Enzimäine kirjaine fessalonikalazile 1 - Uuzi Sana

Algusanat

¹ Puavil, Siluan da Timofei työtäh tervehytty fessalonikalazien uskojien kanzukunnale, kudai eläy Tuatas Jumalas da Ižändäs Iisusas Hristosas. Armuo da rauhuttu teile.

Fessalonikalazien elaigu da usko

² Myö ainos kiitämmö Jumalua teis kaikis, konzu mainičemmo teidy omis malittulois.

³ Meijän Jumalan da Tuatan ies myö heittelemättäh mustelemmo, kui usko pani teidy dieloh, suvaičus – ruadoh da kui nad՚oužu meijän Ižändäh Iisussah Hristossah pani teidy tirpamah.

⁴ Jumalale armahat vellet, myö tiijämmö, Häi on teidy vallinnuh,

⁵ sendäh gu meijän saneltu jevangelii tuli teijän luo ei vai sanoinnu, a väinke da Pyhän Hengenke da ylen uskottavasti. Tiijättö ičegi, kui myö elimmö teijän keskes, teijän hyvyökse.

⁶ Teis rodih meijän noudajat da Ižändän noudajat, gu suuren ahtistuksen keskel Pyhän Hengen annetul ilol otitto vastah sanan.

⁷ Nenga teis rodih moizet, kudamis kai Makedonien da Ahaijan uskojat voijah ottua kuavua.

⁸ Teijän keskespäi Ižändän sana kajahtih ei vai Makedonieh da Ahaijah, a kaikkiel muijalgi teijän usko Jumalah tuli tiijokse. Meil ei ole hädiä sanella teijän uskoh näh,

⁹ gu kaikin paistah, midä luadii meijän tulendu teijän luo: työ hylgäittö valehjumalat da kiännyittö sluužimah eläväle toven Jumalale

¹⁰ da rubeitto vuottamah taivahispäi Hänen Poigua, kudaman Häi nosti kuollielois, Iisussua, kudai piästäy meidy tulies vihas.