Titusemut 1 - Labrador Inuttitut Heritage Bible

Ajoᴋertuinerôjut ᴋanok ilingajarioᴋarninginik. Ajoᴋertuinerluktut akkerartortaujuksauninginik.

¹ Pauluse, Gûdib kivganga, Jêsusible Kristusib Apostelinga, Gûdib anerijangita okperningit pivlugit, illitarijauᴋovlugolo mikseᴋârnek Gûdemik nâleᴋojijok,

² Nerriugilugo inôsek nâksaungitok, tamanna Gûdib saglotuitub angersimanerilauᴋtanga, silaᴋsoak pigiarᴋârtinago;

³ Neliunerminele oᴋautsine ᴋaujijautilaukpâ oᴋâlanikut; tamattominga uvanga perᴋojaujunga Gûdib piulijipta perᴋojanganut:

⁴ Titusemut ernimnut nelâgôrtomut okperneᴋaᴋatigêngnivuk pivlugo: Gûdib Atâtab Nâlegaptalo Jêsusib Kristûsib piulijipta saimarsautiminut, nâpkiningnerminullo, ullapirsautiminullo illagilitittôk?

⁵ Tamanna pivlugo Kretamut ᴋemalauᴋpagit, igvit nâmaksititserᴋovlutit âᴋilaungitamnik sulle, angajoᴋaunerôjuniglo (illagêt) pitilugit iglugasaksoarne tamaine, sorlo perᴋolaurapkit:

⁶ Passijaksausuertomik pitaᴋarpat, arnab atautsib uinganik okpertunik ᴋitorngalingmik, ᴋoksalainek pivlugo passijaungitomik, tappatungitomiglo.

⁷ Ajoᴋertuinerôjok passijaksausuertuksaungmat, Gûdib iglunganik pairsijotut; ingminênâᴋijomanane, ningarosuksâranelo, vainetuluadlarane, ileranaromanane, nachonartomik perᴋutiniarasuarane;

⁸ Siniktarviogajuklune, ajungitomiglo nagligosuklune, nâmatuinartomik pilune, idluarlunelo, ivsornailunelo, ikliguktaililunelo;

⁹ Oᴋausek okpernartok ajoᴋertûtiksak ataruilivigilugo, pijungnarᴋovlugo ajoᴋertûtsemut atsuilinartomut kaiblailune, pidlarlugillo akkerartortut.

¹⁰ Unungmatta nâlegomangitut, piungitunik oᴋausilit tamartitsijullo, kipimajut sugaluluardlutik.

¹¹ Taipkoa ᴋaningit simiklugit pijariaᴋarpok; iglomioᴋatigênik ilûnainik mumiktitsingmatta, idluangitunik ajoᴋertûserijaksaungitunik pivut, kangunartunik perᴋutiniaromavlutik.

¹² Taipkoa nangminek illangat, nelautaijoᴋotingat oᴋalaujuvok: “Krêtamiut tagva saglotsainartut, nergjutiâluit, natjallo erᴋeasuktut!”

¹³ Kigligiutsinek tamanna nelâgôrpok. Taimaimat inertidlakit, okpernerme atsuiliolerᴋovlugit,

¹⁴ Nâlektaililugit Jûdit oᴋâlaningit tukkeᴋangitut, inutuinaillo perᴋojangit, mumiktitsijut mikseᴋârnermik.

¹⁵ Ivsornaitune ilûnatik ivsornaiput; ivsornartunulle okpingitunullo ivsornaitoᴋangilak, erᴋarsautingille issumangillo tamarmik ivsornadlarput.

¹⁶ Gûde illitarivlugo oᴋarput, piniarnermingnulle missiarutigivât; Gûdemut makᴋojungnaramik, tapatojoᴋsôlarmiglo, sappertoksôvut ajungitulinernut tamainut.