Titusemut 2 - Labrador Inuttitut Heritage Bible

Inutoᴋaujut inôsuktullo kivgallo ilusiksanginik. Gudib saimaninganik ilunainut sakᴋijârsimajomik.

¹ Igville oᴋâlaniarit ajoᴋertûsek atsuilinartok malitsiarlugo:

² Ituit âmaingajôjârtailititsainarᴋovlugit, ᴋuksalailugatik, nâmatuinartomiglo pilutik, atsuilerᴋovlugit okpernermelo, naglingnermelo, ᴋenuersârnermelo.

³ Taimaktauk ningiut ivsornaitutitut inôniarᴋovlugit, terliaᴋataisuerlutik, vainetuluadlaratik, ajungitomik ajoᴋertuivlutik.

⁴ Uilingnik inôsuktunik ajoᴋertuerᴋovlugit, tâpkoa nâmatuinartomik perᴋovlugit, uitik nagligilugit, ᴋitorngatiglo nagligilugit;

⁵ Silatoᴋovlugit, ikliguktailivlutik, pairijaksamingnik pairserᴋovlugit, ajunginiarlutik, uitik atanerilugit, Gudib oᴋausingit mitautigijaulerᴋonagit.

⁶ Taimaktauk nulialit inôsuktut oᴋautiniakit, nâmatuinartomik perᴋovlugit.

⁷ Ilûnânele nangminek igvit takotilerit ajungitulinermik igjaraksauvlutit, illaᴋangitomik ajoᴋertûseᴋardlutit opinarlutillo,

⁸ Atsuilinartunik erᴋartortaujungnangituniglo oᴋauseᴋarlutit; akkerartorosuktok kangusuᴋovlugo, pitjuteᴋarᴋonagolo oᴋautigilukluta.

⁹ Kivgaujut (oᴋautikit), nâlekamingnik nâletsiarᴋovlugit, tamainik ᴋuviagijanginik pilutik, kioluktaililugit;

¹⁰ Augigutsinatik, ilûnânele nertornarlutik ajungilarmiglo sakᴋerlutik; Gûdib piulijipta ajoᴋertûtânik nertornarsititserᴋovlugit ilûnâne.

¹¹ Gûdib saimarsautâ piulijaunartok sakᴋersimangmat inungnut tamainut;

¹² ᴋaujisarpâtigullo Gûdeᴋangitut ilusingit, silaksoarmiullo ikliguningit allarlugit, nâmatuinartomik, idluartomiglo, Gûdelo nâleklugo inôniarᴋovluta silaksoarme tamattomane;

¹³ Nerriugijaksak piloringnartok, Gûdiviksûblo piulijipta Jêsusib Kristûsib sakᴋerniksanga ânanaudlartok utaᴋilugo;

¹⁴ Ingminik tunnilauktub pivluta, piulijomavluta idluitunit tamainit, ivsornaititsijomavlunelo nagminek inoᴋutiksaminik, ataruilijinik piniarnernut ajungitunut.

¹⁵ Tamattominga oᴋâlagit kaiblailutillo inerterilutillo ilungertordlutit; kimullônêt nachogijautaililutit.