Takotitaunermik 9 - Labrador Inuttitut Heritage Bible

Tiptulausijartut tallimanganik pingasojortunganiglo.

¹ Engelillo tallimangat tiptulausijarpok. Uvloriak tagva takovara ᴋilangmit kataktok nunamut; tâmna tunitsiviolerpok pêrumik netteᴋangitomut.

² Netteᴋangitok mattuêrmago, iserluksoak netteᴋangitomit anivok, sorlo iserluk kiaksautesoarmit, seᴋinerlo silalo tâᴋtoksôlerpuk netteᴋangitub iserlunganut.

³ Iserlungmillo piglertaᴋalerpok nuname. Tâpkoa pitsartutitaulerput sorlo kingupaujârtut nunamêtut pitsartuneᴋarningititut.

⁴ Oᴋautjauvullo, iviksukat nunamêtut, nutaijoktullônêt, napârtullônêt asserorlugit perᴋonagit, inuille kissêta, Gûdib naᴋitjutânik ᴋaungmiuteᴋangitut.

⁵ Perᴋojauvullo, tâpkoa toᴋotaililugit, ânilakteradlartilugille takᴋit tallimat nâvlugit; ânilakteradlartitauningallo sorlo kingupaujârtub inuk kappikpago ânilakterarnadlalaukpok.

⁶ Uvlune taipkonane inuit toᴋo ᴋenerasuarniarpât, nenninagolo, toᴋojomanermik kajungilârniarput, toᴋuble ᴋemâniarpait.

⁷ Piglertat tâpkoa ilinganingit horsititut sorsungnermut opalungairsimajutitut, niaᴋomikullo pitalit niaᴋôtititun-itunik goldeojârtunik, kênaᴋartullo inuit kênangititut;

⁸ Nujaᴋarlutiglo arnat nujangititut, kiguteᴋarlutiglo loevititut.

⁹ Sagvingmiutaᴋarlutiglo kikiaksoatun-itunik; issarungitalo ᴋeaksungningit ᴋemuksit horsilit unuktut sorsugiartortut nippingititun-iput.

¹⁰ Pamioᴋarpullo kingupaujârtutitut, pamiungillo kakilauteliovut; tâpkoalo pitsartuneᴋarput inuit kappiasuktidlarlugit, takᴋit tallimat nâvlugit.

¹¹ Netteᴋangitub Engelinga atanerivât; tâpsoma atinga Ebrêerit oᴋausingine Abaddoneovok, Grîᴋillo oᴋausingine ateᴋarpok Apollionemik.

¹² Kappianarnek atausek anigorpok; ahâk kappianarnîk maggûk sulle tamattoma kingorngagut neliutsomârpuk.

¹³ Engelilo 6 ingat tiptulausijarivok. Nippemiglo tagva tussarpunga Altarib goldib, Gûdib sânganêtub, terreᴋunginit sitamanit;

¹⁴ Tamattoma Engelit 6 ingat tiptulautilik oᴋarvigivâ: ᴋelarutjâkit Engelit ipkoa sitamat ᴋelaksorsimajut kôksûb Eufratib saniane.

¹⁵ Engelillo taipkoa sitamat ᴋelarutjârtauvut, opalungairsimajut, stunde, uvlok, takᴋek, jâre neliutituarpatta, inuit pingasuililugit pingajuingit toᴋodlugit.

¹⁶ Sorsuktuksallo horsit ᴋângine iksivajut unurningit 200 Milliôneovut, unurningillo tussarpakka.

¹⁷ Taimaglo horsit takkovakka ᴋânginelo iksivajut: sagvingmiutaᴋarput ikomalingnik tungujoktalingniglo, orᴋsorutilingniglo, horsillo niaᴋungit loevit niaᴋungititun-iput, ᴋaninginillo ikoma iserluglo orᴋsorullo anivut.

¹⁸ Pingasunut tâpkonunga inuit pingasuililugit pingajuingit toᴋotauvut, ikomamullo iserlungmullo, orᴋsorutemullo ᴋaninginit anijunut.

¹⁹ Pitsartuningit ᴋaninginêngmatta, pamiungitalo ᴋuglugiat adsigivait, niaᴋoᴋarlutiglo akᴋunaijutiksanik.

²⁰ Amiakoᴋarporle sulle inungnik, kappianartunut tamakkonunga toᴋotaungitunik, ᴋaᴋialingituniglônêt aggangmik piniarningit pivlugit, Sâtanaselo gûdingoallo goldit, silberillo, ᴋaᴋorlillo, ujarᴋallo, ᴋejuillo sanamajut, tautugungnangitullônêt tussarungnangitullônêt arvertarungnangitullônêt tuksiarvigigamigit.

²¹ Kaᴋialingilallotauk inuarnermingnit, Angaᴋonermingnillo, assiniarnermingnillo, tiglingnermingnillo.