Iivanan enzimäine kirjaine 1 - Uuzi Sana

Elaijan Sana

¹ Midä oli allus algajen, min myö kuulimmo, min näimmö omin silmin, midä kaččelimmo da opiimmo käzil, sit myö i pagizemmo: elaijan sanas.

² Elaigu jiäviihes, myö näimmö sen i sih niškoi myö sanelemmo. Myö annammo teile tiediä ilmanigäzeh elaigah näh, kudai oli Tuatan luo da jiäviihes meile.

³ Min näimmö da kuulimmo, sen myö annammo teilegi tiediä, gu työgi olizitto yhtes meijänke. Olemmohäi myögi yhtes Tuatan da Hänen Poijan Iisusan Hristosanke.

⁴ Tämän myö kirjutammo sih niškoi, gu meijän hyvä mieli rodies tävvekse.

Jumal – se on valgei

⁵ Tämä on se viesti, kudaman myö Hänespäi kuulimmo da kudaman annammo teile tiediä: Jumal – se on valgei, Hänes ei ole nimidä pimiedy.

⁶ Gu sanonemmo, buite myö olemmo yhtes Hänenke, a iče kävellemmö pimies, sit myö kielastammo, da emmo elä toven mugah.

⁷ No gu kävellemmö valgies, muga kui Häi on valgies, sit myö olemmo yhtes toine toizenke, i Iisusan, Hänen Poijan veri, puhtastau meidy kaikis riähkis.

⁸ Gu sanonemmo, buite emmo ole riähkähizet, myö muanimmokseh, i tozi ei ole meis.

⁹ No ku myö sanonemmo omat riähkät, sit Jumal, kudai on surematoi da oigei, prostiu meile riähkät da puhtastau kaikes viäryös.

¹⁰ Gu sanonemmo, buite emmo luadinuh riähkiä, sit luajimmo Jumalas kielastelijan, i Hänen sana ei ole meis.