Titusemut 3 - Labrador Inuttitut Heritage Bible

Atanît nâlektaujuksauninginik, uvagut tapatojogut nâpkigijaumagapta Kristûsikut. Ajungitulerᴋojinermik, sunatuinarniglo assinginik.

¹ Erᴋaitikit, atanivît atanersuillo atanerilugit nâleᴋovlugit, ᴋunutuidlutik piniarnernut ajungitunut tamainut;

² Kimiglônêt mitauteᴋaratik, akkerartortaililutik, inôtsiarlutik, ningarosujuinermik sakᴋertitsilutik inungnut tamainut.

³ Uvaguttauk sivorngane silaitoksôlaungmigapta, tapatolaptalo, tamartudlarluta, ikligunerit kivgartorlugit, sunatuinarniglo alliadlarluta, ningarosungnermelo anerudjinermelo arvertarluta, ômigijigêklutalo.

⁴ Gûdible piulijipta ilannâᴋaringa nagligosungningalo Sakᴋijârmânik,

⁵ Idluartulinerit pinialauktavut pitjutiginagit, nâpkigosungnerminulle tâpsoma piloriktilaukpâtigut, erniangupsârnerub ubvautânut, Anernerublo ajunginerûb nutângortitsininganut,

⁶ (Gûdib) kovilauktangata uvaptingnut amigangitomik Jêsuse Kristûsikut piulijiptigut;

⁷ Uvagut tâpsoma saimarsautânut idluartitaumalertogut, nerriungnermut kingormgujijuksauᴋovluta inôtsemik nâksaungitomik.

⁸ Tamadja oᴋausek okpernartoᴋsôjok. Pijomavunga tamakkoninga ajoᴋertuerᴋovlutit soᴋosijuilutit, okpertut Gûdemut ajungitulinernik ataruilerᴋovlugit. Tamakkoa idluarput atornarlarmiglo inungnut.

⁹ Allakille apersûtit silainilit illagêt kinguvânginik, aivadlarnerillo akkerartûtinerillo perᴋojat pivlugit; tamakkoa piungimatta atornaratiglo.

¹⁰ Inuk ajoᴋertuinerluktok ᴋemaguk atausiardlugo aipâniglo inertilauᴋârdlugo;

¹¹ ᴋaujimavlutit taimaitok mumiksimangmat idluitulilarmelo, nangminerminut erᴋartortaumajotut.

¹² Artêmase tiligupko ilingnut, Tikiᴋuselônêt, tuavilutit ᴋailerit uvamnut Nikopolisemut; issumasimagama okkêjomavlunga tagvane.

¹³ Zênase, perᴋojanik illisimajok, Apolluselo ajorniarᴋôrtanginik pitilugik, tilikik.

¹⁴ Okpertoᴋativulle ilinniarlît, ajungitulijungnarᴋovlugit pijarialingnik ikajorlutik, sulingitôlerᴋonagit.

¹⁵ Ilûnatik uvamnêtut salutipâtit. Salutikit tamaita uvaptingnik nagligosuktut okpernerme. Saimarsautib illagilise ilûnase. Amen. Makkoa aglaktaumavut Nikopolisemit Mazedôniame.