Takotitaunermik 8 - Labrador Inuttitut Heritage Bible

Naᴋitjutit 7 ingata angmartauninganik. Engelinik tiptulautilingnik 7 inik. Tiptulausijartunik sitamanik sivorlunik.

¹ Nakitjutit 7 ingat (Saugârsûb) angmarmago, ᴋilangme nippeᴋartailivok stundib ᴋoppangane.

² Engeliniglo 7 nik takovunga, tâpkoa Gûdib sânganut pivut, tiptulautiniglo 7 nik tunitsiviolerput.

³ Engelillo tâpkoa asingat sakᴋerpok, Altârib sanianut pivlune, iluleᴋullo iserluanititsivik golde tigumiarpâ, unuktuniglo iserluanerutiksanik tunitsiviolerpok, tunijerᴋovlugo ivsornaitut ilûnatik tuksiarninginut, Altareme goldeme iksivautaᴋsûb sânganêtome.

⁴ Iserluanerutiksablo pujoa ivsornaitut tuksiarningit illagilugit ᴋongmuarpok Engelib agganginit Gûdemut.

⁵ Engeliblo iluleᴋut iserluanititsivik tiguvâ, ilulerlugolo ikomamik Altâremit, nâvidlugolo nunamut. Nippersoakarpok tagva, kallungmiglo ᴋaumalangmiglo, nunablo sajukpilâdlarninganik.

⁶ Engelillo 7 it tiptulautinik 7 nik pilit opalungairsimavut tiptulausijarniardlutik,

⁷ Engelillo sivorlingat tiptulausijarpok. Nettaᴋonalerpok tagva, ikomamiglo aungmiglo akusimajungnik nunamut kataktoᴋarpok. Kataktoᴋarpok. Napârtullo pingasuilivlugit pingajuingit ikitauvut nungudlugit, (nunablo) nutaijoktungit ilûnatik nungutauvut.

⁸ Engeliblo aipanga tiptulausijarivok. Kakᴋaksoatun-itok ikomamut ikoalajok imânut tagva pisârpok, imarbiglo pingasuililugo pingajuat aungolerpok.

⁹ Imânelo ômajut pingasuililugit pingajuingit toᴋovut, umiaksuillo pingasuililugit pingajuingit asserortauvut.

¹⁰ Engelillo pingajuat tiptulausijarivok. Uvloriaksoak tagva ᴋilangmit kattakpok, nennergutsoatun ikoalajok, kôllo pingasuililugit, puailavîllo tupvigivait;

¹¹ Uvloriak tâmna Sungarmik ateᴋartok; tâpkoalo imangit pingasuililugit pingajuingit sungaulerput. Inuillo unuktoksuit toᴋovut imanginut, sungermatta.

¹² Engelillo sitamangat tiptulausijarivok. Seᴋinek tagva pingasuililugo pingajuat, takᴋerlo pingasuililugo pingajuat, uvloritjallo pingasuililugit pingajuingit tâᴋtoksôlerput, uvlub ᴋaumaninga pingasuililugo pingajuat pêrlugo, unnuarlo taimainivok.

¹³ Engelemiglo takovunga tussarlungalo ᴋilaub ᴋerᴋagut tingijomik, nippersoarmut oᴋartomik: Kappianarmêk, kappianarmêk, kappianarmêk nunamêtut, tiptulautit assingita nippingit pivlugit, Engelit pingasut sulle tiptulausijartuksat neliutilârningine!