi hänele: «Myö lövvimmö sen, kudamah näh Moisei kirjutti Zakonas da kirjutettih Jumalan iänenkandajat! Häi on Iisus, Josifan poigu Nazarietaspäi.»

⁴⁶ Natanailu sanoi: «Voibigo Nazarietaspäi vuottua midätahto hyviä?» «Tule kačo», sanoi Hilippy.

⁴⁷ Konzu Iisus nägi Natanailan tulemas Hänen luo, Häi sanoi: «Kačo, täs on toven izrail՚alaine! Hänes ei ole nimittumua kielahuttu.»

⁴⁸ «Misbo Sinä minuu tunnet?» kyzyi Natanailu. Iisus vastai hänele: «Enne kui Hilippy kučui sinuu, minä näin sinuu smokvupuun al.»

⁴⁹ Natanailu sanoi: «Ravvi, Sinä olet Jumalan Poigu, Sinä olet Izrail՚an suari!»

⁵⁰ Iisus sanoi hänele: «Sendähgo sinä uskot, ku sanoin, kui näin sinun smokvupuun al? Vie suurembua kummua suat nähtä.»

⁵¹ I Häi jatkoi: «Toven, toven sanon teile: työ roittokseh nägemäh taivahan avvoi da Jumalan anheliloi yläh-alah liikkumas sil kohtua, kus Ristikanzan Poigu on.»