Pedrin enzimäine kirjaine 1 - Uuzi Sana

Tervehyöt

¹ Pedri, Iisusan Hristosan apostol, työndäy tervehytty Jumalan vallittuloile, kudamat eletäh levälleh tulolazinnu Pontas, Galaties, Kappadokies, Aazies da Vifinies.

² Jumal, meijän Tuatto, kui jo ielpäi oli duumainnuh, valličči teidy da Pyhä Hengi eroitti teidy Iisusale Hristosale sanankuulijakse da Hänen verel pirskutettavakse. Ližekkäh teile Jumalan hyvys da rauhus.

Vuotakkua uskaldettuu piäzendiä

³ Ylendetty olgah meijän Ižändän Iisusan Hristosan Jumal da Tuatto! Omas suures armos Iisusan Hristosan kuollieloisnouzendan kauti Häi andoi meile uvven roindan, gu meil olis elävy nad՚oužu,

⁴ kodivuitti, kudai ei hävie, ei pahene, eigo kuiva. Sidä pietäh taivahis teih niškoi,

⁵ kudamii Jumal omal väil vardoiččou, gu työ uskon kauti suazitto piäzendän. Se piäzendy on jo valmis i se roih avattu tämän aijan lopus.

⁶ Juuri sendäh olgua hyväs mieles, hos nygöi teil pidäygi tirpua kodvazen gor՚ua, gu teijän uskuo opitah kaikenjyttymil muanittelendoil.

⁷ Kuldugi pannah tuleh gu oppie, ongo se tozi kuldu, a onhäi teijän usko äijiä kallehembi, migu häviejy kuldu. Gu teijän usko nämis goris ozutanneh tovekse, rodieu sit Iisusan Hristosan tulduu kiitändiä, kunnivuo da čestii.

⁸ Händy työ suvaičetto, hos etto nähnyh; Häneh työ uskotto, hos nygöi etto Händy näi, i piettö sanoil sanomattomua taivahallistu hyviä mieldy,

⁹ gu suatto piäzendän. Sendähhäi työ uskotto Hristossah.

¹⁰ Tädä piäzendiä Jumalan iänenkandajat jo ennevahnas äijäl arbailtih da duumaittih. Hyö ennustettih da saneltih Jumalan hyvyöh näh, kudai vuotti teidy.

¹¹ Hyö duumaittih, keh da mittumah aigah ozuttau heis olii Hristosan Hengi, konzu se ennusti Hristosan gorii da sen jälgeh tulijua kunnivuo.

¹² Heile oli annettu tiediä, gu hyö ei ruattu iččeh niškoi, a teih niškoi, konzu paistih sih näh, min nygöi saneltih teile net, kudamat taivahaspäi työtys Pyhäs Henges tuodih teile jevangelii. Nämih dieloloih anhelitgi tahtottas hos kačahtuakseh.

Eläkkiä pyhiä elaigua

¹³ Ga sit piekkiä iččie käzis da piekkiä mielet selgienny. Tävves uskos vuotakkua sidä Jumalan hyvytty, kudai teile annetah, konzu Iisus Hristos jiävihes.

¹⁴ Kui sanankuulijat lapset, älgiä heitykkiä noudamah pahoi himoloi, kudamien vallas työ enne elittö, konzu olitto tiedämättömät.

¹⁵ Kui Häi, kudai teidy kučui, on pyhä, muga työgi roikkua pyhikse kaikes, midä ruatto.

¹⁶ Onhäi Pyhis Kirjutuksis sanottu: «Olgua pyhät, sendäh gu Minä olen pyhä.»

¹⁷ I gu kerran työ malittulois sanotto Tuatakse Händy, kudai valliččemattah suudiu jogahistu hänen ruadoloi myö, ga eläkkiä sit Jumalua varaten tämä aigu, kudaman työ elättö mual vierahinnu.

¹⁸ Tiijättöhäi, teidy piästettih välläle tuattoloin tyhjäs elaijas ei mintahto häviejän tavaran hinnal, hobjan libo kullan,

¹⁹ a Hristosan, sen vijattoman da puhtahan Vuonan kallehen veren hinnal.

²⁰ Händy vallittih jo enne muailman luajindua, a nygöi loppuaijoil jiävittih teih niškoi.

²¹ Hänen vuoh työ uskotto Jumalah, kudai nostatti Händy kuollielois da andoi Hänele suuren kunnivon. Muga teijän usko da nad՚oužu ollah kiini Jumalas.

²² Nygöi, konzu työ puhtastuitto toven novvandal da rubeitto puhtahal mielel suvaiččemah vellii, ga suvaikkua sit toine tostu väzymättäh, tävvel sydämel.

²³ Työhäi rodiittokseh uvvessah, vai etto häviejäs siemenes, a häviemättömäs, Jumalan elävän da ilmanigäzen sanan kauti.

²⁴ Sanotahhäi Pyhis Kirjutuksis: – Ristikanzu on gu heiny, ristikanzan čomus on gu niityn kukkaine. Heiny kuivau, kukkaine kirbuou,

²⁵ a Ižändän sana kestäy ilmazen ijän. I tämä on se sana, kudai on teile iloviestinny saneltu.